الممتحن لرخصة القيادة سايق وجمبو العسكرى الممتحنو العسكرى عين علي الشارع وعين علي الممتحن . يراقب رد فعله وتصرفه ويراقب الشارع ليقدر حسن قيادته وبرضو خوفا علي روحو . التعلمنجي دة عادي ممكن يودرك ويخش بيك في قلاب ولا تحت لوري ولا يوديك الخور طلعو من شارع مكتب الحركة الفاضي وخاشين علي الشارع الرئيسي هم في شارع فرعي وخاشين علي شارع رئيسي . عاين يمين شمال .. يمين شمال الشارع فضى وخش . مع خشتو يجو واحد طاير ويعلق ليهو بوري لامن نط هو والعسكرى . بكل هدوء مع انو الشارع حقو اخد اقصي اليسار ومد يدو علامة الاعتذار واذن المرور مامشي منو شوية الا وواحد نبل من شارع فرعي وخش الزلط بسرعة شديدة استلم الشارع . بكل هدوء داس فرملة خفيفة وابتسم وعاين للعسكري وقال الناس دي جارية كدة مالها لا حولا الله خاشي علي الصينية جاهو واحد في الاتجاه المعاكس خاشي غلط . اضطر وقف العربية وابتسم وقال للعسكري ضااحك تلقاهو من ناس الاقاليم رغم انو بسوق ليهو سنوات بدون رخصة لكن الحوادث كترت وعدم الرخصة مشكلة العسكرى براقب بصمت ودون تعليق وهو ماشي في شارع رئيسي وراء عربية بمسافة قانونية مظبوطة فجأة يظهر ليهو دفار متخطي غلط مرق من العربية القدامو بأعجوبة . وجاي متلهمو . ضاربو ضاربو زولنا بسرعة تصرف مرق يسار قليلا واستك في الزلط واستك في الردمية ومعلق بوري وصارف بركاوي اصلي للسواق وللحكومة وللزلط وللمهندس العمل الشارع متناغما مع صوت البوري العسكري لكل هدوء قال ليهو قرش هنا واقيف وقف قال ليهو اتدلا اتأكد سقط سقط مادايرة كلام العسكرى استلم القيادة واتلفت عليهو وهو راكب جمبو يرجف من خوف السقوط اتلفت وقال ليهو مبروك .. كدة يا دوب نجحت
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة