/ نُقطَة .. صَبُــــر جديــــــــــــــــــــــــــــــــــد/

هل الغربة ميتة ممرحلة ؟

ترجع تلقى ابوك بقى شايب وعجز وحيلو اتهد
تلقى امك الزمن اكل من لحمها وملامحها
والاسوء والكابوس ما تلحق جنازتهم
وتجي تقيف في قبورهم او انت تجيهم في صندوق.

بتلقى الشفع الصغار كبرو بقىو بنات و نسوان كبار
ورجال والاتولدو جُداد مابيعرفوك وما عندهم ليك حاجة.

الناس بتنساك وبتنسى شكلك والبعيد عن العين بعد عن القلب .
الناس بتتعود على عدم وجودك بتفقد مكانك بينهم.

عايز تصدق كلامي ؟! اتذكر اول مرة تسافر واول مرة ترجع شوف مشى معاك المطار كم نفر ؟
وجاء استقبلك كم نفر ؟ واتذكر اخر اجازة ليك وقارن شوف الرسايل الوصلتك عشان تودعك قدر شنو .

وامسك تلفونك هسي شوف رسايلك وشوف اخر مرة رسل ليك زول سأل منك وعبر ليك
عن فقدو ليك كانت متين ؟! موش قلت ليك بتعودو على عدم وجودك بينهم ؟!

طيب بالنسبة ليك انت؟!!!

ولي قلبك المات . اول سنة ليك في الغربة وكنت فاقد الأهل والجيران وبتاع الدكان
والناس وبتسأل منهم واااااخ لو قالو ليك فيهم زول مات تتقطع من جوة .

لاكن هسي ؟! لسه نفس احساسك ؟ قلبك مات صاح ؟ بقولو ليك:
فلان مات بتقول ليهم: ياخي؟ فلاااان مات بالله؟! ربنا يرحمو ياخ ،
و تزعل عليهو دقايق وبعد داك تنسى . اتعودت تعيش براك وقلبك مات .

دا كلو عشان القروش ؟! ياخي القروش تطير . ما اهو عايش زيك زيهم
من اول الشهر بتقطع قروش وتنظر الشهر الجاي ولله الحمد.

الكارثة الكبرى انك بتبقى مادي. تقعد تحسب فيها بالريال وانت العمرك في بلدك ما حسبتها ومخليها على الله .

حا يقولو ليك لو ما عاجباك ارجع بلدك. والله لو بالسهولة دي كان رجعنا لاكن الغربة بتدخلك في دوامة ما بتطلع منها بالساهل وما بيعلمها الا مجرب .

نسيت اكلمكم عن احساس عدم الانتماء! انتو انت غريب
حتى لو البلد الانت فيها محترماك ومدياك راتب كويس ووضعك مستقر برضو بتحس انك غريب .

طبعا انا بتكلم عن المساوي اكيد في جوانب إيجابية بس صدقني التمن غالي .الله غالب .

صدقني الغربة أسوأ احساس ممكن تعيشو في حياتك . ممكن تكون لابس كويس
وعندك ايفون وعربية . بس والله عيشة باهتة والحمد لله على كل حال.

وايه الدنيا غير لمة ناس في خير ❤️ او ساعة حزن ؟!
اللأسف،ده الحاصل بي و الحاصل بيك