|
|
 Re: د. القراي في استقالته القوية والمسببة: لقد (Re: Nasr)
|
يا الله لطفك يالطيف
اعفينا من هذا الهرج
من غصة الزمن النزيف
الحاجة والضيق والعوج
يا خالق القوي والضعيف
اصبحنا في غاية الحرج
خدعونا بالدين الحنيف
وحكمونا بي بسوط العنج
ــــــــــ
شذاذ آفاقك ياريس
علي خط النار واقفين
شان تقرأ كتاب التاريخ
وتتأمل في السيرة كويس
في حال الشعب الغلبان
والريس مبسوط ومهيص
الشعب السميتو جبان
دايس على فقرو وغنيان
أضرب في الفاضي ومليان
ما طال العسكر متسيس
خايل في عيونه البنبان
وماعاد يَبْراكم متليس
ما الحكمة بصيرة الانسان
والمؤمن ياريس كيس
ــــــــــــــ
إتلاقينا في شارع القيادة العامة
من كل فجة وفرقة
فجينا الأرض ووقفنا
دي الوقفة التشوفها قيامة
ماراحت شمار في مرقة
بتزيدنا ونزيدا وسامة
يوم جرد الحساب بالورقة
حاسب نفسك اللوامة
حاسب والمتاريس درقة
والشدر البيمشي يمامة
عينو على الرغيف والطرقة
وإنت على المعاك يتامى
بينك والمشارع فرقة
والبحر الكبير دوامة
قول لحسين هناك في الشرفة
حمد الله الوصلنا سلامة
زي يوم الوقوف بي عرفة
والنَّاس الهناك أياما
شاهرين الهتاف سلمية
رافعين الأيادي علامة
إتنين بالكتير في المية
والباقي بنتمو شهامة
لو تصبر علينا شوية
والصبر إن كمل نتسامى
فوق كل الجراح الحية
والنار التذكي ضراما
ما بتعرف كلمة أحييا
والنضم الوراهو ملامة
والعمر البروح إيدية
هدر في مسخرة دعامة
ما بناخد فداهو الدية
ما بنقبل قصادو غرامة
نحنا على الفدا اتواعدنا
واتعاهدنا حب وكرامة
زي سرب القماري صعدنا
في لحظة وقوع الطامة
إتوسمنا خير وقعدنا
في جحر الأفاعي السامة
شن طعم القيادة بعدنا
شن معناهو طولة القامة
في القلعة المشيد سورا
قايلين الوراها نشامى
في ذاكرة شعوب محفورة
في صدر المعارك شامة
تبت دوشكتا المأجورة
تاكل من حلالا حراما
تتلامع سماحة صورة
وأولادنا بتموت قداما
يا عار القيادة العامة
الاعتصام رفة جناح اللهفة
في روح عبد السلام
روعة جسارة عظمة
و الشهدا الكرام
غضب المتاريس العصية
و دقة اوتاد الخيام
الاعتصام
انفض في شارع القيادة
لكن نبت في كل قطرة دم وقام
في كل بيت
في كل قصة ثورة قدام
في كل شهقة وزفرة في صدورنا اعتصام
في كل شهيد صعد
عند الله محمود المقام
قام اعتصام وقامت قيامة الدنيا
واتفتحت جراحات
الليالي المالحة يا ليل المناحات
الشوارع الفاتحة شريان البراحات
كانوا في صدر القيادة
كما السنابل والرياحين
احلامُن اجنحة الفراشات
ارواحن انفاس البساتين
متوسدين تعب الأيادي الخضرا
و الاحلام قمم
سمحين وعالين الهمم
ماسكين جذور الواطا زي شدر السلم
هذه الارض لنا
فليعش سوداننا علما بين الامم
وا حسرة الاولاد
علي حسرة نشيدك يا علم
انحل توب السترة
وانهدت عروض في الساحة
واتباعت ذمم
تبت أيادي القتلة
و العسس الرمم
يا للألم
يا للمصاب
من كل فج طلعت ذئاب
طلعت خبايث الارض من تحت التراب
طلعت كتايب الظل وآلهة العذاب
وطلعت نفوس متناسية ويلات السؤال
عند الله في يوم الحساب
عتمة في عز الشروق
وكتمة في دم الشفق
وفجة يا رب الخلوق
وصرخة في اعلى النفق
وطعنة في ضهر البشاشات والوسامة
وفطرة القلب السليم
وطعنة في الاذان وفي صوت الإقامة
وحرمة الشهر الكريم
وطعنة لي يوم القيامة
بتحيا في غضب الحليم
وطعنة لا يلقاها الا الذين صبروا
ولا يلقاها الا ذو حظ عظيم
ونحنا مشينا
يا درب الرجوع هيهات
ما فضل الا القليل
ولسة في خاطرنا كلمات
من صباحات المواويل
لو بتغشى السدرة غنوات
كان عرج بي عازة الخليل
وكان بننسج للحبيبات
من خيوط الضوء مناديل
المعاني بتخبو مرات
وتشتعل زي آية في الليل
ونحنا شلنا عمرنا رايات
جيل يسلم راية لي جيل
ما استجاب ليأس ووسواس
و ما استكان لسؤال البديل
همو في الحرية والناس
والتزام الصبر الجميل
عندك خت ما عندك شيل
البعبوا الروح سماحات
و يمشوا بين الناس قناديل
و ناس بزيدوا الهم مناحات
ارخبيل الدم وقابيل
الببادلوك العناق
ويرجموك في الليل ابابيل
ضحكة تحت اللحية القناع
وكم غريق في لجة النيل
يبكوا بدموع التماسيح
ويمشو في جنازة القتيل
ونحن مشينا يا درب الخلاص وصّلنا
باقي من الغناء التلميح
وباقي من المعارك سِنَّة
ونان باقيلك اتبوهمنا ولا مِحنا
نحن برانا من كترة سُكاتنا خجلنا
يوم لاقينا مجنون ليلى
في شارع القيادة نصيح
و يا محبوبة ما فيك إنَّ
فيك سماحة الزمن الوسيم ومليح
ولا كانت مشاعرك مِنة
يوم رسلنا لي حضرة جنابو أجنة
اسرع من كلاب الريح
وانتي متلنا
ما شفتينا لما كتلنا
واتفرقنا ما بين شهيد وجريح
و ما جيناك في خت حِنة
جابتنا المآتم والنحاس الربَّه
أنات الهوا التبريح
جينا محبة
صبينا المتاريس صبة
واتعافينا من قُرح السرير القيح
و كانت ذكرى
احلام المدينة الفاضلة
سودان بكرة
اطياف الخيال والفكرة
والحب الكبير وصريح
سودان المعاني البِكرة
متعافي وسليم الفطرة
صارم وبالهداوة مريح
رنة الاجراس ونقرشة المديح
الرسومات المزازيك
لمة الاطفال على صخب المراجيح
همهمات الباعة
والشعراء المطاليق
والشيوخ المارقة من عبق الضريح
البجردوا السبحة من اهل الطريق
التراتيل التسابيح
النِبال يا عازة الجبال
سنبهار العدو والصليح
الزنوج الدم الحار
و اللسان العربي الفصيح
في المآذن سطع الهلال
و الظلال في الجمعة صلبان المسيح
من اريج نسمات الشمال
قدلة في الوطن الفسيح
السجود في ارض المطار
الوداعات التلاويح
الحديد يا عطبرة النار
التذاكر والتصاريح
و العجب يوم وقف القطار
و اشتعلنا مع المصابيح
النضال ومواقف الرجال
السِجال والساسة الجُداد
المعايش وسترة الحال
الغناوي وعقد الجلاد
الجدال في الجد والهظار
التهجد والتراويح
هُم بيزيدوا العتمة أقفال
ونحنا في إيدنا المفاتيح
وبكرة يصبح كلو قول قال
وما بصح الا الصحيح
المواجع والدم السال
وكم سؤال في قبضة الريح
كم صباح في الافق البعيد
والواحدة ميقات التجلي
ميقات صعود الثورة
في هرم المواعيد
زغروتة والشارع يقوم
وتبدأ الملاحم والزغاريت
من وين بنبداها الحكايات
يا حرفنا المختصر المفيد
انحل حيل الكلمة
وانفضت ملمات
بي دمنا المسفوح قبائل العيد
نتلاقى في وهج البشارات
والمعاني الخالدة في بيت القصيد
دقت النوبات ودندنة الأناشيد
للولاد المارقة حوبات
الشهيد تلو الشهيد
وَيَا خريف الدم سلامات
نحنا بي موتنا بنزيد
والبموت شان وطنو ما مات
بتولد من أول جديد
جينا من رحم البسالات
وجونا من بره الأجاويد
خلينا بالنا على البلاد
ختولنا في الجرح المراويد
جات كلاكلات إيد علي إيد
بري شمبات المسيد جبرة وأمدر
والحشود المارقة من كبري الحديد
إنت بتكيد والشعب يفعل ما يريد
يحيا الكفاح وينبغي
وتسقط كتائب الجنجويد
|
|
  
|
|
|
|
|
| العنوان |
الكاتب |
Date |
| د. القراي في استقالته القوية والمسببة: لقد أخرت جانب الشعب وأختار حمدوك جانب الفلول | عبدالله عثمان | 01-07-21, 02:41 PM |
| Re: د. القراي في استقالته القوية والمسببة: لقد | أحمد محمد عمر | 01-07-21, 02:44 PM |
| Re: د. القراي في استقالته القوية والمسببة: لقد | خضر الطيب | 01-07-21, 02:55 PM |
| Re: د. القراي في استقالته القوية والمسببة: لقد | ترهاقا | 01-07-21, 03:04 PM |
| Re: د. القراي في استقالته القوية والمسببة: لقد | ترهاقا | 01-07-21, 03:12 PM |
| Re: د. القراي في استقالته القوية والمسببة: لقد | معتصم مصطفي الجبلابي | 01-07-21, 03:45 PM |
 Re: د. القراي في استقالته القوية والمسببة: لقد | Yasir Elsharif | 01-07-21, 04:07 PM |
| Re: د. القراي في استقالته القوية والمسببة: لقد | Nasr | 01-07-21, 04:35 PM |
| Re: د. القراي في استقالته القوية والمسببة: لقد | عبدالعظيم عثمان | 01-07-21, 04:56 PM |
| Re: د. القراي في استقالته القوية والمسببة: لقد | Yasir Elsharif | 01-07-21, 05:05 PM |
| Re: د. القراي في استقالته القوية والمسببة: لقد | Nasr | 01-07-21, 05:28 PM |
| Re: د. القراي في استقالته القوية والمسببة: لقد | Hasheem Karouri | 01-07-21, 05:54 PM |
| Re: د. القراي في استقالته القوية والمسببة: لقد | النذير حجازي | 01-07-21, 06:26 PM |
| Re: د. القراي في استقالته القوية والمسببة: لقد | Abdelrahim Mohmed Salih | 01-07-21, 10:15 PM |
| Re: د. القراي في استقالته القوية والمسببة: لقد | حسن ادم محمد العالم | 01-07-21, 10:37 PM |
| Re: د. القراي في استقالته القوية والمسببة: لقد | محمد البشرى الخضر | 01-08-21, 04:28 AM |
| Re: د. القراي في استقالته القوية والمسببة: لقد | حسن ادم محمد العالم | 01-08-21, 07:30 AM |
| Re: د. القراي في استقالته القوية والمسببة: لقد | عبدالله عثمان | 01-09-21, 08:07 PM |
| Re: د. القراي في استقالته القوية والمسببة: لقد | محمد البشرى الخضر | 01-10-21, 08:39 AM |
| Re: د. القراي في استقالته القوية والمسببة: لقد | Yasir Elsharif | 01-10-21, 08:50 AM |
| Re: د. القراي في استقالته القوية والمسببة: لقد | Yasir Elsharif | 01-10-21, 09:11 AM |
| Re: د. القراي في استقالته القوية والمسببة: لقد | Yasir Elsharif | 01-10-21, 03:16 PM |
| Re: د. القراي في استقالته القوية والمسببة: لقد | Yasir Elsharif | 01-10-21, 04:55 PM |
| Re: د. القراي في استقالته القوية والمسببة: لقد | Nasr | 01-12-21, 00:19 AM |
| Re: د. القراي في استقالته القوية والمسببة: لقد | Yasir Elsharif | 01-12-21, 06:51 AM |
| Re: د. القراي في استقالته القوية والمسببة: لقد | عبدالله عثمان | 01-12-21, 03:02 PM |
| Re: د. القراي في استقالته القوية والمسببة: لقد | ياسر مصطفي | 01-12-21, 05:37 PM |
| Re: د. القراي في استقالته القوية والمسببة: لقد | Yasir Elsharif | 01-14-21, 09:08 AM |
|
| |
Yasir Elsharif
فيس بوك
تويتر
انستقرام
يوتيوب
بنتيريست