♧عاسِمةُ ال[لَوْلَوَاتِ] و العفونيات التَّلَاتَةِ£

《 سندسٌ و إستبرقٌ 》
● صاحبن لينا من قدامي المغتربين قال جاتهم هناك
لجنة [تمكين] قبل 15/20 سنة واللجنة دى طرحت عليهم
شراء حواشات فى مشروعسندس الزراعي جنوب جبل اولياء.
قال لى : يازول اللجنة دى جاتنا جاهزة وشايلة معاها (بروجيكتر)
و مجسمات من المشروع وعرضو علينا أفلام بس ألف ليلة و ليلة
شى طرمبات وشى مخططات وحظائر تربية ابقار ودواجن و نعام
و غزلان وحكاية مبهجة..و حدايقَ غلباً ووزيتوناً و نخلاً و فاكهة
و أبأ تحس كأنك فى (عليين)..و ما ناقصة إلا بس الحور العين.

● و بدون نقاش دفقنا دم قلبنا كاش كل زول خمشة ألوف مؤلفة
من الريالات يسيلن ريالة الديك و يمرقمن من خشم ببت العدو المو صليح.
المهم ،استلمنا شهادات بحثنا و نِمَر حواشاتنا و واحدين اشترو تلاتة و أربعة
حواشات ومشينا بيوتنا ونمنا فى سعادة بالغة واليوم داك أنا للصباح ما نمت
بالفرحة و كل دقسة أحلم بالماء و الخضرة و الوجه الحسن ..و من شلاقتي
مشيت السفارة تانى يوم اشتريت حواشتين تااانى لصق بعض ناصية لظروف
الدنيا ظار الغش أم بنابت جالوص و قش مي معروفة و قلت يا ود اخير
ترمي قروشك فى البكماء دي بس؛ زيها مافي حاجة مفيدة.

● أهاااا ، فى الإجازة صاحبي رجع السودان واول مشوار عملو
طوالى لى مشروع سندس ليطمئن قلبه. قال مشيت مبانى سندس
ووريتهم ورقى وقالو لى تمشي مربع رقم (... ) وده فيهو حواشتك
حاتلقى بيت فيهو زول اسمو (محمد ودابرق)..حايوريك حواشتك طوالى
و محمد ده العِرِّيف بتاع المشروع و حافظ مداخلو شبر شبر .. و جحر جحر
صاحبي ركب عربيتو وطيران على المريع ..دق باب ودابرق لقاهو فاتح ..عاين
لى جوة لقى زول لابس فنيلة و سروال وقاعد فى عنقريب و قدامو كباية شاى
وبلف فى سجارة بنقو و كملان من لحم الدنؤا لا تعرفو ود أبرق و لا (عشوشة)
قال سلمت على الراجل (حق الله بقا الله) و قلت ليهو انا عاوز أستاذ ودابرق لو
سمحت؟ قال ليهو وصلت تب حبابك 10 برا كشرة ؛ ياهو اأا زاتي القدامك ده..
أنا حقيقة عاوز أشوف حواشتى الاشتريتا هنا في المخطط دا!!
~ ود ابرق: عاوز تشوف فيها شنو؟
~ عاوز أشوف الموقع و بعدو كم عن الترعة والخدمات الموصلة ليها
والحاجات دى يعني. ضحك ود ابرق حتى بانت نواجذه و انتفخت (لهاته).
شوف يا اخينا ياها الواطة القدامك الفاضية دى فيها حواشاتك و الترعة دى
ما وصلت و ما ظنبتا تتوصل بي قُرب.
~ ياخ انا باعو لى حواشات فى مكان مميز ودفعت قروش زيادة على الأساس ده...
وقالو الحتة دى الترعة واصلاها و ممكن تسقى من (الميجر) طوالى.
~ ود ابرق: و هسي أنا دايرني اسوى ليك شنو مسلن ؟!!!علي الطلاق يابن العم ،
إذا عاوز تسقى حواشاتك دى إلا تسقيها من البحر بى جردل ..والبحر من هنا 3كيلو
وشوية صاحبي سكريهو ارتفع وضغطو ارتفع والبولينا ارتفعت وبقى يرفع فى كراع
و يخت كراع وقال لى ودابرق عندكم حمام هنا ، دايرين نتسير ونكطع الجمار!؟
~ ودابرق : أمشي بول فى السهلة ديك ساكت حمام شنو يابن العم ..بول وتعال
تلقانا نحتاةيانا نحنا لا غيرتتا ظروف و لا هزتنا محنة و قنب أخد ليك نفسين
هدى اعصابك و روق المنقة شوية . باين عليك من شكلك مكبر الحبة قُبة
صاحبي بال ورجع لى ود أبرق وقال ليهو خلاص أنا ماشى مع السلامة.
~ ود ابرق : وبالنسبة لى ريالاتك
~صاحبي : الله يعوضنى فيهم صاحب العوض النافع ..
~ ود ابرق : والله انتو أكبر فارات خلاص...قال (ميجر)قال...( يجروك لى ورا).
المفردات الصعبة:
*ميجر :الترعة الرئيسية
* يجروك لى ورا : كناية عن الخروف
وفى رواية أخرى حينما( تنفق ) أي
تموت البهيمة تنجر رمة من ضنبا.