|
Re: كيف نتحكم فى سيادتنا على الغذاء؟ (Re: Asim Ali)
|
موضوعك دا مهم خلاص وشيق ويستدعي كثيرا من البحث والتفكير والحوار
أبدأ بملاحظة لك صائبة عن قرار والي الشمالية بإجبار المزارعين بيع قمحهم للحكومة
Quote: هل يساهم مثل القرار أعلاه فى التحكم فى السيادة على الغذاء؟ الإجابة بالطبع لا. السودان ليست دولة مصدرة للقمح وكل الإنتاج يستهلك محليا. طالما الحكومة حررت سعر الصرف بتعويم الجنيه وليست شريكة للمزارع فلايحق لها الإستيلاء على منتوج المزارعين لقمح هذا العام. |
الملاحظة المهمة أن القمح ليس سلعة تصدير يعني الحكومة تقلع القمح من المزارع بأقل من سعر السوق عشان تشيله و"تدعمه" وتوفره خبزا لسكان المدن
تذكرت ما قاله مسؤول أفريقي علي أيام مجاعة الثمانيات من القرن الماضي "جوع سكان المدن بيقوموا بثورة ضدك، جوع سكان الريف حيموتوا في صمت..... تفتكر حتجوع منو؟؟؟؟؟) هذه واحدة من العلاقات الشائهة والمختلة بين الحضر والريف وبين القطاع الزراعي وباقي قطاعات الإقتصاد. إختلالات وبمساعدة جهاز الدولة تعمل لصالح قطاع إقتصادي علي حساب قطاع آخر. ولمصلحة بعض من الشعب علي حساب آخر وكله لفائدة النخب الحاكمة ظلم ما بعده ظلم
النوع دا من السياسات يمكن يحل مشكلة في المدي القصير لكن بيعقدها أكثر في المدي المتوسط والبعيد سيتخلي المزارع عن الزراعة حاجة زي دي كانت قد حدثت في سنين الإنقاذ الأولي
السؤال وكما طرح هنا كيف نمارس سيادتنا علي الغذاء حتي نوفر غذاء وأمنا غذائيا لكل سكان السودان؟؟؟ زمان كده عملت بحث عن االرأسمالية والمجاعة في دار مساليت توصلت لأن المعضلة الأساسية لمن يكون الغذاء سلعة تباع وتشتري في سوق الله أكبر (تسليع الغذاء حاجة جابتها الرأسمالية بس ما في فكاك لا من الراسمالية لا منها)
أديكم مثال من مجاعة 1985 المزارعين باعوا محصولهم في السوق وأقصد بالتحديد محاصيل الغذاء زي العيش والدخن وكدا . في عهود سابقة كان المزارعون وبمساندة السلطات المحلية والمركزية يحزنون محصولهم لعدة سنوات قادمات مرات كثيرة بعد كم سنة يحفروا المطمورة (وسيلة التحزين حينها) ويطلعوا العيش ويدوه للحيوانات المهم كان هناك أمانا غذائيا يستمر لكم عام .
قلنا المزارعين باعوا المحصول (في الغالب ذرة) وبعد كم شهر مشوا عشان يشتروا الذرة ولا الدخن من السوق لإستهلاكهم لقو الأسعار مضاعفة وعجزوا عن الشراء ثم جاعوا لأن الغذاء صار سلعة وسلعة غالية بسبب الجفاف وبتجوع مش لأنك ما أنتجت هذه السلعة بل لأنك ما خزنت غلتك الأساسية وما عندك ما يكفي من المال لشراء "محصولك" من التجار والمضاربين
زي مثال القمح في الشمالية مرات كثيرة الدولة بتعمل سياسات ظاهرها السيادة علي الغذاء لكنها تكون وبالا علي المزارع المزارع أنتج ذرة، خزن منها إستهلاكه وباع الباقي عشان يشتري الدواء والتعليم والملابس وكدا تقوم الدولة تمنع تصدير الذرة تقوم الأسعار تنخفض ويقوم المزارع يخسر بسبب ذلك برضو علي حساب المزارع ولفائدة سكان آخرين، لم يك إنتاج الذرة من بين ما يفعلون لكسب عيشهم
هل المزارع غلطان حين زرع بعضا من محصوله للسوق؟؟؟ حتي وإن كان هذا السوق في خارج البلاد ؟؟؟ هل هي مسؤولية المزارع إن صار الغذاء سلعة ؟؟؟؟ طبعا لا لكن الدولة البتضع السياسات ومن بينها سياسات للسيادة الغذاء هي الغلطانة
طيب الحلول شنو؟؟؟؟ما ساهله معقدة وعايزة تغيير مفاهيم قبل تغيير السياسات من بينها أن يكون السيادة والأمن الغذائي هم لكل مواطن مش بس يكون عندك المال لشراء الغذاء بل الأهم أن تستطيع أن تنتج وتخزن قسما من غذائك بالأخص سكان المدن ناس المدن كان وضعهم الغذائي أحسن لمن كان كل بيت فيه غنم وجداد وبقرة بقرتين وخروف خروفين وأحيانا كثيرة شجرة ليمون وجوافة ومنقة وحوض صغير للجرجير والبامية (أي زول عنده غنماية لبن أحسن من واحد تاني بيشتري اللبن وطبعا عارفين ليه!) دا المفروض يحصل أن تنتج ولو جزء يسير من غذائك أقلاه غنماية توفر بروتين لبن وكم جدادة لتوفير بروتين البيض وشجرة ليمون (تساعد البطن الطامة)
أن يكون هناك إكتفاء ذاتي جزئ من الغذاء ينتج أو يخزن في المنزل واحد من حلول كثيرة.
