Quote: عزيزنا ود الأصيل حقيقة شرفت البوست أنت يا حبيب بوستاتك زي بوستات ناس تاج السر الملك ودهب وأبوذر والجماعة الغلاد ديل بتاعت قراية بس.. شخصيا بتابعا بصمت .. كلها وبنهم شديد.
|
☆ تعرف يا طلحة ، بوستات الأسافير عامةً
تراهي متل الدواجن ، آيوة، الجداد البكاكي دا.
طبعاً منو البائض و منو اللاحم. و دا بالزات بربوه
يطلعو من صدوره الطوامح فخدة طاعمة بلحيل
دي لأولاد الزوات و المصارين البُيُض ؛ و منو أفخاذ
و وراكين و كرعين (سهير ) و ديل حتهن ليهن ناسن
القادرين عليهن. يلا ديل متل إخوانياتكم دي.. بالجد
خفيفة الظل؛ الواحد أكان جاء رمالو بس حريف مهمل
بلا نقط إعجامٍ بس يجوه المتداخلون و الخشامة
اللعمى شايل المكسر ؛ ما شاء الله تبارك الله !!
و أما ما يتبقى من جلافيط و أصابعين الجداد
فيا إمتن تجمبع لامن يدوها خور المايقوما ، و
لا كمان حتها ليها ناسا يخموها يودها يجقجقوها
كوارع في سوق صابربن شارع الشنقيطي . يلا ترا
حال أضافرين (صابربن) دا ياهو الباقي علي متل
بويسات القراية أم دق المترية ألتنا ديك!!
☆ فا شنو ياخي، قالو: الريد قِسَم
♤ بوستاتنا تعيسة و غير موفقة !!
مهما تنحت مخك و تكتب و تؤلف فالكتابة طبعن
صنفان و البوست بوستان ، بوست في نعيم الجنة ،
و آخر ربما في درك أسفل من ضحضاح السعير ، وبئس
المصير . تلقى واحد برمشة عين يفتح ليك أحلى ركن
نقاش، و آخر مهما جاهم هاش باش يضربوه طناش و
سيبو إن شاء الله يتعشى كرشة و يحلي فشفاش!!