***** ورطــــــــــــــــــــــــــــة *****

Quote: أمين محمد سليمان ‏٣٠ ديسمبر ٢٠٢٠‏، الساعة ‏٦:١٩ م‏ · دكتور القراي في مؤتمرو الصحفي للرد على منتقديه في وضع لوحة "خلق آدم" لمايكل أنجلو في مقرر الصف السادس، قال بالحرف : "مافي أي كتابة في شرح التاريخ في اللوحة دي، مافي أي كلام إنو الزول الظاهر في الصورة دي آدم و الزول التاني ده الله و كلام زي ده !! " ثم طفق يسأل منتقديه " إنتو ذاتكم منو العرفكم الزول الفي الصورة دي الله ؟!! " إنتهى كلام القراي. لوحة "خلق آدم" هي واحدة من الجداريات الرسمها مايكل انجلو البتصور قصص من الكتاب المقدس، و رسمت بطلب من البابا في سقف كنيسة سيستين في الفاتيكان. اللوحة صورت اللحظة التي يعطي فيها الله الحياة لآدم كما وردت في كتاب التكوين. ومن يوم رسم اللوحة في القرن السادس عشر إلى يوم الناس هذا، مافي زول غير د. القراي أمس شذ أو شكك في تفسير إنو الزول أبودقن بيضاء العلى اليمين ده مقصود بيه ربنا (تعالى الله علو كبيرا) و الشاب الراقد في الواطة ده سيدنا آدم !! كل الكتب و المراجع و المتخصصين بل إسم اللوحة و سبب الرسم نفسو بياكدو إنو الرسم مقصود بيه الذات الالهية وخلق سيدنا آدم. السؤال، ليه تجيب كلام زي ده في مقرر سادسة إبتدائي ؟! شنو الحكمة و الفائدة المستفادة ؟! و ده كوم و إستدلال القراي إنو الصورة بتدرس في جامعة أم درمان الاسلامية دي كوم تاني، لانو لو القراي كان بيضع مناهج جامعية كانت انتفت الحجة باعتبار إنو الطالب الجامعي راشد عاقل و عندو القدرة على تمييز الاشياء، عكس طلبة سادسة إبتدائي اللهم أطفال بمعنى الكلمة! ثم إنو التعليم الجامعي إختياري، الطالب بختار فيه الجامعة و الكلية و ربما القسم العايزو، ناس سادسة إبتدائي ديل ما عندهم مفر من المقرر !! ثم هل نضب عصر النهضة الأوروبية عشان تجيب منو لوحة مثيرة للجدل قدر ده كنموذج و تختها في مقرر الصف السادس الابتدائي ؟!! ليه كل فترة القراي طالع بحاجة مثيرة للجدل " controversial" الناس تختلف معاها ويعزوها لاجندات قصدها محاربة الدين و التاريخ و العقيدة السليمة في بلد ما فيها غير دينها و تاريخها وعقيدتها السليمة ؟! شنو الفهم في حشر صورة زي دي في مقرر سادسة إبتدائي ؟! ليه المعارك الفي غير معترك و تصوير الموضوع كيزان وما كيزان وشغل الناس بقضايا مختلقة مافي ليها أي سبب أساسا ؟! --------------- اللهم انا قد فترنا من محاربة طواحين الهواء 😰 !!