العبارة (القزمة) دي اتكررت كتير في الأسافير والواقع وبقت مبتذلة جدا جدا وتجيب طمام البطن والكاروشة وكل امراض العصر .. وعليه يا إما يكون القصد منها تهديد وشخصيا ما شايف فيها أي تهديد لانو ببساطة شديدة جدا اذا لم يخسر المنفصل فبالتأكيد لن يخسر المنفصل عنه أو ممكن تكون دي رغبة حقيقية وفي الحالة دي يستحيل التعايش والعيش مع مخلوق ما عايزك وبتربص الفرص عشان يتخارج منك لأنو ح يفضل يزن ليك بالحركة دي صبح ليل .. ليل وصبح وانت تبطل شغلك وتقعد تحاحي فيهو كأنو طالبك حاجة أو لو فات منك بقفل عليك الهواء وح يجي يوم لو قلت ليهو السلام عليكم ح يقول ليك (انفصال بس) ويبقي ليك زي اللخو أردول لو عاينت ليهو ساي يقول ليك دي عنصرية منك وممكن يلاقيك ما يعجبو شكلك يقول ليك انت عنصري، واحتمال لو لقي الشاي مسيخ يقول لأقرب زول جنبو دي عنصرية . يعنى يا يعمل العايزو هو غصبا عن عين اي حاجة في أية حاجة يا اما كمان لو قلت ليهو غلط يرفع ليك كرت العنصرية القاعد يلوك فيها زي العلكة الرديئة، طبعا هسة الكرت بتاعو دا اتحرق تماما بعد ما الدنيا كلها كشفت نومتو وعرفت حركتو الطفولية دي ولم يعد احدا يعبأ بصراخه حتى أقرب الأقربين واظنو هسة عاكف على صناعة فزاعة جديدة يمشي بيهو أمورو.. خخخخ نهايتو أنا شايف أي جماعة عايزين ينفصلوا يفتحوا ليهم الباب ضلفتين ويدعوا ليهم بدرب السلامة وأن يعيشوا مرتاحين في وطنهم الجديد وأعتقد كدا الأمور تكون كويسة خالص للجميع والناس تعيش في هناء وكل جماعة بما لديهم فرحين وما مصدعين خخخخخخخ نعم دا كلام صاح وعن نفسي أؤيده تماما على الأقل من باب ( الببيعك بيعو) وعشان الدنيا تبقي حلوة ........... الحل الآخر والأحسن انو المخلوقات السودانية تهجس في الواطة دي وتعتبر أي حتة تراب في السودان الواسع دا ملكها زي ما هي ملك غيرا وبناء عليه يبطلوا العوك عاك دي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة