|
|
 Re: فى ذكرى رحيل الاستاذ / مصطفى سيد احمد (Re: ANWAR SAYED IBRAHIM)
|
الطيب عبد الماجد✍🏿..
بروفايل مبدع ….
مصطفانا ….
هاهي (الجزيرة ) مرة أخرى على الموعد تهدي السودانيين أحد ( فلتاتها )
( مصطفي سيد احمد ) …
ذلكم القادم من ( ودسلفاب ) الوديعة التي ابتعدت قليلاً عن النيل فعانقت المطر …!!
وقد أدخلها ( ود سيد أحمد ) إلى دائرة الضوء وهي التي اعتادت الهدوء والسكينة عندما بدأ الناس يتساءلون من أين سطع هذا القمر ..!!؟؟
فكان السودان على موعد مع فنان استثنائي ….مختلف ……وبعيد ….!!
والسودان دا أصلو ما بتعرف (المطرة ) صابة وين وجاية متين ….!! كلو قبلي …وكلو شايل ….!!
ويا مطر عز الحريق …!!
( مصطفي سيد أحمد المقبول )
هكذا تقول البطاقة الشخصية
و( مصطفانا ) هي بطاقته ( الوردية ) كما يحلو للمحبين أن ينادوه بهذا الإصطفاء والإحتفاء والتعلق والحب 🥰
كيف لا وقد غنى الرجل ل ( المحرومين ) و ( البسطاء) و ( الأرض ) و ( النيل ) و ( التراب ) وهذه خماسية لا يعزفها إلا ( ودحلال )
وكان ( مصطفى ) كذلك معلماً وود تربال
( مزيج برنت )
فاستنشق غبار الطبشيرة والأرض معاً
فجاء صوته ملائكياً يخرج من بين الحب والعجائب
يسمو بالإحساس ….ويلامس الروح …!!
أخاله على الدوام ( درويشاً ) هائماً في ملكوت الله وحلماً سماوياً نبيل …..وزول مبروك ….
بشوف بعيد ويجي يحكي لينا عن زمان وهسا …وبكره …!!
وإلاّ باكر يا حليوة
لمـّا أولادنا السمر
يبقوا أفراحنا البنمسح بيها .. أحزان الزمن …
البلد عند مصطفى ( حبيبة ) بتشوفا في كل أغنياتو
زي ماهو بشوفنا فيها ….!!
ولاقدرت طولك شان أجيك لاقدرت من غيرك أكون
رغم الهدوء الذي يبدو على محياه الوديع كانت أغنياته تضج بالحياة …!!
صاخبة الرمزية …عميقة المعاني …راقية الإحساس ….!!
ولأنه مختلف كان لابد أن يلتقي مع شعراء مختلفين
فكان ( النخلي ) الذي تفوق على نفسه عندما كتب
( واقف براك والهم عصف ) …!!
وكأنه يقصد ( القديس ) مصطفى سيد احمد
فاهداه هذه الكلمات ليترجمها الأخير لحناً وقيثارة
زلزلت كيان العاشقين ..
وضى المصابيح البعيد
أتعب عيونك .. وإنطفا
لمتين مواعيدك .. سراب
والريد شقا وحرقة وجفا
وكان لقاءه مع السعيد ناعماً وطرياً
( عصفور لاقى زهور )
حيث غنى لصلاح حاج سعيد مجموعة من الأغنيات المحتشدة ..
مش بقول ليك دي زهرة ( النرجس ) ودي زهرة ( الياسمين ) ودا ( الفل ) ..!!
أها دي أغنيات ( صلاح ) لي ( مصطفي )
كل واحده أحلى وأعمق وأجمل من التانيه ….!!
وكلهن زهور …🌷💐🌸
توشح بها مصطفى سيد احمد ( سمواُ وترف ) وكتب بها حاج سعيد اسمه في لوحة ( الشرف )
وأنا عندي ليك كان الفرح ..
