Quote:
مِحَنُ العَزَّابةِ (Re: دفع الله ود الأصيل)
المشاركة الأصلية گتبها عمنا الراحل المقيم/ mahagoub
طلعته عزابى حنكوش؛ سحورك بات و حلتك حرقانة و لقمتك
تضرس من كترة الكراضيم فيها اتكامل اولادك ساى بس
ما تنسى كيس التمباك.
|
""'''''''''"')04("""'''''''''
@ أنت في كيس التمباك يا عمنا محجوب و لا في كلمة عزابة
دي ظاطا ليش بكتبوها بال(زين) رغم أنها و (عذاب الجحيم) متلازمتين
كتوأم سيامي لا يمكن فصلهما إلا بعميلة تدخل جراحي مضمون الفشل. و معلوم
طبعن ، إنو (العزوبة شر) مستطير و حبوبتي بتشبها دايماً بالبشتنة في أدق و أحلك صورها.
گدي ، خلينا من دا والنديگ خارطة طريق منطقية مؤدية مباشىتن إلى بيت عزابة سودانيين في
قلب عاسمة اللولوات و العفونيات المسلسة .المهم ياهو دا حالنا كان عجبك و لو داير تزورنا هاك
الوصف الدقيق دا، يجيبك لينا راسك عدييييل لحدت خشم بابن، تلقاه متكول بي دوقار دفار!!
@ فأولن في التبادي ، تخش بشارع العناقريب تلقى ليك محل حلويات (شامية) جنبو طابونة
( فرن أب نفاج) ؛ تمشي طوالي بلاقيك حلاق و مصفف شعر(لبناني). جنبو بتاع تدليك و حمام
(مغربي) للكدايس. و في الركن هنووك، بتاع سراميك و فسيفساء (سوري). تلف بأول زقاق تلقى
ليك شلة سباكين (نيبال)، تفطهم و تواصل، بعديهم في عمارة ساكننها لعيبة كورة أفارقة ( أولاد
قرف)، ديل ظاهرين من ريحة أباطاطم تجيب الضهبان، تكسر شمالك حتة كدا، بواجهك بيت
عمال نضافة (بنغال) جابوهم يحفرو مجاري الخريف بالنهار و و شغالين بالليل مكوجية.
و بعدين بلاقيك مقهى شيشة مليان (مصريين) مشغلين ليالي الحلمية ، و كابيةفوقيهو
شدرة نيمة منشرة مية متر، تحتها ست كسرة معاها ستشاى (حبشية) تظبط ليك
منها فنجان مدنكل و ترفع رأسك قدامها طوالي مسطبة فيها شلة عواطلية
قرفا نين لامن شامين ريحة أباطاتم و ضبان جلدهم مابيهم ، أها ياهو
ديل الوحيديين ال(سودانيين) في الحتة دي، شايف كيف!!
دفع الله ود الأصيل
فيس بوك
تويتر
انستقرام
يوتيوب
بنتيريست