علاقتي بالإخوان الجمهوريين !

مرحبا Guest
اخر زيارك لك: 06-21-2024, 03:07 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف للعام 2020-2023م
نسخة قابلة للطباعة من الموضوع   ارسل الموضوع لصديق   اقرا المشاركات فى صورة مستقيمة « | »
اقرا احدث مداخلة فى هذا الموضوع »
07-25-2022, 02:17 PM

الصديق الزبير
<aالصديق الزبير
تاريخ التسجيل: 04-14-2021
مجموع المشاركات: 375

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: علاقتي بالإخوان الجمهوريين ! (Re: محمد الزبير محمود)

    السلام عليكم
    محمد الزبير
    كل عام وانتم بخير
    ***
    * ياخي لاحظتَ انك مهتم شديد بالفكر الجمهوري ، وكلما جات سيرة الجمهوريين وسيرة أستاذهم ـ هنا في المنبر ـ إنت بتكون من أول المشاركين .
    * دا دليل على انو فكر الأستاذ محمود عندو أثر في نفسك ـ بصورة أو بأخرى .
    * مالك ؟! الشاغل بالك شنو ـ في الفكر الجمهوري ؟!
    ***
    * أنا ـ عايز اقول حاجة ، عني بصفة شخصية ـ أنا ال قدامك دا عندي قناعة راسخة بـ انو (الفكرة الجمهورية هي الحق ال ما بعدو إلا الباطل) .
    * دا يقين وقناعة وصلت ليها ـ وطبعاً ما عايز اقول ليك سلّـِم بـ كلامي دا ، ممكن تعتبر دي وِجهة نظر ـ من حقك تقبلها ، ومن حقك ترفضها ـ إنت حُر ـ على كيفك .
    * فكرة الأستاذ محمود ـ هي الحق ال ما بعدو إلا الباطل ـ و جذور الفكرة دي إنسانية ـ ما دينية بالمعنى المعروف عندنا في الدين ـ هي إنسانية ، بتتكلم عن الإنسان من حيث هو ـ بإعتبار أنو الناس أبوهم واحد وأمهم واحدة و ربهم واحد ـ دي الجذور ال بتنطلق منها فكرة الأستاذ محمود ـ و هي جذور بتتخطى العقيدة وبتتخطى اللغة أياً كانت .
    * عشان كدا هي إنسانية ـ بتتكلم عن الإنسان وعن كرامتو ـ بصرف النظر عن اللون والعرق والعقيدة .... الخ من الإعتبارات الثانوية .
    * بس الأستاذ محمود ـ ألبسها ثوب الدين ـ ثوب الإسلام ـ و دا ـ من وِجهة نظري ـ كان من أقوى الأسباب ال أدت لخلق العداوة والكراهية والأحقاد ـ تجاه الأستاذ محمود ـ من المهووسين وأصحاب النفوس المريضة ـ في بلاد المسلمين .
    * والأستاذ محمود ـ كان ممكن يتخذ أساليب تانية ولغة تانية ـ لتوصيل الفكرة الكبيرة دي ـ من غير ما يدخل في صراع وفي صدام مع أي زول ـ ديني أو لا ديني ـ لكن لأنو كل صاحب طريقة هو محكوم بطريقتو .
    * العداوة والكراهية جات للأستاذ من مِلة المسلمين ـ في الشرق الأوسط تحديداً ـ من علماء الشريعة الإسلامية .
    * لكن ـ في بلاد أخرى من العالم ـ الفكرة الجمهورية ـ الآن ـ تُناقش في أكبر المنابر و دور العلم ـ في الجامعات الأمريكية والأوروبية .* و عُمِلَت فيها بحوث ورسائل ماجستير و دراسات عليا .
    * لكن ـ عايز اقول ليك انو : الأستاذ محمود محمد طه ـ صوفي ، صاحب تجربة شخصية في التصوف ـ وهو قال الكلام دا بنفسه .
    * والصوفي الحق ـ بيكون صاحب شريعة فردية خاصة بيهو ـ في علاقتو بالخالق ، وفي كيفية معاملتو للخلق ، وفي أسلوب طرحو لأفكارو .
    ***
    * وبخصوص إهتمامك الشديد بالجمهوريين وبالفكر الجمهوري ـ عايز اقول ليك : لو عندك أي إستفهام عالق في ذهنك وشاغل بالك ـ في فكرة الأستاذ محمود ـ أرجع لمؤلفات الأستاذ محمود واستمع لمحاضراتو ـ ح تلقى إجابة لأي سؤال يكون مؤرقك أو شاغل بالك في الفكرة .
    * ولو ما لقيت إجابة عند الأستاذ ـ ح تصل للإجابة ال إنت بتبحث عنها ـ بنفسك ـ بنفسك ح تصل للإجابة ال انت عايزها ـ ما ضروري تلقاها عند زول تاني غيرك ـ لو مفكر أو شخص عادي .
