@ خَمايرُ سَوْدَنَةٍ/

@ مواقفُ و شطحاتٌ لأبعاج أخوي دراج المحنπ
: دفع الله ود الأصيل)

(33)
// الزهور و أنت نايم//
كنت وعدت حبيبنا الغالي/ ود الجزولي بآخر شطحة
من شطحات أبعاج أخوي دراج المحن. و لعلها لن تكون الأخيرة،
طوال مسيرة رجلٍ كان ( سيد البلد) طول بعرض، و اللي تقدر تقول:
كان تمساح الدميرة اللي لمان غاب جات تقدل فيه (الورالة). لحدت ما قربت
تروِّحنا في شربة موية. لحدت ما تاني جات شلة العسكر ينقذوها من كبوتها .
وعشان نفضل نحن إن شاء الله معلقين في نفس الطوطحانية ، حتى إشعارٍ آخر أو إلى
أن يرث الله الأرض و من عليها. الشاهد أنه ذات يومٍ كان راعينا / أبعاج منهمكاً في قراءة
خطابه الشهري لمكاشفة رعيته.لدرجة أنه نسي نفسه هو ظاطو وين و راح مولِّع ليك سيجارته
(زنُّوبيا) الكوبية جوة الأستوديو. لحدت ما الدخان عبك و ضارى وشو بقى ينشاف دهمة ساي متل
عفريتة الفلم. فقام مخرج التلفزة بانفعال غيرمقصود يكورك قال ليه: لا لا يا سيادتك التدخين هنا ممنوع
و نحن قاعدين نصور على الهواء الطـلق مباشرة!! فرد عليه الريس بطريقته العفـوية المـألوفة في (العـك
و التلبيخ) خصوصاً، لمن عينو تفارق ورقة النص المكتوب و يقعد يجبِّد في شلاضيمو (متل ديجانقو و ترنتي
الجبار) و يبدا يبرطع خبط عشواء ، و قد تنبيه في تلك الأثناء لوجود طفاية سجاير موضوعه أمامه على الطاولة
فقام زجر للمخرج قال ليه: و طيب و كتين مانعين التدخين هسي خاتين لي الطفاية دي قدامي لي شنو؟! لمخرج
شلكو رباطابي زهجان، فرد ليه بآخر نفس: و طيب لو ملاحظ سيادتك هديك برضو في باقة زهور اصطناعية
في حداك على نفس الطربيزة. فهل تفتكر دا بيعني إنو خاتنها ليك عشان تشمها؟!و لا دي كولَّها مجرد
رتوش لتكملة ديكور الأستوديو عشان نقدر نخارج ليك خطاب مكاشفتكم دا بصورة تليق
و تريح شوية عسى و لعلها تفتح نفسالشعب الصابر و قرفان ماسكو طمام بطن
مزمن لو جمعو ليه ليمون جناين الباوقة مع أبو جبيهة ما يروحو منو؟!
******************************