عمل حسابك من أب عراقياً مقدود.

إتا يا مهدينا منو البقدر يجاريك في السجعان
علا غايتو هاك دي محاولة زي شعر ود العيلفون.
(رحلت .. و جيت)
∆ گلا ، بل أنني رُحتا و لسة ما إتلقيتْ ,
.. و في بعدك لقيت كل الأرض منفى!!
و لما رجعت جيت لقيت حتى الطيف رحل خلَّاني
و أمل التمرجية بقت (مؤتمرجية)و عريسا أكبرمقاول مباني،
من حتة بياع ترمس و كبكب و دخن الدخدخاني(أكل الحمار و العاني).
و الساحر و الأطفال مرق و لحق ناس حامد التايب و بلة الغايب في الركايب
و (جانا كلب سنونو صفر حلب الناقة بالسنقاقة.أم تفة وقعت في البير و صاحبّا
واحد خنزير. و أم سيسي الفار بقت أغلد جقرن حفار. و ناس إلهام و سهام و عنايات
كانن غنايات؛ و هديلك كبرن بقن ناس خالتو جولكينات. و طه القرشي القالو عليه شهيد
باقي لسة مريض و الهاشم في العيد نفوه هناااك بعيــــد،و جندينا المجهول بقى(مرزتقة)
كطاع طرق و گمان أخطر عربيد..و ناس الدلاهة ظعيك و معيط هدبلگ ماسگين الساحة.

∆زيدان الكسلان ركب موجة أغاني أغنا.. و علق نجمة مطرب فنان؛
و من ديك و عيييك؛ ودَّع حرمان من حيث أتى. و حتى أبو الدرداق اللي
هو (أبو الجعران) مرق زهجان .. و هجــر الأوطـــان. عمك منقو زمبيري
بعدما قام براه أتشالق و فرز عيشتو هداك هيمان حيران و لي هسي
هداگا مسافر ما وصل أهلو و ندمان للكان، و على حقو الرايح في
الرجلين ما بين سلفا و مشار و باقان و عرمان. و بهنا الكان ضبلان
أصبح ترعان. و الكانو رجرجة و دهماء بقو ليك وجهاء و زعماء
لنگاح الزهراء. و عمك تنقو الفي مجلة الصبيان ، كان عامل فيها
دلدول متل بهلول في إسطن/بول ، يا زول دا ما بقى واحدن
مسعول، في الحلة يصول و يجول و وراه طبول.
و هييي لبلب و كم في الخت؟! أها ما ستة؟!
ما يلا خلاس ، بس تشد و اركب!
∆ومين علمك يا فراش تعبد عيون القاش؟
الخضرة في الضفة وهمس النسيم الماش؟
مين علمك يا فراش مين علمك يا فراش؟
على حمرة الوردة و حب الندى الرقاش
باكر بعود القاش ترجع عيونو حنااااااان
و تطير تداعب الموج بجناح نسيم ريان
لكني لو زيك لوجاب حبيبي زمان.. ما
أظن أعود يا فراش لزول نساني وخان
بالله ليه يافراش خلاك وراح القاش!؟