رغم إحتمالي أساكي يا جرح الألم ..
كان خوفي منك جاي ..
من لهفة خطاك على المواعيد الوهم
ليتدفق ( صلاح حاج سعيد ) في حضرة ( الدرويش ) طوفان من الدهشة والسطوع ..!!
مشى مصطفى ولحق به السعيد
لا رسالة تجيني منك
لا خبر طمني عنك
وإنت سايق فيني ظنك .
وقيل ( سايي ) من سوء الظن ..
والله لو كتبها ( سابق ) لقبلناها ….!!
فكلاهما ( سابق ) لزمانه …ويحتملها النص …!!
التقى مع الرقيق ( هلاوي ) في ( الملام ) فكان لقاءاً حنيناً يشبه ( هلاوي ) ويحمل ملامح ( مصطفى ) في أغنية ( عابرة ) سمت بنا وارتقت إلى فضاءات لا يقدر عليها لها إلا الكبار …
( وختت اللوم في حتة ضيقة ) …
وياحلو دا السكوت مرات كلام
وعدم الكلام هو كمان ملام
الوردة لو فاتا الفراش
ما أظن تلومو مع الندى
ما بتجرح إحساسو الجميل
والريدة يا حنين كده
🙌. 🙌
( دا باص قون ياهلاوي )
وتجلت عبقرية ( مصطفى ) في أنه كان يغني ( للترابلة ) و ( العمال ) و( الطلاب ) و( النخب ) فتصل أغانيه لكل أضلاع هذا ( المربع الذهبي ) وبذات العمق والسحر والجلال ….!!
وهي معادلة لايقدر عليها إلا هذا المتجلي المسكون ….!!
كان ( مصطفى ) يهز الجامعات هزاً …كلمة ومعنى وروح في رمزية ساطعة …وأداء موثر ….وسواقة ب ( العلا ) ..
فشكل ( ود سيد أحمد ) منهجاً دراسياً إضافياً يضاف لكل التخصصات ويختاره معظم الطلاب الذي أخذوا أغنياته على محمل ( الود ) …!!
ودخلو بها الى الغرف المغلقة ….فتقاسم ( مصطفى ) معهم المنهج والدرس …..والأحلام
وقد احتضنوها ورددوها حبيبة وبشارة ……ووطن ….!!
التقى مع الكبير ( محمد الحسن سالم حميد )
صوت الارض ..وساحر الشمال …!!
فكان لقاء القمح والنخيل …🌴🌾
( وحميد دا شدة ما باذخ …إسمو ذاتو تحس بيهو قصيدة )
وكان عم ( عبد الرحيم ) كلمة السر التي تحرك الوعي
وتفجر الطاقات وتحكي القصة …!!
تشحذ الهمم ….وتعبي القلوب ….وتقود الصحوة …!!
ترفع الروح …وتنكأ الجروح …!!
فيتدفق الطلاب وعداً وقمحا وتمني …
فيصل ( أدرينالين ) الوطنية الحد ويقفل ( الطبلون )
وسايقا عبد الرحيم ….!!!
حيكومات تجي .. وحيكومات تغور ..
تحكُم بالحُجي .. بالدجل الكجُور ..
ومرة العسكري كسار الجبُور ..
يوم باسم النبي تحكمك القبور ..
تعرف يا صبي ..
مرة تلف تدور .. ولا تقول برِي ..
أو تحرق بخور ..
لذلك كان مصطفى عالي وساطع وكبير …..
ولذلك عرفت السلطات قوة الصوت وعمق التأثير…..!!
فعمدت على إقصائه وتهميشه والتشويش عليه
فذهبت الحكومة ……..وبقى مصطفى …!!🙌
كان ( ود سيد احمد ؛ ولا يزال بقعة ضو …وبشارة فال
ويا ضلنا المرسوم على رمل المسافة وشاكي من طول الطريق
قول للبنيه الخايفة من نار الحروف
تحرق بيوتات الفريق
قول ليها ما تتخوفى
دي النسمة بتجيب الأمل
والأمل بصبح رفيق
أها نحن بس قاعدين راجين الأمل دا ……!!
