لكم ثورتكم ولي ثورة

Quote: د. علي الكوباني الكوز الذي احببته.. والذي قال لي كان ما اضربت ما في زول بجيب خبرك ..😢 هناك بعض القلة من الكيزان احببتهم عنوة واقتدار ..ومنهم الراحل المرحوم المهندس د.محمود شريف رحمه الله..والذي كان مدير هيئة الكهرباء في التسعينات.. الزول ده قلع حبو مني قلع ..وتعامل معي وهو يعلم كراهيتي للكيزان وكلما يمثلونه من فساد ونفاق وتجارة بالدين.. وخلوني احكي ليكم كيف كانت بداية علاقتي وحبي لذلك الرجل… في ليلة من ليالي الخرطوم تلاتة الحارة والكهرباء قاطعة كعادتها..(ووقتها كنت اعمل وحيدا في المشرحة وكان قد تعرض استاذي الحبيب ومعلمي الجليل د.عبد المطلب محمد يس رحمه الله لحادث سير بالقرب من كوستي..) واذا بطرقات قوية في باب الحوش..فتحتو ولقيت رجل مربوع..ملامحو وضيئة (على شوية حلبة كده😜).. ودخل فيني شمال… دكتور كوباني ..انا محمود شريف مدير الكهرباء..قلت ربنا استجاب دعايي وجاب لي مدير الزفت الكوز ابو دقن ده عشان اشرحو واقرمشو بمزاج واتفشى😡..طوالي حسا بقرفي وقال لي : شكلي جيت مع قطعت الكهرباء..قلت ليهو بكل قطامة: ابدا يا باشمهندس برانا طافينها عشان نحن جينياً خفافيش..😏 اها عندك شنو..؟ الرجل ابتسم وتحمل قلة ادبي وعدم سودانيتي في الترحيب..وقال لي يا دكتور استهدى بالله..انا جاييك عشان عندنا عامل من ناس الطوارئ اتوفى قبل شوية بصعقة كهربائية ..وعايزينك تشوفو ونخلص اجراءاتو عشان ندفنو ان شاء الله وربنا يجزيك الخير.. اها هنا طبعا طوالي نسيت الكهرباء وقرفها وقلت ليهو على طول..بس على شرط تسوقني المشرحة وبعدين ترجعني عشان انا ما عندي عربية… قال لي بالحيل.. المهم مشيت معاهو وبديت تخليص اجراءات المتوفى في المشرحة والتي كانت في اوج عفنتها ونتانتها والجثث متردمة في صالة المشرحة وكثير منها متحلل والدود(يرقات الذباب) يزحف على الارض مرحاً من غير تكليف..😢 ولاحظت انو د.محمود شريف كان قرفان وغضبان من حالة المشرحة المزرية..بس مسك خشمو عليهو واكلها في حنانو ..وانا كمان تأنيت في الشغل زيادة وقلت في خاطري..خليهو يشم الريفدور دي معانا شوية الكوز المرتاح ده😒.. المهم بعد ما خلصت الاوراق..قال لي في واحد من المهندسين بمشي بخلص اجراءات التسليم من النيابة وانا عملت اتصالاتي..بس يا ريت تواصل معاي لحدي ما ارجعك بيتك بس اول نستأجر انا وانت ونكفن المتوفي ونمشي ندفنو وده اجر ما تاباهو..وساقني معاهو مكتبو في هيئة الكهرباء وهناك اشهد الله فتح الدولاب وشفت فيهو كمية من الاكفان..وشال واحد ورجعنا المشرحة وغسلنا الميت وكفناهو ومشينا بيتو في منطقة بعيدة من ضواحي شرق النيل وبعدها للمقابر ودفن مع الناس دون اي تكبر واتملى خبوب وطين.. وانا طول المدة استغرب واتابع في هذا الشخص الغريب..تابع الاجراءات ودفن عامل بسيط بنفسه وهو المدير العام..ولا تمثيل ولا كاميرات ولا جوطة ولا دجل(يا اخوانا النصيبة الحمريطي ده ما كوز ولا شنو..