الطاقة الشمسية هى كلمة السر

Quote: منقول من الفيسبوك: Quote: بالأرقام: مقترح بسيط و غير مكلف لحل ازمة الكهرباء كلنا سمعنا كلام وزير الطاقة عن انه البلد محتاجة ٣ مليار دولار عشان قدرة التوليد تزيد بالطريقة التقليدية لكن دا معناه انه ازمة الكهرباء ممكن براحة تستمر تاني ٤ سنوات لي قدام لحدي ما نلم المبلغ دا و المحطات الجديدة دي تشتغل ولو افترضنا انه انقطاع الكهرباء نهارا لمدة ٦ ساعات بيخصم ٥٪ من الناتج الإجمالي المحلي للسودان دا معناه انه السودان ممكن براحة يخسر ٧ مليار دولار خلال ال ٤ سنوات دي!!!!!! طيب يا وزير الطاقة في مقترح استثنائي افضل من انتظار الطريقة التقليدية و بكلف فقط عشر المبلغ الانت اتكلمت عنه يعني ٣٠٠ مليون دولار فقط و حيحل مشكلة القطوعات بالنهار( وقت النشاط الإنتاج) و بالتالي حيوفر للبلد ال ٧ مليار دولار الكانت حتضيع بسبب انقطاع الكهرباء الحل هو بتركيب محطات طاقة شمسية بدون بطاريات تكلفة انشاء محطة طاقة شمسية بقدرة ١ ميقاوات بدون بطاريات في الهند ( نفس المناخ و نفس تكلفة اليد العاملة) بتعادل ٦٠٠ الف دولار فلو قررنا بناء ١٠ محطات شمسية سعة الواحدة منها ٥٠ ميقاوات فدا حيكلف ٣٠٠ مليون دولار فقط و حينتج ٥٠٠ ميقاوات طاقة يعني عشر المبلغ الطالبه وزير الطاقة ( ممكن الحكومة تسحب المبلغ دا من ال ٨٠٠ مليون دولار الاستلمتها من صندوق النقد بدل ما تكون قاعدة كاحتياطي مجمد في بنك السودان... دا ظرف طارئ يا ناس) جمال الفكرة ما هنا و بس الجمال هو أنه محطات الطاقة الشمسية دي ممكن تحل مشكلة عدم كفاءة شبكة التوزيع كمان حسب تصريح وزير الطاقة الشبكة كفاءتها ٦٠٪ فقط يعني في ٤٠٪ من الطاقة المولدة بتضيع بسبب انتقال الكهرباء من مناطق التوليد لمناطق التوزيع البعيدة في شبكة كفاءة نقلها تعبانة يلا اذا اتوزعت محطات الطاقة الشمسية دي على المدن البعيدة من محطات التوليد و الفيها فقد كبير بيصل إلى اكتر من ٦٠٪ (بسبب بعد المسافة و عدم كفاءة الشبكة) كدا كمية الكهرباء الكلية الحنستفيد منها بسبب محطات الطاقة الشمسية هي : ٥٠٠ ميقاوات مقسومة على ٦٠٪ كفاءة النقل الحالية ودا يساوي ٨٣٠ ميقاوات ( يعني في ٣٣٠ ميقاوات دي حنوفرها لانها تاني ما حتضيع في الشبكة لحدي ما تصل المدن الحيكون فيها محطات الطاقة الشمسية) يلا ال ٨٣٠ ميقاوات دي تقريبا تعادل حجم العجز النهاري فالكهرباء تاني ما حتقطع في النهار👍🏽 بالتالي النشاط الإنتاجي ما حيتعطل و حنوفر ال ٧ مليار دولار الكانت حتضيع بسبب القطوعات دي👍🏽 بالإضافة لانه مافي اسهل وأسرع من تركيب محطات الطاقة الشمسية ما ننسى كمان انه حنوفر قروش الوقود لانه محطات التوليد الشمسية ما بتستهلك اي وقود👍🏽 غير الشمس عندنا شنو في البلد دي؟ يا وزير الطاقة وضع الكهرباء في السودان هو وضع استثنائي يحتاج إلى حلول استثنائية وليس لحلول تقليدية مكلفة و عقيمة المهندسين التحتك في الوزارة الجابوا ليك الرقم بتاع ال ٣ مليار دولار ديل ممكن يكونوا ناس غير مواكبين للتكنلوجيا و ما قادرين يجيبوا حلول استثنائية للوضع الاستثنائي دي ـــــــــــــ (عدل بواسطة صبري طه on 09-11-2021, 01:04 PM)