في بابور تاني بيقوم من دنقلا وبيمر بالدبة وينتهي في كريمة لتكتمل الرحلة بالقطار البابور قد يكون عطارد او الزهرة او الثرياء او الجلاء او كرباكان وزي ما هنا في ود الرضي عندنا هناك كمان شاعرنا عبدالله محمد خير
يوم بابورا قام فرَّا وراهو أصبحت في حسره .. من الدبّه وانجرا .. سريع النهمه ما تجرا وجروح قلبي الابت تبرا .. دقايق وتاني قام فرّا .. وفاتا (قوشابي) بالمرّه .. (العفَّاض) خلاها ورا .. وهو خاشِّي (قنتيِّ) بان شِدَرا .. وجروح قلبي الابت تبرا (منصوركُتِّى) قام وجرا .. (الكُلُد) ، (مُوره) ، (أمبكول) بضرا .. (جُواري) و (كورتي) جات دافره .. و(الباسا) و(أٌوسلي) ديك ظاهره .. وجروح قلبي الابت تبرا (المقل) والريح لقينا ضرا .. (القُرير) حيّرنا في الخضره .. تومتي الخاشِّي وابورا .. و(الزومه) منارة الفُقرا .. وجروح قلبي الابت تبرا علي (تنقاسي) دمعي جرى .. وسوَّاقا عصربها الحَجْرَه .. مبيتو الليله وين يا ترى .. في (مروي) الوَقف غَفرا .. وجروح قلبي اللبت تبرا فجُر قام ، الاجراس نقرا .. وبابورا اتوسَّطت بحرا .. ياديك (كريمه) .. داك قطرا واقفين والنهار حَرّا .. وجروح قلبي الابت تبرا في الأولى مجهّزه القمرا .. في (الكاسنجر) دمعي جرى .. وديك (ام غربان) وصل خبرا وجروح قلبي الابت تبرا (اب حمد) الحبيب زارا وعليهو خلايقو تنجارا .. تومتي فراقنا قسمه ترا انتي اوعك تنسي للعُشره .. وجروح قلبي الابت تبرا (الشِريك) ، (بربر) سريع مَرَّا وفي (عطبره) دقَّ صُفاره .. وركب قطراً طريقو برا (هيا) و(سنكات) دروب وعِره .. وجروح قلبي الابت تبرا طويله .. ممله دي السفره و(بورسودان) نهاية الرحله .. السكون ديم سلبونا بَرا وسلام ياساكني الحاره .. وجروح قلبي الابت تبرا .. تعال اللوصيكي ياجاره انتي للسر كوني ستاَّره .. مولاي جروحي اطفي نارا وهي من يوم غابت القمرا .. يا رازق السمكه في بحرا انتا فوق تومتي الصغير عُمُرَا .. وجروح قلبى الابت تبرا ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة