حليلنا و حليلك أنت مهدينا ال«منتظر»نا فيساحة الحلة نلعب عيتنوبة و سجارة من جازاك و شليل!!
| Quote: عليك الله الزول النقر للبص . دقالو بالشلن داك لسع حي؟زول القراريص.والله يا ود الأصيل انت مفروض تكون مخرج افلام كرتون هههههههاياخ يلعن حريشك |
∆ و إتا يا عصمان ود موسى ، اصبر لي و خليك
من مزاريق أخونا المزراقي داك،و جاييك المرة دي
بي محن و بلاوي يمزرقن بالزول و هو مدنقر!!
《مشروع سندسٌ و إستبرقٌ 》
● صديقنا داقس من قدامي المغتربين قال جاتم لجنة فى بلادي برة قبل 15/20 سنة واللجنة دى طرحت عليهم
شراء حواشات فى مشروع سندس الزراعي جنوب جبل اولياء.قاللى : يازول اللجنة دى جاتنا جاهزة وشايلة معاها (بروجيكتر)
و مجسمات من المشروع وعرضو علينا أفلام بس ألف ليلة و ليلة شيء طرمبات وشيء مخططات وحظائر تربية ابقار ودواجن و نعام
و غزلان وحكاية مبهجة..و حدايقَ غلباً و زيتوناً و نخلاً و فاكهة و أبأ تحس كأنك فى (عليين)..و ما ناقصة إلا بس الحور العين.
● و بدون نقاش دفقنا كاش الضحاكات و بكايات دا هبطرش كل واحد فينا خمشة
ألوفات من الريالات يسيلن ريالة الديك و يمرقمن من خشم بيت العدو المو صليح.
∆المهم ،استلمنا شهادات بحثنا و نمر حواشاتنا وفى واحدين اشترو تلاتة و أربعةحواشات ومشينا بيوتنا مستانسين ونمنا فى سعادة بالغة واليوم داك كان جمعة و اللمة مجتمعة و انا للصباح مانمت بالفرحة وكل غمدة احلم ليك
بالموية و الخدرة و الوجه الحسن,و من شلاقتي مشيت السفارة تانى يوم اشتريت حواشتين لصق بعقض قلنا زيادة خير و ظروف
الدنيا مي معروفة ويا ود اخير ترمي قروشك فى البكماء دي بس؛ زيها مافي حاجة مفيدة ، ولا بتعفن و لا بتبور!!.
●أهاااا ، فى الاجازة صاحبي رجع السودان واول مشوار عملو طوالى لى مشروع
سندس ليطمئن قلبه. قال مشيت مبانى سندس وريتهم ورقى قالو لى تمشي مربع
رقم (... ) وده فيهو حواشتك حاتلقى بيت فيهو زول اسمو (أمحمد ودأبرق)..حايوريك
حواشتك طوالى .. دا العريف بتاع المشروع وحافظو شبر شبر .. و جحر جحر.صاحبي ركب عربيتو وطيران على المريع ..دق باب ود أبرق لقاهو فاتح ..عاين لى جوة لقى زول لابس فنيلة وسروال وقاعد فى عنقريب هباب وقدامو كباية شاى وبلف فى سجارة بنقو و مكرش لكن كملان من لحم الدنيا ما تفرزو ود أبرق من (عشوشة) قال سلمت على الراجل
(حق الله الباقي الله) و قلت ليهو انا جاي عاوز أقابل الأستاذ ودا أرق لو سمحت؟ قال ليهو وصلت تب حبابك 10 برا كشرة ؛ ياني أنا زاتي القدامك ده..
~ المغترب المدقس: بي فلهمة كدي:حقيقتن و الله أنا جاي عاوز أشوف حواشتى..
~ ود ابرق: أها و عاوز تشوف فيها شنو آللخو؟
~ عاوز أشوف الموقع وبعدها عن الترعة والخدمات الموصلة ليها والحاجات دى يعني!!
ضحك ود ابرق حتى بانت نواجذه و انتفخت (لهاته). شوف يا اخينا ياها الواطة القدامك الفاضية دى فيها حواشاتك و الترعة دى ما وصلت و ما ظنيتا توصل قبل يوم القيامة.
~ ياخ انا باعو لى حواشات فى مكان مميز و دفعت دم قلب زيادة على الأساس ده...
وقالو الحتة دى الترعة واصلاها و ممكن تسقى من (الميجر) طوالى بالناكوسي!!.
~ ود أبرق: و هسي أنا دايرني اسوى ليك شنو مسلن ؟!!!علي الطلاق يابن العم ،
إذا عاوز تسقى حواشاتك دى إلا تسقيها من البحر بى جردل ..والبحر من هنا 3كيلو
¶ بلا ، وشوية صاحبي سكريهو ارتفع وضغطو ارتفع والبولينا ارتفعت وبقى يرفع فى كراع
و يخت كراع وقال لى ود أبرق عندكم حمام هنا ، دايرين نتسير ونكطع الجمار!؟
~ ودابرق : أمشي بول فى السهلة ديك ساكت حمام شنو يابن العم ..«بول وتعال تلقانا نحنا يانا نحنا..لا غيرتتا ظروف و لا هزتنا محنة .. و يا ترابتا و يا سرابنا يا خرابنا ..ياهبابنا و يا قمحنا»و قنب أخد ليك نفسين هدى اعصابك و روق المنقة شوية . باين عليك من شكلك مكبر الحبة قبة
∆صاحبنا بال ورجع لى ود أبرق وقال ليهو خلاس أنا ماشى مع السلامة.
~ ود ابرق : وبالنسبة لى ريالاتك
~صاحبي : الله يعوضنى فيهم صاحب العوض النافع ..
~ ود ابرق : والله انتو فارات خلاس...قال (ميجر)
قال...(ياخ شاحد اللع يجروك لى ورا).
∆ المفردات لناس الشهادة السودانية:
*ميجر : يعني الترعة الرئيسية
* يجروك لى ورا : كناية عن الخروف
وفى رواية أخرى حينما( تنفق ) أي
تموت البهيمة تنجر رمة من ضنبا.
ملفوووح من خشم االضحية
مباشرتن, و بتصرف بسيط..
و لينا حق السلبطة في حقوق التأليف ، الطبع
و النشر!! ودي من حكاوي بلدنا في كل حلة برمزبتها العريضة و عجائبها التي لا تنقضي!!
ود الحيشان التلاتة
مؤذن في مالطة
.
دفع الله ود الأصيل
فيس بوك
تويتر
انستقرام
يوتيوب
بنتيريست