بمناسبة اليوم العالمى للرجل المهروشين من زوجاتهم على شاكلة بريمة بلل اجمعو هنا

Quote: *كبسولة قبل الزواج* يوميات رجل مهروش ================== عايز اعترف ليكم إعتراف خطير قد يكون مفيد .. زمان اخوكم كان حمش جداً وصعب .. مافي (مرا) بتقدر تخالفني في الراي ... ولو الولية حاولت تعمل سيك ميك بحتِّو معاها قَرَض طوالي .. بقلب البيت دا فوق تحت 👿 المهم في الفترة ديك كان ضغطي بيصل 150/100 عادي والمصران العصبي يومي هايج وجيبي ما بيخلى من الحبوب المهدئة والبنادول والنوم ساي في تلتلة .. المهم قعدت في الواطة وضرَّبت ليك الشغلة دي اخماس في اسداس لقيت نفسي كدا بضيع وهم ساي .. وبضيع الوقت على أمِّي ومرتي ووليداتي في مواضيع اصلاً مخستكة لا بتودي لا بتجيب! قلت يا ود خليك شاطر وريح نفسك وريح الجماعة يعني win - win. وقررت أقلب الشغلة. وبديت يا زول أرخي شوية شوية وبقيت أسمع الكلام واتهرش عادي .. والغريبة متكيف كمان .. ولو في حاجة بتغيظ أقعد أضحك وأقول الله يجازي محنك يا فلانة 😊 ولو عصروني في طلب لو بقدر بنفذوا بنفذوا طوالي ، أصلاً القروش رايحة رايحة المهم (تشتري دماغك يا معلم )... ولو ما بقدر بقول أبشري في أقرب فترة ممكنة بنفذه طوالي هو انا عندي كم في الدنيا زيِّك 😍 ولو زعلو مني زعل الدلع اللذيذ داك هاك يا طبطبة وهاك يا جرسة (مصطنعة طبعاً ) اها يا زول تعال شوف النتيجة 😁 اخوكم بقي بيأكلوه في الخشم والاوضه مبخرة والهدوم علي سنجة عشرة مغسلة ومكوية !! هو اساساً لو ما اتهرشتا وعملت كدا (ومعاها بسمة) لا باكل ولا بشرب !!! وعلى الخطة دي يا مان بقيت بتهرش عاااااادي وبضحك من قلبي ضحك شديد وصحتي اتصلحت وبقيت رايق .. ولو الشغلة كتمت شديد بقوم بتخارج من البيت براحة بمشي لمحمد صاحبي اتونس واضحك واقرقر معاهو ، بس اهم شي (ركزوا معاي ) اهم شي لما اجي راجع البيت بجي شايل معاي هدية للمدام .. أي حاجة انشاء الله كيس تسالي المهم في النهاية الأمور بتسلك جنس تسليكة 😍علي احسن ما يكون 😍 هسا الصباح دا ماخد لي هرشة مظبوطة في سبعة حاجات مع بعض وما قادر اتذكر هي كانت شنو (ما كمان بقيت بروفيشنال 😁) بس الأمور عدّت على خير بفضل التكتيك الجديد وهسا الجماعة بيعملوا لي في قهوة الجمعة بكل طقوسها وبخورها وأخوكم متجدع فنجال ورا فنجال وبيمسدوا لي في كتافيني .. يعني كمان اتهرش ساي 😁😁 آخر مرة قست الضغط لقيتو 119/75 يعني أقل من الطبيعي شوية... الدكتور لما استغرب !! وفي آخر استطلاع للرأي الاسري قالوا بقيت ظريف جدا وبشتاقوا لي قبل ما أطلع من البيت ، شفتوا النعمة دي كيف !!؟ وبصراحة كدا الراجل المابتهرش لمرتو دا زول رايح ساي وبضيع في وقتو وفي نفسو ووليداتو. #اتهرش ولا تنكرش 😁😁😂😂😂🤣😂😂😂 منقول