|
Re: سؤال مفتوح لقحت: لماذا وكيف تم إستبعاد الأ (Re: بدر الدين الأمير)
|
ناس كسلا حيقيفوا ألفاً أحمر ومفروض يقيفوا وليهم الحق. ودا دليل مادي واقعي على الأرض يُثبت أن الثورة منفِّسة، ودايرة هبّة أخرى. السودان لسه حاكمنو الكيزان ومن شرب من إنائهم، وأصبح مرتهناً لهم ولجهات خارجية ما تساوي مساحة مشروع خشم القربة. هسه نفهم شنو من إقالة الوزراء الذين أقيلوا، ونفهم شنو من بقاء وزراء أظرط من المظاريط؟ يعني هسه مدنى عباس وفيصل محمد صالح قاعدين عشان خلاااااص مؤهلين وسايقين مادين في خط الثورة؟ والله ديل مفروض يشوتوهم من أول أسبوع.
الشغلانة ما بقت ثورة ولا شيء. بقت زي حاجة بتشبهنا تماماً كما كنّا؛ هيملانة ما عندها معنى يجوطوا فيها ناس علاقتهم بالحياة ومتع الحياة صفر ... وعادي يقولوا نحن أحسن ناس ... وشاطرين خالص خالص لدرجة إننا بنبول في النيل وفي الحيط لا مؤاخذة. تخلف الخلاء أسمح من تخلف المدن ... وكل المدن السودانية عبارة عن مقبرة وسكانها ما شاعرين بأي شيء. ما عندهم إحساس بالحياة والله حتى لو كانت رغدة ومنغنغة برضو حيكونوا ما شاعرين بيها.
يا أولاد السودان ... فتشوا للخلل في أدمغتكم دي. عندنا مشكلة حقيقية في طريقة تفكيرنا وفي طريقة تعاملنا مع الحياة. اليوم أضعف واحد فينا وأقوى واحد فينا بيتمنى يكون عندو سلاح عشان يقتل أبناء بلدو ... وبس، وما حيكون عندو أي خطة أو نظرة يطوِّر بيها البلد الكتل ناسو دا.
داخلين في متاهة عجيبة ... وما في زول قادر يقول المشكلة وين مع إنها معروفة: في مخنا المعولق دا وفي طريقة تفكيرنا الما عندها علاقة بأي شيء ينتمي للعالم الذي نعيش فيه.
نحن ناس كسلانين وتعبانين وعاملين فيها فاهمين لكن والله ما فاهمين أي شيء عن كيف تصنع مجتمع أو دولة، نعم روسينّا مليانة معلومات لكنها معلومات وبس ... وقد رُوي في الأثر عن نبي الله إنشتاين قوله: Information is not knowledge. أها نحن بتاعين معلومات عن كل شيء لكن يسمّنا في المعرفة ... نهائي ما عارفين. بلا شاطرين بلا أبو القدح. حنستمر نكتل بعض لحد ما المساحة الجغرافية دي الأدونا ليها الانجليز (رضي الله عنهم وأرضاهم إلى يوم الدين) تتبعزق وكل زول يلقى نفسه قرد معلق في شدرة تابعة لدولة تانية ... ويبقى عبد حقيقي لأسياد جد. والخوازيق ستأتي. الله يستر لكن أنا شايفها.
قربت أقول ينعل أبو دا بلد. ممكن أحيي حميدتي بهذه المناسبة لأنه انعكاس طبيعي لهبالة ناس كلية غردون وكلية شمعون. كانوا فاشلين لدرجة مخجلة، بس أديهم الونسات عن الذكريات الكذوبة في بلاد الغرب وهم لا كانوا ولا كنّا. فكرة بناء دولة ما أظن كانت حتى في أحلامهم. دولة؟ يبنوها سودانيين؟ على جثتي. والمغالطني يثبت عكس كلامي وليه مني جائزة.
التشاؤم شعور مؤذي لكن دي الحقيقة والعايز يتفاءل مبروك عليه وإن شاء يجي الأول.
أنا ما متفائل من الله خلقني وعدم التفاؤل اتضخم بعد ما طفت بدول آسيا وأنا لسه في العشرينيات من عمري ... وعرفت إنو مخنا بايظ ... مخ ما في، وخيال مافي ... وتسامح مافي .. وحب مافي ... ونقاء بين المتعلمين مافي. وهو كل المصايب دي جاية من تحت راس المتعلمين ديل. فاشلين في الخارج وفي الداخل لكن لقوا إنهم ممكن يفشّوا غبينتهم في الداخل الهامل دا.
أمة تعبانة جد. الله يفرجها. لكن أنا ما شايف في السودان دا غير كم جغرافي مهمَل منتظر زول يشيلو وحلال عليه.
|
|
![Edit](https://sudaneseonline.com/db/icon_edit.gif)
|
|
|
|
|
العنوان |
الكاتب |
Date |
سؤال مفتوح لقحت: لماذا وكيف تم إستبعاد الأمين شنقــراى من ولاية كسلا؟ | Abureesh | 07-25-20, 08:20 AM |
Re: سؤال مفتوح لقحت: لماذا وكيف تم إستبعاد الأ | عمر سعيد علي | 07-25-20, 09:14 AM |
Re: سؤال مفتوح لقحت: لماذا وكيف تم إستبعاد الأ | Abureesh | 07-25-20, 09:23 AM |
Re: سؤال مفتوح لقحت: لماذا وكيف تم إستبعاد الأ | Abureesh | 07-25-20, 08:13 PM |
Re: سؤال مفتوح لقحت: لماذا وكيف تم إستبعاد الأ | MAHJOOP ALI | 07-26-20, 01:53 AM |
Re: سؤال مفتوح لقحت: لماذا وكيف تم إستبعاد الأ | Abureesh | 07-26-20, 02:27 AM |
Re: سؤال مفتوح لقحت: لماذا وكيف تم إستبعاد الأ | عبدالعظيم عثمان | 07-26-20, 04:55 AM |
Re: سؤال مفتوح لقحت: لماذا وكيف تم إستبعاد الأ | ANWAR SAYED IBRAHIM | 07-26-20, 05:48 AM |
Re: سؤال مفتوح لقحت: لماذا وكيف تم إستبعاد الأ | بدر الدين الأمير | 07-26-20, 06:35 AM |
Re: سؤال مفتوح لقحت: لماذا وكيف تم إستبعاد الأ | Shinteer | 07-26-20, 09:53 PM |
|
|
|