والأمل بصبح رفيق 🌹
تحركت الشخوص عند ( مصطفى سيد أحمد) ومشت بيننا
لحماً ودماً وشعور ….!!
( ترسنا ) مع ( عم عبد الرحيم )
وصلينا المغرب مع ( الحاج ودعجبنا )
المن سنين أيام جهلتو ديمة في دعوة صلاتو
بسأل المولى السلامة وسترة الحال والكرامة ….!!
( مدد يا حاج )
( قيلنا ) عند ناس ( أمونه )
وجات ( نوره )شايله فرح الدنيا كلو ….
رغم الهديمات القديمة ومسحة الحزن القبيل
وشوية من طعم الهزيمة …
لكن ( نوره ) حلوة …( ونوره ) سمحة …….نوره آية ….ونوره جايه …!!
نحن راجين ( نوره ) يا مصطفي ….!!
مش قلت بتجي ..!! ……
إتأخرت مالا ….!!!؟؟
بس نحن بنثق في كلامك ….
إن شاءالله بتجي
وﺟﺎﻱ ﻟﻴﻚ ﻳﺎﻧﻮﺭﺓ ﻏﻴﻤﻪ ﺗﻤﻸ ﻣﺎﻋﻮﻧﻚ ﺧﺮﻳﻒ
ﻳﻤﻠﻲ ﻋﻴﻨﻴﻜﻲ ﻭﻳﻔﻀﻞ ﻳﺮﻭﻱ ﺟﻮﺍﻙ ﺍﻟﻌﻄﺎﺷﺎ
ﻳﺎﻧﻔﺲ ﻓﺠﺮ ﺍﻟﻘﺼﺎﻳﺪ ﻳﺎﺑﻼﺩﻱ
ﺩﻩ ﺍﻟﻘﻄﻊ ﻗﻠﺐ ﺍﻟﺮﻭﺍﺩﻱ
ﺑﺎﻟﻠﻮﺍﺝ ﺍﻟﺠﺎﻱ ﻭﺑﺎﺩﻱ
بتصدق يا أبو السيد الأولاد السمر القلتا حيجو…..!!
جو …!!
بس ماخلوهم يبقو أفراحنا البنمسح بيها أحزان الزمن …!!
بتصدق …!! 😰😥
إلا صابرين …!!
ويا حزن الغنى ... وصابرين
من بعد الضنى ... وصابرين
على وعد المنى ..صابرين🙌
رحل ( مصطفي ) بعد رحلة من الألم والمعاناة والعلو
وكان صامداً وصابراً ونبيل ….!!
رحل في ( الدوحة ) بعيداً عن ( اللوحة ) التي رسمها بإحساسه ونبضه لوطن طالما حلم به وسكب فيه الروح مضى الشهاب لكنه بقي في القلوب التي عشقته …ومنحته الرضا والقبول وجميل البوح …!!
سافر محطات الوداع
ضجت قدامك وراك
وسماك غناك
مساحات الأسى الفي عيونا
تتفجر مدينة وناي
خرج من ( وسلفاب ) وعاد إلى ( ودسلفاب )
وبين الخروج والعودة كانت ( مملكة مصطفي سيد أحمد ) التي يقصدها العشاق ويؤمها الكبار بعرض الوطن وطوله
ترجل الأستاذ ولازال جواده يجري..
ولسا بيناتنا المسافة والعيون واللهفة والشوق والسكون 😥
صحي يا نوره ….!!!؟؟؟
|
|
 
|
|
|
|
|
| |
مصطفى نور
فيس بوك
تويتر
انستقرام
يوتيوب
بنتيريست