♧ نحن الغسَّلنا العِدَّةَ و خمَجنا البحرَ طَحينَةً£

♧ برضو قبال نغرق ، و على طاري سيرة
أخوانَّا في الله الموحدين قدس الله أسرارهم،
بالمناسبة بما أنو أبغضٌ الحلال عند الله الطلاق ،
فكذلك التوحيد بي(بغلة) فرد واحدي كدي خاتة نقرها
من نقرك و بوزا في وشك سداح مداح و صباح مطاح ،هو
أبغض أنواع التوحيد إلى الله . هذه فتوى ساي كدي من
عندياتي و العلم عند الله. بل إنو التعدد هو الأصل كمان
و أي بغل ساقف على سرير واحد بالله يراجع البطري.
و كان لتوهباني ديك جاهزة تعدد نحن حاجزين.

▪ يعني إيه المانع الواحد يقتنيهن واحدة تكون أم
للشُّفع من الحرس القديم دي بقى ست الكل ؛ و تانية
زولة
كسرة و ملاح ساااه، و تالتة مختوتة بس(سبير بارت)
و تنفع برضو لرمَيان الطلاقات الفشنك الفي الهوا ديك
ولا مش كدي يا وداد النحلة. و الرابعة دي بقى ياهي
السمحة يا ست العجن أنا زي جمالك لاقي وين.. لا
في القراب لا في البعاد ما شفت زي عنيكي عين.

● فمرة واحد منهم، أخونا شيخ الموحدين/ عبد الحي الشبلي.
قال لينا: الحاجَّة بت خالو الكل يوم معاهو دي براها بتساوي في
نظرو براها أربعاً في أربعٍ. قلنالو :يا رااجل، يعني إلا تكون (4in 1).

● أها تراهو جنس الرِّمَم المخذِّلين ديل ياهم القادين لنا القفة من
تحت. الجماعة قالو: عاملين بمبدأ شعار شركة سابتكو. النوع الهارشنو
بمفراكة الملاح و قايلين ليه : (بس خليك إتا مستمتع بمناظر الطريق
أثناء الرحلة و دع عجلة القيادة لنا)؛ ممسكنو ضنب التور للأسف.

علا لاكين ، أفففو أنا أخوك الراسية!! نحنا و نحنا مفطومين
بي عجينٍ مُرٍّ، و مكحلين بي شطة قبانيت كافرة مرة واحدة.
نان تجي برضو تقوللي منو و تقوللي شنو! قوم لف بالله!!!