|
|
 Re: حل مشكلة السكن وإرتفاع أسعار العقارات في � (Re: محمد الحسن حمدنالله)
|
السلام عليكم محمد الحسن
وصالح
المشكلة عميقة وسببها الرئيسي هو نفسية السوداني الممكن يكون عايش في أجمل حتة في العالم وخاتي في بالو إنو لازم يشتري قطعة في الخرطوم
يشتريها ويخليها كدي بس لحدي ما ربنا يسهل عليه ويرجع يسكن فيه بعد ما يقضي عمرو كلو برة
الشي التاني السماسرة
وديل لو خشو في أي مجال بطيروه السماء
بالإضافة للمكاتب العقارية
رأس المال الوطني جبان جداً جداً، واكتر مجالين شغالين فيهن الرأسمالية وارباحهم مضمونة هم العقار والدولار
وللأسف المجالين ديل مدمرات جداً للاقتصاد لأنو في جزء كبير جداً من راس المال الوطني ما خاشي في الإنتاج بل شغال مضاربات يشتري قطعة ويربح فيها شوية ويبيعها تاني
في فهم عام إنو الأرض (البكماء) هي المكان الأفضل لحفظ الأموال
انت عشان توجه اقتصادك نحو الإنتاج يلزمك قوانين وقوانين مصممة بذكاء شديد لتقفل بلف وتفتحو في مكان تاني..
مثلاً انا لو مسئول بفرض ضريبة على الأرض الفاضية مبلغ سنوي نفترض إنو 300 مليون في السنة
ولو في بيت فاضي بفرض عليه ضريبة سنوية 200 مليون
ولو في شقة فاضية 150 مليون
في الحالة دي أي زول عندو قطعة بحاول يبنيها، عشان ما تصرف معاه، ولو في زول عندو بيت فاضي بحاول يأجرو، ودا بنعكس ايجاباً على أسعار الأراضي عموماً والإيجارات
الشي التاني بعمل خطة تطوير عقاري شاااااملة في المدن الثلاثة
مثلاً الديم أو الحلة الجديدة اعمل خطة لتطوير المنطقة بحيث انها تكون مباني من أربعة طوابق واي صاحب قطعة يستلمو منو قطعتو ويهدوها ويبنوها عمارة بشكل معين
وينفذوا في المنطقة خدمات جيدة (مدارس مستشفيات، صرف صحي، مراكز تسوق، حدائق صغيرة للترفيه، حراسة) وهكذا)
ويدوه مثلاً طابق كامل لمدة 20 سنة،
وتقوم الجهة (الشركة المطورة) باستثمار المبنى عشان ترجع راسمالها لمدة يتفق عليها الطرفين
وانفذ الفكرة دي في الأحياء التانية
بالطريقة دي ممكن أوجه راسمال البلد في شي مفيد للبلد
الفكرة الأشمل تكون بإنجاز مشاريع استثمارية بإغراءات كبيرة في الأقاليم،
مثلاً انا شايف إنو أي مصنع زيوت أو طحنية مافي داعي يكون في الخرطوم أو أم درمان، إذا اصر على التواجد في أم درمان افرض عليه ضريبة عالية جداً
وكمان مزارع الألبان وحظائر التسمين، في رأيي أكتر مناطق عندها ميزة تفضيلية هي القضارف (البطانة عموماً) أو كردفان،
لأنو افضل ليك ألف مرة تنقل طن بتاع حليب، أو طن زيوت مما تنقل 50 طن بتاع أعلاف أو بتاع مواد خام سمسم وفول وغيره
اتخيل انك عملت مشروع ألبان في منطقة البطانة أو كردفان وعملت مصنع متكامل زي المراعي
ح تعمل حراك اقتصادي كبير جداً في المنطقة الموجود فيها الصناعة دي
وبالتالي ح تقلل من نزوح الناس الى العاصمة ولو ما رجعوا الناس من العاصمة على الأقل بتكون أوقفت سيل الهجرة المستقبلية إلى العاصمة
ولكم تحياتي مثنى وثلاث ورباع
|
|
 
|
|
|
|
|
| |
بدرالدين بابكر مصطفى
فيس بوك
تويتر
انستقرام
يوتيوب
بنتيريست