Quote:
لك التحية يا ود الأصيل يا نبع الحروف ويا جرف الأغاني وضل الكلمات..
اريتك بقيت طيب أخوي ومعافى و كريم البلاغة كعادتك ..والتحية عبرك
لصديقي ود المهدي الصديق، الرجل العميق، وصاحب المسك و الرحيق
|
▪ياكا تب زولي ود تاي العزيز و ياهي المحرية فوقك ولاك كمان
مشحود عليها. علا لاكين تحين ما سويتوها ظاهرة كدي؛ جيتوني
متالبين ترا متل أخوان فاطنة/ الجعليين الفي الصلاة دي بينين .
علا و الله ما أن خطرت ببالي صفوة الأصفياء من أهلي و ناسي
حتى تراءيتم لي كالنُجيماتِ الحُمرِ بازغاتٍ في كبد سمائي.
● أها وكتين الله جابك و يجيب عقابك أدن جاي و ناولني عضانك
اليسرا أشنفا ليك بحكايتي مع الصنف التاني من جماعة " لا بريدك
و لا بحمل براك" فتعرف حبيبو عمر ، ديل بالذات بكونو أصلن ماهم
طايقين خلقة الواحد دي البتكتع الخميرة من بيت النمل. فلامن واحد
منهم يجبرو الظرف و لا يستفزو موضوع بوستك المطروح ؛ و يقوم
يتحامل على نفسو يتداخل معاك على مضضٍ والطامة كمان لو اصطدم
بصخرة اختلاف رأيك معاه و اللي ما مفروض يفسد للود قضية؛ و لكن
هو أصلن لا عاجبو عجبٌ و لا صيام رمضان ظاتو؛ خليك من رجب .
●و لأنو موهو شايللو قلة عشان يكسرا وراك . فطوالي بخت
ليك مع الكلب الأكل الدريش ، و بتكون ديك معاه آخر شوفة يا
روفة . بس برضو نقول عليه للأمانة، صنف مريح خالس، لأنو حتو
وراك غبشة كرعينو و عرض كتافينو و"كفى الله المؤمنين القتال".
دفع الله ود الأصيل
فيس بوك
تويتر
انستقرام
يوتيوب
بنتيريست