القبض على “بعاتي” يدير مطعما لبيع الكوارع بسوق نيالا.

Quote: ما أول بعاتى يعود للحياة ويزاول مهنة ملتصقة بالجمهور فى أمدرمان زمان إكتشفوا واحد بتاع أقاشى إنه بعاتى كشفه أحد بلدياته جابتو الأقدار لأمدرمان وبمناسبة نيالا حكى لى أحد الأساتذه المعلمين الأجلاء وأثق فى روايته وهو من أبناء الأبيض ومن أسرة معروفة وممتدة لأمدرمان ومدن أخرى بكردفان. أنه ذهب لزيارة أسرة قرايبه بمدينة نيالا وأقام عندهم أيام وكانوا فرحانين بزيارته ولكنه منذ اليوم الأول تفاجأ بأنه تقييم معهم إمرأة عرفها وعرفته تعمل كخادمة تقوم بأعمال المنزل والمطبخ. لزم الصمت بشأنها. وكان أهل البيت وخاصة ست البيت مبسوطة منها ومريحاها على الآخر .. ولكن منذ مجئ الضيف المرآة تغير مودها وإضطربت وأصبحت تتحاشى لقائه. وبعد يومين إختفت المرآة .. والجماعة أصحاب البيت بفتشوا عليها ومتحسرين لإختفائها، خاصة أنهم يعلمون ليس لها أهل أو معارف بنيالا. إضطر الضيف (محدثى)، أن يقول لهم بصراحة المره دى عرفتها وعرفتنى والمره دى إتوفت وأنا حاضر جنازتها ودفنتا بالأبيض وحدد لهم التاريخ. وافقوه أنها ظهرت عندهم بعد ذلك التاريخ .. وقالوا ليهو ممازحين يا ريتك ما زرتنا كانت مريحانا شديد! الغريبة قصص البعاتى فى السودان كلها الخوف فيها زول مات وقام بعاتى لكن مافى رواية إنه مؤذى، بل ودود ووفى فى معظم القصص يعود لأهله وأصحابه. ويبدو روايات ظهوره فى مجتمع جديد بعيد عن موطنه بسبب ناسو خافو منو وإبتعدو .. وفى روايات أن أهله عشان ما يجيب ليهم الكلام بيطلبوا منه ما يجيهم تانى فبيفز بعيد وبيظهر ويعيش فى مجتمع تانى.