ادعموا زميلكم "دفع الله ود الأصيل"..في مسابقة عبر اصدارة اردنية.

* سمح نجي ل(لغة الضاد) بقى. يا الشيخ أخوي إت بتقول لي أنقِّح النص من شوائب
لهجتنا العامية عشان يقبلوه . و عمو عادل اللمين بقوللي" أرمي لا قدام و لامن تبدأ الرحلة
سيظهر لك الطريق" مشكورين طبعن دي كولها نصائح ذهبية بمثالة فرمانات واجبة النفاذ.

* و لكن أبشركم و بس ما تزعلو مني ؟ّ إني فعلن قدمن النص بدون تلميعه و لا برتوشاية واحدة و لا تنقيح
و لا هم يحزنون. عارفين ليه لانو شخصياً لي نظرة تانية خالس و لأبعد من نيل أيتها قلادة تشريف لشخصي
لا تُسمن ولا تُغني من جوعٍ . و الله على ما أقول شهيد، إنني مهموم لدرجة النهوس بنشر لهيجنا السُّكري دا
الواحدة دي. على عواهنها و خليهم العربان يعكوا لحد ما بربنا يفتح عليه بالفهم و كل زول عاجبو الصارو

* ثم ياخي وينا لغة الضاد العاملين ليها شندوق وارس؟! كدي أفتح ليك إية قناة ولا إذاعة تبت من حفر الباطن و لا
الربع الخالي من جزيرة العربان ما حتلقى بني أدم بينطق (ضاد.) أصلن لسانم معووج و مقرط على حرف (الظاد)

* و كأنموذج صارخ و مثال حي على كدا دوننا قصة ذاك الأعرابي الجلف الوحش الكاسر اللي قالو : معضي زوجتو
في أضانا جادعا ليها هنووك متل الشي الكعب.و لامن القوا القبض وحملوه ليمثل أمام قاض الأحوال الشخصية؛ فالراجل
بكل بجاحة وقوة عين رفض حتى يوقفولو ، و محامي قام يترافع عن موقفه بليل قرآني صريح و صحيح على شرعية فعلته
التي فعل.أيلا ورينا كدا يا شاطر دليلك شنو. فتلى عليهم قول عز من قائلٍ وَاللَّاتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ
فِي الْمَضَاجِعِ وَاضْرِبُوهُنَّ ۖ(قال إيه لقيت قدامي تلاته حلول يا أمتن الهجران في المضجع و دي بعترف ما ني بقدر عليها، ويا
أمتن ضربها و لا أعظيها و و قد آثرت أحلى الامرين: إني أعمل بهذه الأخيرة على الأقل منها فش غبينة و و بالمرة أضان
مَقْرَشَة. يعني زي عمك دا لو لقى ليه لمة في الورك كان يمسك فيه كب ويقول برضو في شوربة كوارع عجالي تكطع
شنيباتك وراها. فشايفين كيفن يا جماعة الخير قال إيه : قال (لــغــة الظــــاد) قال لا يا غاني ياخوي، من أكل الثواني!!