استلام مقر منظمة الدعوه الاسلاميه وهذه بعض ممتلكاتها

Quote: كتب ماهر ابو الجوخ طبعا لمن قريت بيان ناس منظمة الدعوة الإسلامية تعليقاً على قرار حلهم (إقتنعت فعلاً أنه الناس ديل عندهم إحساس متضخم انهم دولة ) .. موضوع أرض المقر ده كلام الإستهبال عديل فاكرين نفسهم دولة أو في الحد الأدني منظمة إقليمية أو دولية أسستها دول في حين أنها منظمة أسسها أشخاص في السودان في سنة 1980م بموجب قانون الجهات التبشيرية لسنة 1962م وظلت كذلك إلا أن تم تضخيم وضعها بإصدار قانون خاص بها في العام 1990م وبالتالي هي منظمة غير حكومية خاضعة للقانون السوداني زيها زي أي جمعية أو منظمة يجوز إلغاء تسجيلها وحلها وهي ليست منظمة إقليمية أو دولية وبالتالي التخويف بأن علينا أن نستعد لمواجهة أكثر من (40) دولة المؤسسة للمنظمة (ده الجهل الحقيقي بالوقائع قبل القوانين الإقليمية والدولية وجزء من تضخم الذات الممنوح للمنظمة شنو علاقة الدول بمنظمة أسسها "أشخاص" ؟!) القضية بشكل واضح أن هذه المنظمة مُنحت بموجب قانون سوداني -يعني السودان عنده الحق يعدلو يلغيهو متى ما أراد ذلك وليس قانون ذو طابع إقليمي أو دولي- إمتيازات (لا تستحقها) ويتم الآن إلغائها وسحبها مافي أي إلزام دولي أو إقليمي يلزم حكومة السودان بإستمرار العمل بمقتضي قانون 1990م أو اي قانون اخر فدي ما منظمة إقليمية أو دولية أو حتى تم تأسيسها بين دولتين بالتالي لا في دولة حتحتج ولا أي حاجة !! .. أما موضوع ممتلكات المنظمة في السودان (ده الإستهبال وقوة العين ذاااتا) منظمة اخذت تسهيلات وأسست شركات تجارية وإستثمارية ما عندها علاقة حتي بالمجال الدعوي وأمتلكت أراضي بالقيمة الإسمية والحكومة السودانية ملزمة تديها اي أراضي للإستخدام العقاري أو الزراعي أو الإستثماري (ده نص ما موجود ليهو أي مثيل في العالم بأن تلزم حكومة دولة أن تمنح منظمة داخل حدودها أو خارجها إمتيازات !! هذا وضع لا يماثله أو يضاهيه إلاّ الاستعمار !!) المدهش أنهم بعد ده بكل قوة عين يتكلموا عن (ممتلكاتهم في السودان) كأنهم وارثين معانا في السودان !! وكمان عندهم كم واحد من الشغالين في المنظمة المحلولة ما سودانيين بيتفاصحوا وبيهددوا ويحذروا السودان من تبعات القرار وأنه الدول المؤسسة ما حتسكت !! من الأخر السودان (حلها ومالا استرداه) وما فات شيئ بدل كلامكم ده أمشوا لأي دولة أو حتى دولكم وأعيدوا تسجيل هذه المنظمة بنفس قانون 1990م أتحداكم ما تلقوا (عُشر) اللقيتو فيهو ببساطة مافي دولة بتقبل بكلام زي ده .. !! بكل وضوح ما عندي تفسير لهذه البجاحة إلا أنه نتاج فعلي لحالة الإستباحة الإتعرض ليها السودان لثلاث عقود حتى بقي أهله غرباء واصبح الغرباء هم أهل البلاد وأصحاب الأمر والقرار فيها !! بالمختصر كده ده وضع ما لقتو حتي بعثة (يونميس) التابعة للأمم المتحدة لمن جات سنة 2005م وفق نصوص أحكام إتفاق السلام ووقتها كان عندها 10 ألف جندي عديل خلى تلقاهو منظمة (أسسها أشخاص) !! .. أجمل فقرة في بيانهم قالوا حيناهضوا القرار عند (رئاسة الجمهورية) معقولة هم ما عارفين أننا رجعنا للنظام البرلماني واتخلصنا من النظام الرئاسي الفرعوني انتهينا منو وما عندنا الا رئيس جمهورية سابق قلعناهو من كرسيهو قبل سنة والان قاااعد في سجن (كوبر) ! امشوا ليهو بورقكم ده (كوبر) !! ماهر أبوجوخ