وبإصلاح الإقتصاد ككل بحيث يكون هناك قدر كبير من السكان مساهمين في العملية الإقتصادية وتقل كثير نسبة العطالة ودا بيعني بيكون عندهم علي الأقل دخل ينفقوا منه علي الغداء.
إصلاح مشروع الجزيرة والمشاريع الزراعية في النيلين الأزرق والأبيض والنيل والشمالية وجبال النوبة والقاش وطوكر وخشم القربة وحلفا الجديدة (قرض واحد بمليار دولار يحل معظم مشاكل الزراعة المروية في السودان ويمكن تسديده في اقل من 3 أعوام) بيوفر عمالة ودخل معقول لأكثر من 10 مليون نسمة وبيوفر القمح بما يعادل إستهلاك عام لكل السودان وبيوفر الذرة والدخن والحضارات والفواكه لمعظم سكان السودان وبيوفر لينا كم مليار دولار من سلع التصدير لإستيراد المحروقات والدواء
إذا عملنا المرحلة التانية من مشروع الرهد بنوفر عمالة ودخل محترم لأكثر من 2 مليون نسمة وكم مليار دولار للإقتصاد السوداني وكذلك إذا عملنا ترعة كنانة لري الأرض الخصبة الممتدة من الدمازين وحتي كوستي
كان في واحد صاحبنا ما متعلم لكن تفتيحة دائما بيقول إذا في زول جيعان في السودان دي بهامة بس (بهامة دي جاية من بهيمة)
في بلد زي السودان إذا في زول واحد جيعان دي بهامة بس لكن ما بهامة منه بهامة من كل النخب السودانية
|
|
|
|
|
|
|
العنوان |
الكاتب |
Date |
كيف نتحكم فى سيادتنا على الغذاء؟ | سيف اليزل سعد عمر | 03-04-21, 09:51 PM |
Re: كيف نتحكم فى سيادتنا على الغذاء؟ | سيف اليزل سعد عمر | 03-05-21, 09:35 AM |
Re: كيف نتحكم فى سيادتنا على الغذاء؟ | Asim Ali | 03-05-21, 10:09 AM |
Re: كيف نتحكم فى سيادتنا على الغذاء؟ | سيف اليزل سعد عمر | 03-06-21, 07:43 AM |
Re: كيف نتحكم فى سيادتنا على الغذاء؟ | Asim Ali | 03-06-21, 08:40 AM |
Re: كيف نتحكم فى سيادتنا على الغذاء؟ | سيف اليزل سعد عمر | 03-06-21, 09:02 AM |
Re: كيف نتحكم فى سيادتنا على الغذاء؟ | سيف اليزل سعد عمر | 03-07-21, 09:30 AM |
Re: كيف نتحكم فى سيادتنا على الغذاء؟ | Asim Ali | 03-07-21, 03:36 PM |
Re: كيف نتحكم فى سيادتنا على الغذاء؟ | سيف اليزل سعد عمر | 03-07-21, 05:26 PM |
Re: كيف نتحكم فى سيادتنا على الغذاء؟ | Nasr | 03-07-21, 06:12 PM |
Re: كيف نتحكم فى سيادتنا على الغذاء؟ | سيف اليزل سعد عمر | 03-08-21, 09:03 AM |
Re: كيف نتحكم فى سيادتنا على الغذاء؟ | ولياب | 03-09-21, 06:44 AM |
Re: كيف نتحكم فى سيادتنا على الغذاء؟ | سيف اليزل سعد عمر | 03-09-21, 06:27 PM |
Re: كيف نتحكم فى سيادتنا على الغذاء؟ | سيف اليزل سعد عمر | 03-10-21, 08:29 PM |
Re: كيف نتحكم فى سيادتنا على الغذاء؟ | سيف اليزل سعد عمر | 03-11-21, 04:03 PM |
Re: كيف نتحكم فى سيادتنا على الغذاء؟ | سيف اليزل سعد عمر | 03-13-21, 08:21 AM |
Re: كيف نتحكم فى سيادتنا على الغذاء؟ | سيف اليزل سعد عمر | 03-14-21, 12:18 PM |
Re: كيف نتحكم فى سيادتنا على الغذاء؟ | Nasr | 03-14-21, 06:29 PM |
Re: كيف نتحكم فى سيادتنا على الغذاء؟ | سيف اليزل سعد عمر | 03-16-21, 08:19 AM |
Re: كيف نتحكم فى سيادتنا على الغذاء؟ | سيف اليزل سعد عمر | 03-20-21, 08:51 AM |
|
|
|