فضيحة أردول

Quote: اردول مثبت نفسو في الكرسي كيف؟! اولا بالتبادي. الشركة السودانية للموارد المعدنية عندها جزء من ايراداتها مخصص للمسؤولية المجتمعية يعني مفروض الشركة تدفعو تبرعات للمجتمعات (المنظمات الطوعية، الأفراد المحتاجين، أعمال خيرية في أماكن الإنتاج(مدارس مستشفيات و هلمجرا). اردول عمل لجنة عشان تقرر في كيفية تقسيم المال ده و اللجنة قررت الاتي: 50% من المال ده يخصص للصرف حسب توجيهات قيادات الدولة العليا (من وزير فما فوق... يعني أعضاء مجلس الوزراء و مجلس السيادة) .. يعني ناس قرية ام صفقا عراض يمشو لوزير الرياضة يقولو ليهو عايزين نادي وزير الرياضة يديهم ورقة أو تلفون أو يرسل واتساب لمبارك اردول و مبارك يقوم باللازم و لو بطنو طامة من الوزير يمكن يقول ليهو والله للاسف كلها شالا حمدوك .. و لو كان الوزير معاهو في التحالف البتاعي الجديد بتاعهم ده ممكن يديهو ضعف المبلغ. و ممكن الفنانة حواء بسطونة يكون عندها عملية شفط دهون تمشي للفريق كضباشي يحولها لاردول يقوم باللازم .. اردول لو سالتو حيقول ليك انا صرفتها حسب اللائحة و هندليها مزكرة كضباشي. نشيف باقي المبلغ 30% تحت تصرف السيد مدير الشركة شخشيا .. و داكي الليلة اردول صرف منها تبرع لموقع الحاكم نيوز الإلكتروني و في صحفيين زعلو قالو الحاكم ده كوز .. و كذلك اتبرع منها بمليار جنيه دعم للموظفين بمجلس الوزراء. هسي في صحفيين كده حيعملو رايحين من اردول طمعا في دعم مواقعهم. باقي المبلغ 20% تركها اردول للمجتمعات المحلية لمناطق التعدين. الخلاصة: انت لو كنت وزير حتدعم اردول في مجلس الوزراء عشان تضمن امورك تمشي وللا تقيف ضدو يجيبو بدلو زول يحرمك من التبرع من القروش الهاملة دي لجماهير حزبك؟ و انت كصحفي عندك موقع الكتروني محتاج دعم حتقيف مع اردول وللا ضدو؟