|
|
 Re: قمــرية قالـت للتــانيـة مـالـك .. إنتي لس (Re: يحي قباني)
|
مسدار القمرية **الفرجوني
*****************
الليله البلوم طربان اقوقي وانوح
وميذان قلبي اصبح من مكانو مفوح
علي بهما" لوين بي النتيل مسوح
لي شوفتو ترد الروح قبل ماتروح
الليله البلوم طربان يقوقي ويصيح
والعاشق ينوح لاما" صباحو يبيح
عناب الحجاذ فدع قصونو بميح
ترا الحارق حشانا ولي قلوبنا مسيح
ي قميرية نغمات الغرام ذيديهن
وسوي القوق ونماتك عقب رديهن
علي بهم النديمات ام قفر واديهن
ليهو سلامي والشوق ي ام جناح وديهن
انذلي فوق فريع قبل الفريق ي نايحه
وكتري في الطنين متل الحواره الرايحه
مربوعه بنات لينة ورطينة ومايحه
قوليلا السلام ليك ي ام ضفيره سايحه
قوليلا العشوق تعبان اذاهو مطول
يات من شافو اصبح في العليه متهول
عشان عيونك مباري البي القفار متجول
لكن لي الممات من عهدو ما متحول
كل ماشاف برق في القبله يشلع وجه
واتقافي المنام من عينو ياخد لجه
نيران الجحيم ليهو في الفراش منفجه
دكتور الغرام مع اهلو عامل حجه
قال مرضان هواك لي شفاهو مافي طريقه
في كبدو الحراب في جوفو باقه حريقه
قط ماليهو علاج غير اقرطع ريقا
والا يمددوه ويمسحو بي عريقا
طارت مني قمرية المحبه وقفت
نافضاهن علي بلد الحبيب خفت
براي خلتني ذي جاهلا يتيم اتلفت
تقطر عيني بالدمع الروية اتصفت
قمذت وصفقت وضربت هوايا فوق
وخلست بي رشيشا اصلو مو ملحوق
ناقصاهن قلب والدا روف وشفوق
شاهد في المنام دم الصغير مدفوق
قط لا اتصددت لا اتصنتت لي قوق
وسوت لي الهبوب لفح الهدم مشفوق
هوت بي صقيعا منطرح ياقوق
في شوقو البعير متل الخلال مدقوق
الصقر المضر ال لاحسب لاراعا
لي مركبن غرامي الجبدولها شراعا
شافا وانعدل ختف الجناح بي سراعا
اتجمع تقول حرحافا ماضي ضراعا
ي صقر السواد عينك تشوف الابره
يخرخر ماها جدول لاتطيب لاتبري
جناحك بي حديد شركا سريع في الهبره
يردخو للكتف ردخا منافي الجبره
علق فوق تقول نجمه وهجع شاتيها
جاها مخوي متل الصاقعه متواتيها
هيق لي الكفت لكن وقع خاتيها
قيع وانعدل عقان سبح بي تيها
حست بي هواهو اندلدمت وانصرت
وانمبرمت متل مترار فلانة الترت
هوت بي الصقيعه تقول نجمتا" خرت
وخوت جو تقول طنوب وجيبت درت
غتست في السماء وقطعت سبيبه الشوف
عقب اندسقن لي الارض بسوا" فوف
وهي بتنصر منو غادي بتسو رحيل الخوف
كبدو انسل دم داير اقصر قيدا
وهي بقت تحوت في المكر رقيده
من ربط الحبيل تب فضلتو عقيده
مقطوعه النصيب دخلت طريتو عقيده
نذلت فوق كتير اتركبت في فروعا
كلها تتجرف من السفر والروعه
قالتلو القدام قالو الارض مضروعه
وكان ماصب مطر مابنتت المضروعه
غير اليوما تام قط مابتموتلك صيدا
والبجدعا القدر قطعا حربتو تصيدا
معلوم في المقانص تربح الرصيدا
والنوم لي القماح ام الذرع حصيدا
علق يسوي جاك لامن شميشتو انجمعت
وضحكن من قماحو بروق قبلتو ولمعن
حنت لي القميرية سحيبه ماعت ودمعت
وقت الليل برد في الوعره ناو انسمعت
