أسئلة للإخوة الجمهوريين ، دالي

Quote: الأخ محمد الزبير * لو الأستاذ محمود ، قال عن فكرتو ـ إنها هي الحق ال ما بعدو إلا الباطل ، أو قال هي الدين ال مافي دين غيرو في الأرض دي أو قال (من كانت تهمه نفسه ، يجب أن يلزم غرزها) . * الكلام دا ـ من حقو يقولو ، وللا ما من حقو ؟! * هو شايف انو فكرتو هي الحق ، و هي الدين ال مافي غيرو ـ انت مالك ؟! * مشكلتك شنو ؟! الكلام دا حارقك وين ؟! مالو عامل ليك إزعاج ؟! هل الأستاذ ـ شال ليك سيف أو سلاح و جاك في البيت ـ قال ليك : وللا تقبل كلامي دا ، أو ح أقتلك ؟! هل قال ليك كدا ؟! * أنا ـ لمن قلت ليك الأستاذ محمود ـ طرح عليك فكرتو بأرقى أسلوب ـ فعلاً قدَّمها ليك ولغيرك بأرقى أسلوب ، ما أجبرَك تقبلها . * ما أرهبَك ولا خوَّفَك ولا قال ليك بصادر حقك في الحياة ـ زي ما بيعملوا هسي الدواعش والمهووسين ـ من الدُعاة . * كلامو قدَّمو ليك بأسلوب حضاري وإنساني و راقي للغاية ، والدكتور البروفيسور عبدالله الطيب ـ عليه رحمة الله ـ أشاد بأسلوب الأستاذ محمود ـ في قصيدتو المشهورة ، قال : لم يُجرِّد سيفاً وأصدر منشوراً وهذا أسلوبه المعهـــود وهو نهج من النِضال حضارِي بأمثاله السّـراة تســـود * دا ـ كلام الدكتور عبدالله الطيب ، في الإشادة بنهج الأستاذ محمود . * انت ـ إذا حسّـِيت بأنو كلام الأستاذ ـ فيهو قوة ، أو فيهو إجبار ـ الإجبار أو القوة ال انت بتحسها دي ـ هي قوة فكر ـ ما شيء تاني . * الأستاذ محمود ـ عاش حياتو مُسالِم ، ومُحِب للخير ونشر الخير في حياة الناس ـ ما عندو مُشكلة مع زول ولا عندو حاجة مع زول . * وفكرتو الآن ـ موجودة ومُتاحة ـ صوتياً وكتابياً ـ مكتوبة ومسموعة ـ إذا شئت قبلتها وإذا شئت رفضتها ـ إنت حُـر ـ على كيفك