الاخت هدى ميرغنى تحيه طيبه وانتى تضربى على وتر الحنين للوطن الجميل الذى اسال الله ان يرفع عنه البلاء ووالوجع والالم وبركات الشهر المبارك ان بنعم السودان والشعب السودانى بالعافيه والهناء ويتنسم الحريه قريبا فلنرفع جمعيا الاكفه ونتضرع فى الدعاء ونسال الله الرحمه والخير لكل فرد من افراد الشعب السودانى اللهم عليك بمن ظلموا عبادك اللهم عليك بمن اكل وسرق اموال الشعب السودانى وادلو بدلوى فى اغننيه سمسم القضارق التى هى من احب الاغانى التى تغني بها عدد من المطربين ووايضا اتذكر فى كل وقت اغننيه من طلعت القمرا التى هى من اجمل اغانى الترابط الاجتماعى فى الزمن الجميل
مع تحياتى مصطفى نور سمسم القضارف
الحديث للراحل البروف (علي المك)
سالت عائشة الفلاتية عن اصل سمسم القضارف فقالت انها سمعتها فى بيت سماية فى العباسية يغنيها واحد اسمه حسن جبر الدار وكان ينقر على طبلية صغيرة كما الدلوكة وقد استحسنتها فحفظتها عنه بكوبليهاتها المشهورة عنها فى الاذاعة
ياسمسم القضارف الزول صغير ماعارف ياقليب الريد كلما هديتك شارف **** حبيب تعال نتقادم نسير سوى ونتكالم اطير حدى واختفو من العالم **** يايمة لاتدقنو العقر مابلدنو الفين جنيه من امه مابجيبنو ****
شديتو فوق الهولو وندهت ليهو رسولو حبيب الروح محل مايروح بنزورو **** حبيب بريدك ريدة ريدة الحمام لى وليدها حبيب تعال خلى النتم الريدة **** يايمة مانى وحيدى شايلة الصغير فوق ايدى مابى الفراش وداير الرقاد فى ايدى **** ذلك ماسجلته الفلاتية على مااذكر ثم ان ابوداؤود والذى لم يعثر لحسن جبر الدار هذا على اثر ( تلك قصة اخرى ربما نجئ اليها يوما ما) قال انه استمع لترزى فى حى الداخلة بعطبرة يغنيها بالعود وفى كوبليهات مختلفة تماما عما سجلته الفلاتية
حبيب بخاف العقبة وبسدر معاك العتبة عقد السوميت يالدلدلوك فى الرقبة **** السمسم الداقنو تحت السرير داسنو يالله هوى وينو الحبيب دايرنو **** الاصفر الهنودى حاربت ليك بلودى الله الكريم يتم لى مرودى **** امانة ياغزيل فى فرعك المميل حبيب الروح محل مايميل بنميل **** طلعت فوق التمر بشوف جلابة التمر حبيب الروح المال فداية العمر **** وغيرها مما ارتخت معه اوتار الزاكرة فى ليلة راس السنة(ديسمبر1990) كنا رهط من المعتقلين السياسيين فوق سطح عمارة الامن اياها انتحينا ركنا قصيا ورحنا ندندن بغناء خافت فاقترب منا رجل مهيب كان معتقلا فى قضية تهريب اسلحة وراح يدندن هو الاخر مواصلا فى سمسم القضارف والتى كنا قد شرعنا فى غنائها فاضاف الى حصيلتى منها هذه الكوبليهات
السرتى اب حباكة التحتو الناس تتباكى ان جانى الموت ما بكفنونى بلاك **** السمسم الفى الغابة العرفة فينا اتغابى يمكن جفا ويمكن عليهو رقابة ****
فى القاهرة اضاف الصديق العامر بالالفة التشكيلى الباقر موسى الى حصيلتى الكوبليه توب الكرب المتنى دايراك حزام لى بطنى الله الكريم من نارك الشوتنى تلك هى سمسم القضارف والله وحده اعلم وارشحها لكم ضمن المئة المسنونات والتى كان قد افترحها من قبل الصديق الدافئ بشرى الفاضل. *انتهي كلام الراحل البروف علي المك سمعت ان شاعرها اسمه عثمان علي إحيمر هو أيضا شاعر أغنية تانية من أغانى نفس الزمن داك اسمها" طلعت القمرا ياعشايا" والله اعلم يوجد تسجيل بصيغة ام بى ثرى لأربع فنانين للأغنية مدني صالح عائشة الفلاتية ابو داؤود والكابلي في قناة زمان يافن للصوتيات تيليجرام
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
مصطفى نور
فيس بوك
تويتر
انستقرام
يوتيوب
بنتيريست