حزب الأمة خذل الأمة: الصادق المهدي والعقد الوطني الجديد..!!

Quote: ول ابا الحبيب محمد دودي..حبابك يا صديقي تصوم وتفطر على خير.. كتر خيرك على المرور هنا.. اولا: في المجتمعات المحترمة والديموقراطية الحقة: الناخب هو الشعب والشعب فوق الأحزاب السياسية..يعني الوصي عليها.. انا ناخب من غمار الشعب ، ولا انت يا اخوى لمن تتكلم عن الصناديق بتاعة الإنتخابات ناسي منو البيملأ ليك الصناديق دي عشان تجيبك في الحكومة؟..يا ربي الحزب منتظر الملايكة تجي تملأ الصناديق دي ولا ح نملاها نحن الغبش ديل..؟؟ لو كنت يا صديقي ، ومن تجربتك العريقة في المجتمعات الديموقراطية الحقة، لو كنت فعلا تؤمن بالديموقراطية سلوكا وقيما لكنت فرشت خلقك للناخب السوداني وتتعامل معاهو بهدوء وحكمة وبكل بساطة تسأل المشكلة شنو وتطرح تصورك للحل..! وذلك من غير حكاي عضلات تبش..!! نعم عندي علاقة بحزب الأمة ، لأن الديموقراطية الأخيرة التي يتبجح اهل الحزب بمكتسباتها انا كنت اديت صوتي لمرشح الحزب في دائرة الدلنج لعمنا حبيب سرنوب الضو..والصوت ده الآن زاد كتير يا محمد يا اخوي..وانت وحزبك ماشين على انتخابات..! وهل وثيقة العقد الذي يتحدث عنها الحزب ورئيسه وثيقة سرية ولا حجاب فكي:يكتبو ويطويه ويجلدو في جلد نعزية ويقول ليك ما تفتح وتقرأ الفيهو؟ العصر عصر شفافية ، ولو كنت مكان حزب الأمة لطرحت الرؤيا على الشعب مش على قوى اعلان الحرية والتغيير ، ولو فيها كلام معقول الشعب ح يفرضها على قوى اعلان الحرية والتغيير وح تقبل بيها ولا على كيفها..! اما اذا كان الأمر بلطجة..فلقد فشلتم لأنكم حاولتم ابتزاز قوى اعلان الحرية والتغير ولم يعيروكم انتباه ، فجاءت السقطة اولا في التجميد وثانيا في مبادرة خلق تحالف جديد (عماده الأخوان المسلمين ومرافيد الخارجية ، والإتحاديين والمؤتمر الوطني وغيرهم ). اين الوثيقة يا محمد دودي؟ ثانيا: حكاية تفعيل قوى الحرية والتغيير وغيره. في البدء جيبوا لينا عيوب الحرية والتغيير واحد اتنين تلاتة..متى وأين وكيف..بالتفصيل وخلوا الشعب يحكم بينكم لأنه صاحب الأمر.. هذه الأمور لم تعرض على الشعب ، وانما الحزب اختار ان يشرخ وحدة الصف التي يعمل اهل السودان على جمع كل القوى السياسية في خندق واحد.. ديموغرافيا السودان يا محمد دودي شابة للغاية ، والسودان الآن بلد شباب وشباب اسمارت للغاية..فالأفضل تستثمروا في الشباب بدل القمع والإستهزاء بعقول الناس..! اطرح مشكلتك مع القوى الحرية والتغيير ، اما اذا كان الحزب فوق النقد والنصح..فليكن..على بالحلال الإنتخابات الجاية لو نزلتوا في بيوتكم تسقطوا زي الترتيب.. ونسمع منك: الوثيقة (الرؤيا) بالتفصيل والمشكلة مع قوى الحرية والتغيير بالتفصيل.. راجعت موقع الحزب الإلكتروني ولم اجد اثر لهذا العقد الوطني..فياريت فني الحزب يعملوا ابديت..لتسهيل وصول المعلومة للمواطن/الناخب.. ودمت كبر