    * بس الشرط انك تكون فعلاً طالب حق ، ما طالب جدل ومناقشات ، وصاحب غرض ـ (الغرض مرَض) ـ الغرض بيعميك عن الحق .
    * والصوفية ديل ـ هم أشبه بالأنبياء ـ ما أنبياء لكن في نفس الطريق ـ بس الفرق فرق درجات .
    * وكل واحد فيهم بيعبر عن الحقيقة المطلقة ـ بـ لُغتو وبأسلوبو المحكوم بطريقتو الخاصة بيهو في العبادة ـ لكن الأرضية ال بيرتكزوا عليها واحدة .
    * والحقيقة المطلقة ـ هي الذات ـ (ذات الله) ـ مطلقة من أي قيد ـ وما ممكن إدراكها أو الإحاطة بيها لا عن طريق اللغة ولا التصور الذهني .
    * هي فوق اللغة وفوق التصور الذهني ـ الذات محجوبة بالإسم وبالصفة وبالفعل .
    * اللغة عند الصوفية ـ حاجز وحجاب عن إدراك الحقيقة المطلقة ـ عشان كدا بيصلوا ليها عن طريق الإحساس ـ عن طريق القلب ـ ما عن طريق اللغة والعقل .
    * و دا الفرق الأساسي بين علماء الحق ، وأدعياء الحق .
    * (الدين شعور وإحساس) ـ ما فكر وجدل وحفظ نصوص .
    * فـ عايز اقول ليك انو : شرط الوصول لليقين دا ـ هو صفاء النفس ، وصدق القلب في طلب الحق ـ لو عايز تعرف حقيقة فكرة الأستاذ ـ نضِف نفسك من الوسخ ومن الغرض ، وخلي قلبك يكون سليم وصادق في طلب الحق ـ وتاني ربنا كفيل بأن يبين ليك الحق من الباطل .
    * لكن لو غايتك الجدل وهزيمة الفكرة الجمهورية ، وتفنيدها بالحجج والمعتقدات الموجودة في راسك ـ كدا ح تكون لافي في حلقة مُفرغة ـ طول عمرك ، ما ح تصل لشيء .
    * الفكرة دي عتيدة ـ مرتكزة على القرءان المكي ـ القرءان الموجه فيهو الخطاب للناس كلهم ـ من حيث هم ـ وفي أي مكان ـ وعلماء الشريعة الإسلامية ال انت أخدت ثقافتك الدينية منهم ديل ـ الفكرة دي ما بيقدروا عليها ولا بيعرفوها ولا بيفهموها ـ أساساً ـ الفكرة في وادي ، و هُم في وادي تاني .
    * ولو ما عاجبك أسلوب الأستاذ محمود وما عاجبك كلامو ـ ما ضروري ، شوف غيرو ـ في مفكرين تاني غيرو في العالم ـ الآن ـ عندهم مؤلفات ومحاضرات ـ ممكن تطلع عليها وتشوفها .
    * في كاتب ومفكر ألماني ـ اسمو إيكهارت تول ، وفي المفكر الهندي وحيدالدين خان ، و مفكر آخر اسمو كريشنامورتي ـ ديل كلهم أصحاب حقائق ومرتكزين مع الأستاذ محمود محمد طه ـ على نفس الأرضية ال هو واقف عليها ـ لو ما عاجبك فكر الأستاذ محمود ، شوف مؤلفات الجماعة ال ذكرتهم ليك ديل ـ ح تصل للشيء ال إنت بتبحث عنو ، وقد يكون في ناس تاني غيرهم ـ موجودين الآن ـ في العالم ، أو في التاريخ الماضي ـ ما معروفين .
    * المهم انك تصل للحقيقة ـ لو بأي سبيل ـ لو انت فعلاً طالب حق ـ ما شرط الطريقة تكون كيف ـ الشرط فقط هو : صفاء النفس ، وصدق القلب ـ في طلب الحق ـ دا الشرط الأساسي .
    * غير كدا ـ ما ح تلقى شيء ـ وين ما تقبل ح تلقى الباب مقفول في وشك ـ ما ح تصل ليقين راسخ .
    * ح تكون شايل أفكارك ومعتقداتك الموجودة في راسك دي ـ عن الدين ، وعن الله ، وعن الحياة ـ ح تكون شايلها في راسك وحايم بيها كدا طول عمرك ـ تناقش وتجادل وتتفلسف ـ وإلى ما لا نهاية ـ لا بتقنِع ولا بتقتنِع ـ تضلل نفسك وتضلل ال بيقتدي بيك .
    ***
    * أنا ـ ال قدامك دا ـ ما جمهوري ، ولا عندي أي علاقة بالجمهوريين ـ ولا منصّـِب نفسي مدافع عن فكر الأستاذ محمود محمد طه ـ لكن دا يقين وقناعة شخصيةـ عن فكرة الأستاذ محمود ـ نقلتها ليك ـ وانت حُر ـ على كيفك ، لا داير أجادلك ولا داير أقنعك بـ شيء .

    (عدل بواسطة الصديق الزبير on 07-25-2022, 02:42 PM)






                  

العنوان الكاتب Date
علاقتي بالإخوان الجمهوريين ! بدر الدين العتاق07-25-22, 03:04 AM
  Re: علاقتي بالإخوان الجمهوريين ! محمد الزبير محمود07-25-22, 06:59 AM
    Re: علاقتي بالإخوان الجمهوريين ! الصديق الزبير07-25-22, 02:17 PM
    Re: علاقتي بالإخوان الجمهوريين ! بدر الدين العتاق07-25-22, 08:50 PM
  Re: علاقتي بالإخوان الجمهوريين ! Yasir Elsharif07-25-22, 12:31 PM
    Re: علاقتي بالإخوان الجمهوريين ! محمد الزبير محمود07-25-22, 02:54 PM
    Re: علاقتي بالإخوان الجمهوريين ! Yasir Elsharif07-25-22, 04:24 PM
      Re: علاقتي بالإخوان الجمهوريين ! السر عبدالله07-25-22, 04:52 PM
        Re: علاقتي بالإخوان الجمهوريين ! Yasir Elsharif07-25-22, 07:29 PM
          Re: علاقتي بالإخوان الجمهوريين ! صديق مهدى على07-25-22, 09:40 PM
            Re: علاقتي بالإخوان الجمهوريين ! الصديق الزبير07-26-22, 05:04 AM
              Re: علاقتي بالإخوان الجمهوريين ! MOHAMMED ELSHEIKH07-26-22, 06:44 AM
      Re: علاقتي بالإخوان الجمهوريين ! بدر الدين العتاق07-26-22, 00:25 AM
    Re: علاقتي بالإخوان الجمهوريين ! بدر الدين العتاق07-26-22, 00:23 AM
      Re: علاقتي بالإخوان الجمهوريين ! السر عبدالله07-26-22, 02:30 AM


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
 اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين 		News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de