سد النهضة العظيم.. المعادل العلمي له في السودان

Quote: https://top4top.io/ ببساطة شديدة (زي ما في الصورة المرفقة دي) حفر قناة من أمدرمان النقطة (A) لمنطقة الدبة النقطة (B) بطول 300 كيلومتر، وعرض 40 متر، وعمق 15 متر بخلينا قادرين نستوعب 1.8 ترليون متر مكعب من موية الفيضان البقي سنوي دا. مع ملاحظة انو ارتفاعات المناطق دي كمان بساعدنا في انسياب المياه من امدرمان حوالي 400 متر فوق سطح البحر للدبة حوالي 250 متر فوق سطح البحر. كمان ممكن نضاعف كمية الموية القادرين نتحملا عندنا لو شقينا قنوات فرعية بين النقاط 1 و2 ، 3 و 4 ، و 5 و 6 (شوف الصورة برضو) ولاحظ كمان انو الإرتفاعات الطبيعية للنقاط دي مساعده لينا برضو. و بي كدا تاني ما ح نتأثر خالص بي فيضانات بقت ثابتة كل سنه بسبب التغيرات المناخية و زيادة معدلات الأمطار في الهضبة و عندنا. ما داير أونسكم بي الفوائد التانية ناس زيادة الغطاء النباتي و مشروعات الزراعة الممكن تتعمل في شبه الجزيرة الح يتكون دا (إذا إعتبرنا انو القناة دي موسمية بس في الخريف)، وفرص زراعة هشاب وزيادة مراعي للثروة الحيوانية، و غيرووو المشروع دا ما صعب التنفيذ أبداً عشان ما تقولو لينا تمويل خارجي و ما بعرف شنو، يعني رسم أولي لمجري القناة دي يخططو ليهو ناس الموارد المائية، مهندسين مساحة يقروا إرتفاعات المجرى المقترح دا، و تعديلات تتم للرسم النهائي حسب قرايات الواقع ، و بسم الله نجيب كراكاتنا. اهم شئ توفير جهاز رفع مساحي GPS لخدمة المشروع من ضربة البداية. و بإذن الله يا الخريف الجايي نحن أولاد المحاريت و ... #حنبنيهو إضافة و تعديل: ١/كمية الموية المذكوره فوق دا كان خطأ التمييز بليون متر مكعب. ٢/الناس البتقترح أماكن تانية للقناة دي، انا مقترحي دا اعتمدت فيهو على الارتفاعات الطبيعية للارض و جريان المياه من العالي للمنخض. ٣/موضوع انو دا مخطط مصري و التعليقات المشابهة، القناة حسب رأيي موسمية و يكون عندها بوابات تحكم تتفتح لما مستوى النيل يصل لي ارتفاع محدد و مدروس و تتقفل متي ما حصل انحسار لي ذات المستوى. و كلو بالدراسات. ٤/ المشروع و تاثيرو على اتفاقيات مياه النيل ممكن يفتو فيهو اهل الاختصاص من قانونيين و فنيين. و #حنبنيهو برضو