♧ قَد لا أكذِبُ و لَكِنِّي فَقَط أتَجَمَّلُ£

حكاية ريدة بين اتنين
_________}2{__________
**********************
المشهد الثاني
المكان / منزل أهل سهى متوسط الحال في الحي الأوسط
الزمان / في عز الليل.. ساعة النسمة ترتاح على هَدَب الدغَش
و تنوم و أنا مساهر.. في هذه الأثتاء يرن هاتف الآنسة سهى.

~الووووو.....قالتها بصوت متعب مبحوح و حيل مهدود
~أنا اسف المرة دي ما غلطت في الرقم قاصد و من حقك تقفلي
الخط طبعن..بس و الله العظيم ما قدرت أتحمل ما اضرب ليك.
~ تقاطعه (( سهى )) لو سمحتا يا أستاذ ، دي تاني مرة، إزعاج يعني.
~ أرجوك اسمعينى أنا صوتك ساقني زي حمار النوم لعوالم بعيده شديد.
فأأأرجوك ما تفهميني غلط. يخفق قلب سهى بسرعة بندول ساعة حائطية:
~ بصراحه كدا أنت منو ؛ صوتكداة ما شكلو غريب علي أبداً داقش أضاني.
~ احتمال كبير ، بل أكيد نكون سمعنا بعض في عالم افتراضي مسحور
كعالم ألِس في بلاد العجائب؛ أوفي زمن تاني خارج إطار توقيت التغطية.
~ لا بالجد إنتا منو و داير منو و أصلن متصل لشنو ، من الآخر كدا؟!
~ يا ستى أنا اسمى(با سل)، و نيتي سليمة و قصدي شريف جظن جدن
~ باسل باسل باسل ؟! معليش جد ما عرفتك ، لا لا مااظن بنعرف بعض.
~ غريبة ، رغم الإلفة و الدفء الأنا حاسي بيهم ؛صوتك بذكرني ماما و بابا
و أخواني.طبعن إنت مع أهلك كلكم تامين لامين و مالين عليك فراغ عريض.
~ لا..أنا براي في الجامعه هنا بقرأ صيدلة(سريرية) و قاعدة مع ناس خالو
~ بس خلاس قبضتك يعني ياحبيبي نحن إتلاقينا مرة .. في خيالي و في
شعوري ألف مرة.طبعن اتلاقينا في إحساسنا المشترك بوحشة الغربة البطالة.
~ يعني أنت أكيد مغترب و جاي هسي نازل في إجازة ؟؟
~ هنا يشعر باسل بنشوة إحراز هدف فيضحك بقهقهة مصطنعة.
~يلا ، ممكن توريني برواقة كدا ، بتضحك مالك يا سيد باسل؟!!
~ أنا ياستي لغاية قبل سنة بس كنت طالب و هسة ماني عارف
نفسي زاتو طالب و لا شغال مع وقف التتفيذ؛والله صحي يا.....؟
بالمناسبة لسة ما تشرفت بحروف اسمك أنا ديك أقول يا منو؟!
~ سهى ؛ لكن بصراحة كدا باين إنك لغز كبير . ثم تعجبت سهى
من أنها كذبت بكل شىء و صدقت في اسمها.و أردفت بسرعة:
~ عاين خالو جاي علي بالعربية عشان ياخدني..يلا باي بتوقع
اتصالك في وقت تاني. وعادت سهى ساهية لتنهمك بعملها.
************************************