طلعت فوق فريع من الهبوب لواج
وجدعت شوقا بي صي البروق وجواج
رضيت بي سقط زيفه انطلق سواج
وقالت الزيف اخير لي من اضافر ابعاج
كل الليل تهلع عدتو القمرية
من ابعاج مبيته في مخافه ورية
قبل القبله تشرب وغبشتا البدرية
صبحت دارها خالية ترا السفر باكرية
حصلت الفريق واتبارو ساعه النافله
نظرت في البنات من غير حفل والحافله
لقت في محبوتي كفل ام سبيبه الجافله
وعنق اللريل وعيون الجدية الغافله
نذلت فوق فرع سيالته تبلي تنين
مراتا ترددلك نغيمها حنين
مراتا تسوي القوق معاهو طنين
يطري الذول حبيبا" منو ليهو سنين
محبوتي سمعت وفهمت نمة الغناية
ونظرت ليها بي عيون التملي تنايه
دميعة ذي نداية مقده متناية
قطرت بي الخديد متبعه مي وناية
قالت لي كيف حالو ي قميرية
تبقي علي العلي حمة عضام نارية
بتذكرني عن ساعه الهجعة وبقول ياريا
ولانساني وبقيت عندو ما مطرية
كل ما اطراهو ي قميرية ريشات فوادي يقرن
تقول عقد انقطع يجرن دموعي يترن
قلبي مرات يجر مرات يقيف اتحرن
واحس بي تياب جمر فوق لي عضاي انشرن
يعلم خالقو ي قميرية قلبي بريدو
فكري معاهو رحل شال المنام فوق ايدو
الشوق العلي ذايد تملي جديدو
والريد العلي فات العبار تحديدو
روحي ليهو ي قميرية احكي الحاصل
وقوليلو الشوق ليك ليل بالنهار متواصل
قوليلو المنام بقي بالسهر متفاضل
قوليلو كفاك نجيع عود لي ديارك واصل
روحي وسافري قميرية الله يعينك
ومن عقب الطريق مولاي ابقي ضمينك
جمعي في هواك بالشمال ويمينك
لما توصلي سيد حياك وفيهو بتنوم عينك
انا تعبته من الكتابه ومابقدر اعلق عليكم هسي ****
/
|
|
 
|
|
|
|
|
| العنوان |
الكاتب |
Date |
 قمــرية قالـت للتــانيـة مـالـك .. إنتي لسه في عز جمالك | يحي قباني | 06-05-22, 08:56 PM |
| Re: قمــرية قالـت للتــانيـة مـالـك .. إنتي لس | يحي قباني | 06-05-22, 08:58 PM |
 Re: قمــرية قالـت للتــانيـة مـالـك .. إنتي لس | مصطفى نور | 06-06-22, 02:12 PM |
| Re: قمــرية قالـت للتــانيـة مـالـك .. إنتي لس | مصطفى نور | 06-06-22, 02:17 PM |
| Re: قمــرية قالـت للتــانيـة مـالـك .. إنتي لس | مصطفى نور | 06-06-22, 02:19 PM |
| Re: قمــرية قالـت للتــانيـة مـالـك .. إنتي لس | مصطفى نور | 06-06-22, 02:23 PM |
| Re: قمــرية قالـت للتــانيـة مـالـك .. إنتي لس | مصطفى نور | 06-06-22, 02:27 PM |
| Re: قمــرية قالـت للتــانيـة مـالـك .. إنتي لس | مصطفى نور | 06-06-22, 02:32 PM |
| Re: قمــرية قالـت للتــانيـة مـالـك .. إنتي لس | مصطفى نور | 06-06-22, 02:34 PM |
| Re: قمــرية قالـت للتــانيـة مـالـك .. إنتي لس | يحي قباني | 06-07-22, 01:06 PM |
| Re: قمــرية قالـت للتــانيـة مـالـك .. إنتي لس | Ahmed Khalil | 06-07-22, 07:08 PM |
| Re: قمــرية قالـت للتــانيـة مـالـك .. إنتي لس | يحي قباني | 06-07-22, 10:14 PM |
|
| |
مصطفى نور
فيس بوك
تويتر
انستقرام
يوتيوب
بنتيريست