حضور الغياب --- غياب الحضور

جات القوافل
والمواكب
صلت عشق ارضك فرض
وبعدو النوافل
جات المراكب
مكتحه بي غبار الموج
مخربشة بالعنا
تغني تدوبي
لى جاه الأرض
فترانه تنده للجروف
شرت مقاديف الحنين
خاتاهو فوق ضل الحراز
جات المواكب
طربانه تلهج بالحروف
مليانه بالناس العزاز
والبلود بالفيها بطرانه
مطمورة ماليها الغنا
لا الفجه الفيكي عطشانه
والبحر ما كان ضنين
جات المواكب
دافره من كل الجهات
من الشرق
بالسعيه وبالحلال
وبالعروق الدمها
موية دميره
جاتا تاره من الشمال
والوشوش الطيبة
سمحات السمات
جاتك عابره
من نص الجزيرة
مشوارا يا عز العمر
خطواتا يا حر الجمر

مشتوله ارضك
يا نضيره
بالحكايات القديمة
صلينا فرضك
يا كبيرة
بالترانيم القسيمة
والصباح إسم الشمس
ساقينا نبضك
من تفاصيل الرواية
من عويناتا الوسيمة

جات المراكب
وولدك بعيد
جناك حزين
شايلك حجاب
شاقى الهويد
نص البلود اليابسه ديمه
خاتيكي في بطن الحشا الواقد حنين
كايس لي وجيهك
فى متاهات السنين
خوفو بس من الهزيمة
يا نديه
يا وفيه
يا الفي صقيعة الروح مبتقه
قايمه نيمه

داير اقول ليك
وانتي صدقي يا نديمه
حلمت يوم
إنى جوه الجنة قاعد
بي انهارا
بي اشجارا
بي ازهارا
بي انوارا والأملاك
شفت فيها المافي زول
بي عيونو شافو
ضقت فيها طعم رباك
وقفت جنب سدرة محاسنك
فرتقت بقجة أغنياتي
مرقت فرحي
لبست توبي
وشلت حجبات الطرب
قلت اتأمل بهاك
وبديت ادوبي
لقيتك احلي وديمه أجمل
والفرح إسمك براك
الصفا الجواك مكمل
يا صفيه
يا وفيه
يا حفيه
مين فينا بقدر يوصفك
مين يرسم المعنى الهناك
مين يكتبك
عطشانة محبرة المسافة
منو البرويها من كوثر سناك

جات المراكب
وقفت تغازل في الجروف
جات المراكب
كاسحة مِشرعه ومنسرحه
نزلت عليك شمس النهار
اتحكرت وسط الصفوف
وبقيتي للناس الديار
معنى الأهل
خيرا كتير
فاض انبهل
جات الخلوق ميات الوف
وصبحت تامه في لمحه
جات المواكب
ختت ايدا في صدر الخدار
وبقيتي اللامه للفرحه
والغنوات
والأشعار
الصلوات
والأذكار
الأمات
والأخوات
منارات شالعة بالأنوار
نداوة مرقة عصريه
لافحة الطيبة زي طرحه

واطاتك منابت العز
الحيران
والليحان
والنوبه
تدمدم بي هدى الرحمن
الجيران
والحبان
الفة وريدة مكتوبة

وجنياتك نحاسن يرز
دلوكه وشتم رويان
صقريه وركوز وبطان
بازمه الشكرة لى عيالك
في جاه الجنا البطران

نريدك والله زي الروح
وين ما نكون
وكيف ما نكون
ريدة اصيلة ما بتروح

ريدة على مدى الأزمان