+اللَّهمَّ إنَّا صائمونَ/

عادة (حميدة) كادت أن تندثر...
(ألا أدلكم على خصلة إذا فعلتموها تحاببتم....
أفشوا الغمت بينكم......)
(رواه مسلم... وأنا زول مسلم...) ما تمشوا بعيد تفتشوا في صحيح مسلم...
الغمتة عادة سودانية حميدة جدا ومنتشرة.. ولو أنها قلت أو تكاد أن تختفي في السنين
الأخيرة ..أو ربما تحولت من شكلها التقليدي القديم وأصبحت تأتي في شكل تحويل بنكك
أو رصيد أو (شيرنق) في الزنقات بين الإخوان و الأصحاب أو الزملاء....
وللغمتة طعم ومذاق خاص إذ أنها بتجيك أحيانا وإنت في أمّسَ الحوجة..
وخجلان تشحد و تطلب قريشات من زول حتى لو كان قريب منك شديد.. حتى لو كان اخوك..
ف (بجي) يغمت ليك.. لمن ترتاح إنت ذاتك.. وتشعر بإنتشاء وفرح يلامس عنان السماء....والأجمل
في الغمت دا انك بتكون ما عارف (المغموت) ليك كم في حال الغمت المباشر !!! . فتبتدي تسرح في
حلحلة المشاكل وتخطط للمشاريع الممكن تحققها بقيمة الغمتة دي .. وتكون متشوق للحظة الحتعرف
فيها غمتو ليك كم ؟..
∆ ودا ما بيتم إلا بعد مفارقة الزول الغامت ليك... (معقولة تحسبا قدامو طالبو انت... ؟)
تتعدد أشكال الغمتة. أحيانا تجي في شكل .. حاجة كدا تحت المخدة ودي بتكون دايما في
حالات المرض أو ود الطهور أو الولادة .. ونحو ذلك.. وغالبا ما تكون حصيلتا جامدة .. لأنو
المخدة دي ما بتترفع إلا نهاية اليوم..... أيضا الغمت المباشر ودا في حالات وداع المسافر
. . او مجاملة في فرح او مصاب أو حدث له مكروه .. أو شي من هذا القبيل..
مرات في غمت ساي كدا بس محبة في الله !!
∆ ربما يكون المغموت له ميسور الحال وما محتاج لي غمت إلا أنه الواجب....
ومن ابهي صور الغمت هو الغمت للأطفال في الأعياد والمناسبات.. غمتة صغيرونة
كفيلة بإدخال السرور في نفوسهم.. وما أروع فرحة الأطفال (مرات الأم والأب بيستولوا
عليها) المؤلم في الأمر إنك تمر بحدث يوجب عليك أن تغمت وتكتشف إنك إنت ذاتك
محتاج يغمتو ليك.. (محرجة ياااخ)
[} واوعك تزور مريض في مستشفى تقوم تشيل معاك حلاوة وللا فواكه...
اغمت ليهو حق الحاجة دي ولو بسيط... فيمكن أن تساهم هذه الغمتة في شراء دواء.....
أغمتو لبعض و أكثروا من الغمت فالغمتات توثق العلاقات...وتديم المحبة والود بينكم..
طبعا هناك غمت بين الرؤساء والزعماء السياسيين.. من واجب الإخاء والمحبة.. برضو.
المهم أغمتوا لبعض حتي تدوم المحبة بينكم وما تنسوا تغمتوا للاطفال والأرامل والأيتام
هذه من موجبات دخول الجنة والعتق من النار
وما تنسونا من صالح الدعاء..
[} (أغمتوا لينا معاكم دعوة كدا خاصة بمناسبة العيد بظهر الغيب...)
لكم الود وبالله التوفيق..