😳).. اها ونحن راجعين من المشوار الطويل قام قال لي: يا دكتور انت ما خايف ربنا يسألك من تعفن وتحلل الميتين ديل في المشرحة دي..😳 قلت ليهو انت ما بتخجل..؟ يسألني انا ولا يسألك انت وباقي كيزان الحكومة..😡.. رد علي بكل هدوء قال لي خليني احكي ليك قصة الكهرباء القاطعة طوالي ومعاناتنا في استيراد الاسبيرات ..قال لي قدمنا طلبات لبنك السودان عشان نجيب اسبيرات بالعملة الصعبة من الخارج ..قام مدير بنك السودان الشيخ محجوب تكل الاوراق بتاعتنا وبقى يتزواغ ويمطوح فينا..وبس لميت فيهو بعد تلتلة وقلت ليهو شنو يا الشيخ معقوله ياااخ..عندنا طلبات لعملة صعبة عشان الاسبيرات وما اديتونا منها ولا دولار واحد وحالتنا صعبة..رد علي وقال لي: يا دكتور محمود والله نحن عندنا اولويات في طلبات العملة الصعبة..يعني مثلا القصر..والجيش والامن والادوية..وكده..وانتوا ما من اولوياتنا.. اها طوالي قلت ليهو جزاك الله خير..وفورا مشيت للكنترول في الكهرباء وقلت ليهم بنك السودان بلاك اوت..تفصلوا كهربتو وما في زول يرجعها الا بإذني… وانا عارف عندهم مولدات تعبانة كده بس ما بتمشيهم...اها بعد يومين بدا الشيخ محجوب يسك فيني وانا اتزاوغ لمن لما فيني..وقال لي يا دكتور معقول كده..؟ بنك السودان ما بتحمل ويشتغل بدون كهرباء..طوالي قلت ليهو..والله يا الشيخ اولوياتنا في التوزيع مع الكهرباء الشوية دي..للمستشفيات والقصر والقيادة العامة…وبنك السودان ما من اولوياتنا… طوالي صحبك قال لي تعال بكره نحاول ندبر ليك عملة صعبة للاسبيرات..😅 فدحين يا كوباني يا اخوي كان انت مشّيت الشغل زول بجيب خبرك ما في ولا خبر العفنة دي..ولازم توقف العمل وتضرب عشان حق الميتين ديل في رقبتك..وانا شخصيا متبرع ليكم بثلاجة موية من مكتبي للمشرحة.. نعم والله يا احباب هذه كانت نصيحة د.محمود شريف بتفعيل سلاح الاضراب..وقد كان واضربنا عن العمل في المشرحة وتراكمت الجثث ولكن بعدها بكم يوم ..تحرك والي الخرطوم وتم تاهيل المشرحة في التبريد وحفظ الجثث ودعمنا بعربة داف لنقل الموتى وعربة لتحرك الاطباء.. ☺ وامتدت علاقتي بالراحل د.محمود شريف اعوام ودفنا العديد من المتوفين.. وهو الذي رفض سياسة التمكين في الكهرباء ورفض فصل العاملين فيها مهما كان توجههم السياسي..وحتى يوم سألته وبحكم عملي السابق في الدمازين ..وقلت ليهو والله عفيت منك يا دكتور ..بالله ختيت الباشمهندس عبد الرازق الرجل الاصيل البارع وهو شيوعي مدير لخزان الروصيرص وما ختيت فلان الكوز داك… قال لي يا زول انا داير مدير هناك فاهم شغلو وما قلت داير لي امام جامع..ولا يصح الا الصحيح..ولكن هذا الحال لم يعجب كيزان التمكين والفساد وتمت التضحية بالدكتور محمود شريف واقالته من الكهرباء ومعه الشرفاء الذين كان يحميهم.. واخر لقائي به عندما جا في بيتي وشرب معاي شاي وودعني وقال لي يا زول انا رامي قدام وابقى عشرة على المتوفين من العاملين في الكهرباء..وبعدها سمعت في التلفزيون بخبر استشهاده في الجنوب.. رحمه الله رحمة واسعة واشهد انه كان صادقا مع نفسه..