السلام عليكم ورحمة الله تعالي وبركاته الاستاذ والاخ والصديق احمد موسى عمر.. اما بعد ..
عطفاً على ما سبق بالعنوان .. موضوعي متعلق بتحصيل رسوم وزكاة وضرائب ومساهمات ودمغات ومسميات عديدة بواسطة مايسمى جهاز المغتربين لصالح حكومة السودان من العام 2000 عام مغادرتي للسودان وحتى الآن 2020م.. وفي الحقيقة الموضوع دا ما قمت بإثارته الان فقط بل من 2003 تاريخ اول عودة لي بالسودان ثم تكرر بالسنوات اللاحقة لمن دخلت بسببه حراسة مرتين .. واستشرت فيهو اتنين من الاخوة المحامين قبلاً فترة سيئة الذكر الانقاذ فكانت نصيحتهم ادفع من سكات.. ثم جت حكومة التغيير ومشيت السودان وتاني عملت جوطة وبعدها استشرت اتنين واحد فيهم دخلني بحمد ومرقت بخوجلي.. التاني طنشني عديل وابى الرد .. قلت استشيرك فقط بصورة عامة عن رأيك.. المهم انا ماقانوني لكن مغترب لي عشرين سنة وقضية الجهاز شايفها مغيبة في حق الثورة وحق الحرية والتغيير وتجمع المهنيين.. وعدم تعديل قوانين الجباية المعدلة عليهم للان.. وخاصة قانون الزكاة والضرائب.. وقتى المشيت الخرطوم شهر حداشر الفات كتبت عريضة بالاعتراض على الزكاة مافي زول استلمها مني جوة مجمع المغتربين بتاع السجانة .. لكن قالوا يتم تاجيل " الزكاة المستحقة " فمن ناحية انا كمغترب متضرر من الجهاز دا لانه شايل وبيشيل مني ومن جميع المغتربين قروش بدون وجه حق باسم الزكاة بصورة مخالفة للشرع.. دا غير المبالغ الأخرى.. الجهاز واضح في قانون انشاءه المنشور عام 1998 انه جهاز اتكون لغرض الجباية فقط .. وعلى مايبدو انه حكومة الثورة الآن لسه عندها غرض في استمرار الجباية والتحصيل من بقرة المغتربين الحلوبة ..
طيب استشارة اذا أصر ت الحكومة على استمرار جهاز المغتربين.. وعاوز اعترض ارفع قضية وين مفروض ؟!
وهل من الممكن السؤال والمطالبة بقروش الزكاة المحصلة بطريقة غير شرعية دي على مدى السنوات السابقة ؟
النقطة أخرى .. هل يحق قانونياً ربط تأشيرة الخروج بدفع الزكاة ؟؟؟
وبجيك راجع لحتة عدم شرعية الزكاة المتحصلة بالدولة من المغتربين ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة