|
Re: ذكريات رمضان قبل اكثر نصف قرن (Re: علي عبدالوهاب عثمان)
|
خالنا ده كان رجل حازم وحاذق تربال منضبط جداً بمواعيده عمنا عبدالله جاء من مصر .. وكان يعني نسبياً فقيه في الدين
ناس خالنا في مسيد القرية ما في صلاة جماعة زمان إلا يوم الجمعة في الجامع .. أو اذا في فراش ( مأتم ) .. أو للناس ميسوري حال (فاضين ) تاجر أو مالك جنائن
عمنا عبدالله جمعهم يوم وقال لازم نصلي العصر جماعة في المسيد .. وفترة العصرية هي الدوام الثاني للترابلة ووقت مهم جداً الى الغروب نشاط مكثف بدون توقف ( عشاء البهائم ، حلب اللبن ، تنظيم الزريبة ...الخ ) لازم قبل المغرب التربال يكون راجع ( كما قال الشاعر .. نحن راجعين في المغيرب)
لأن الليل بالنسبة للتربال هو الهدوء وفي اعتقادهم ان نمو الزرع لا يتم إلا في ليل وكأن هناك ملائكة تنزل لتبارك الزرع .. كمان في المساء العقارب والثعابين
عمنا عبدالله طول السجود .. وهنا خالنا قطع الصلاة وقال بالنوبية طبعا أحاول الترجمة بالعربية قال ( الزول ده لمن يقوم .. قولوا ليه .. نحن ما فاضين الوقت ضايق .. كمان نحن ناس ترابلة نأكل البليلة بكثرة .. عشان كده لا نستطيع رفع مؤخرتنا هكذا لفترة طويلة .. وإلا ضاع الوضوء)
خالنا كان يعتبر عمنا عبدالله زول فاضي وقادم من مصر وميسور الحال.. هو ممكن يصلي في المسجد وبمزاجه ..
رحم الله هؤلاء الانقياء .. كانوا في عالمهم في جزر مغلقة لا يخرجون منها إلا يوم السوق مرة في الاسبوع .. ناس على السيلقة تدينهم انساني يحكمهم قانون العيب لا سرقة لا قتل لا غيره ..
احسبهم اليوم وهم في البرزخ في انتظار فتح ابواب الجنة بإذن الله
قارن هؤلاء برجال الفقه وا لدين الذين يسرقون المليارات ومئات قطع الاراضي
رحمهم الله رحمة واسعة .. هكذا بجهدهم قاموا بتربية عشرات من النخب والعلماء
|
|
|
|
|
|
|
|
|