المليونيات .. تواريخ في نتائج حائط ..

Quote: كتب الواثق طه في ناس كتار بتسأل إنه المليونيات دي آخرها وين و هدفها شنو، المليونيات دي يا عزيزي لولاها لكان العسكر اتوهطوا زمان في الحكم، لولاها لإستطاع العسكر تشكيل حاضنه سياسية و حكومة من الإدارات الأهلية و جماعة إعتصام الموز، لولاها لما كانت الأليه الثلاثية و من خلفها اغلب دول العالم تسعى الآن لإيجاد حل لإنهاء الإنقلاب، المليونيات دي الخلت العسكر يبلعوا كلامهم و تهديداتهم بالإنتخابات المبكرة، و هي الخلتهم يعرفوا حجمهم الحقيقي و إنهم بكل عتادهم و قوتهم و دعم الحركات المسلحة لهم و وقوف دول المحاور بجانبهم ما بيقدروا يحكموا الشعب ده لو انطبقت السماء مع الأرض ، المليونيات يا عزيزي هي عباره عن مقاومة مستمرة تمنع الإعتراف بسياسة الأمر الواقع من قبل أي شخص أو جهة مهما كانت منو، المليونيات أبداً ما هدفها إنه يحصل إنقلاب جديد على العسكر الموجودين حالياً و يجوا عساكر بدلهم، بل هدفها إننا نجبر العسكر على تسليم الحكم للمدنيين غصباً عنهم، لولا المليونيات لكان العسكر روجوا إنه السودان مستقر و ينادوا بالدعم الدولي للسودان، و لولاها لكانت دول المحاور صدقت إنه برهان و حميدتي و توابعهم من الحركات المسلحة قادرة على إدارة و حكم السودان، مما يعني إنه الإقتصاد حيستقر و إنهم بيقدروا يستثمروا في السودان، المليونيات بإختصار يا عزيزي هي الفاصل و المانع الوحيد إننا نرجع لعهد الكيزان و يضيع تعب التلات سنه الفاتوا بكل الدماء الانسكبت و الارواح الطاهره الفارقتنا، المليونيات دي النار الحتنجض لينا شغلتنا، و هي الوحيدة القادرة على تركيع كل من تسول له نفسه بإنه صاحب و مالك البلد دي غصباً عن شعبها. و لابد أكيد و مهما طال الليل ضناهو الفجر جاي وضياهو عيد و نعود عزاز زي مامضى و نفوسنا يرويها الرضى و ضميرنا تملاهو الحياة و تشرق شموس الأغنيات