《 كورونا .. و حَظْرُ التَّبَوُّلِ 》

●جزيتم خيراً أحبتنا العُزاز ، و لا رأى الله لكم بأساً .
و ربَّ ضارة نافعة.و يكفيها نفعاً أنها جابت لينا الحبان
يا سلام. ود عمي شرف المقدم و النعمان ود حِميد
خلي و الباقيين خلاس الفيهم انعرفت.
● عمومن ، أمس المي بيعيدة دي حصلت لي درامة "تجربة خطيرة جدّْ و اجتزتها".
كنت فاطر مع صاحبنا ، كوز زاحف لسة مرطِّب من الجماعة الكان بسافرو (الصين)؛
الله لا طراهم و لا جاب باقيهم. عندو (كرونا) آاي والله صحي؛ كروناالواحدة دي بس"
ماكنت عارف يا ريت..و يا ريتني كونتا عارف"و هو غتيت و حاقد أصلو ما ورَّاني.
♡ مشيت ليه من ضواً بدري في البيت. و بكل محبة.. هاك يا
سلامات بالأحضان ..و الشوق والريد بحر.. و الشمارات كمِّيَّات.
◇ و يلا مع وقعة الشمش كدا جهزوا الفطور و جكاكت العصائر الميها
خمج و مستنين الآذان داب وردة بفارغ الصبر يفتح خشمو يقول لينا:صلوا
في بيوتكم ، و نحن مركزين بحواسنا الخمسعلى: "افطروا في رحالكم"
▪ و حتى اللحظة أنا ماني ناقش إنو الزول دا عندو الما تتسماش
.أتاريه كان ناصب لي فخ جقور يرميني حتف أنفي، في شر أفعالي.
● يلا ، من قولت تيت، الله أكبر بس ختفناها من خشمو كبَّرنا ( هي لله)
و هجمنا على العدة خشينا المعمعة لهمقة شديدة. وزولي يشيل في البلح الغُلاد
و يجدع لي في وشي متل دُقارات لواري شريان الشمال..و يكب في العصاير
و الحلو مر يجغم منها شفطة طويييلة لامن يشفقني و يشحتف رويحيت حتين يقول
لي: هاك ، عارفك ما بتشرب بارد شديد لكن دا ما بطال (نان أنا ما بحب الترابدا).
و لا النشاية بالمحريب و روس النال دي براكم عارفني بموت فيها أكطع
وراها شنبي عديل. و العبد لله على اللهفة و الشلاقة العلي واقع أعمى و أطرش
..بس كالنار في الهشيم عامل شغل الجنجويد: (الأرض المحروقة)
●الشاهد : قضينا على اللخدر و اليابس وصلينا المغرب سريع ، في أمان الله ؛
و قال كدي ولَّع ليه سيجارة شفط منها نفس عمييق جدن و مدَّ لي قال لي هاك (خمِّس)
. مسكت السجارة دي بالخرمة شربتها في نفسين بس ؛ لامن شعرت لي بدوخة . و دا كولو
و يا مؤمن يا مصدِّق ماني جايب خبر انو الراجل(مِكْروِن) دي طبعن موش مِكَرٍ مِفَرٍ
بتاعت امرؤ القيس ؛ لا لا ياخوي دي يعني عندو( كرونا عديل).
☆ بعد كدا الونسة الدقاقة مع الشاي: ياخونا الشاااي..الشاي بجاي..
بي موية صحة..و معاو كيكة..ياخ ماركة (كوفتي). عجيب. و لا كمان
الجبنة بريحة البن و المستكة بس ترُد الروح لكن وين ، بالعكس إلى بارئها ؛
يعني توديها أبو هامور راسو عديل! و للمو عارف يمش أحمد شرفي!!
● بعد دشوة كاربة كدا أتمغَّيت و قلت لزولي : خلاص أنا بعد كدا بمشي
أخد تعسيلة عشان أهضم الفطور الاستثنائي؛ دي "عضة ما منظور مسيلا"..
قال لي أوكي ، بس انتظر نوصِّلك.. في اللحظة دي اسمع ليك بنتو شافعة
مدت راسا بالحيطة تناديه: يابا (كرونتك) دي مولعة.
☆ يلا أخوك من سمعتها عينك ما تشوف إلا النور ؛ فعلن عرفت ليك اللي طفى
النور منو. خلاس الكلام دخل الحوش و بقيت أمش سبعة تمانية خطوة لقدام و تلاتة
لورا ورا. في اللحظة ديك ساعة المسا..فردالجناح و الليل لملم مصاببح النهار"و فجأتن
كول اللي لهمقناه هسة ومعاه سفاسف من عمنول كول اللغاويس دي اتكومت و نزلت
لي جاني في قعر لهاتي:《هي ياخوانا الليلة عاد أمانة ما كِتِل راجِلن مو ساهل》
شكلها يا ربي دي تكون زاتا (ثالثة الأثافي) اابسمع بيها .
♤ لولا أنو قام أخونا شاف حالتي و جرى فللي يُنقذ الموقف و فعلن زي ما
قالو:( الرجال مواغف ).. دوَّر العربية جزاه الله خير، و قال لي اركب يا جبان
يا رعديد، دحين ما قلتو نوبة¿! حتين تنفست الصُّعَداء و استغفرت و رجعت لصوابي..
○والله أنا ما عارف أنو المعفن عندو كرونا لقيتا ليك كرونا قرمبعة كلاسيكي موديل
التمانينات ؛ لاكن بصراحة يا واطة احفظي ما عليكي، عروووسة نضيفة شديد. ياخي
أنا كنت مفتكر عندو كريسيدا و لا كراون ديلوكس سوبر صالون؛ و لا كارينا ما
تبارينا. الليلة بس اكتشفت غيَّر عربيتو ل(كرونا) ما عارف متل العفاريت
ديل متين فكوهم لينا من الأصفاد في نص رمضان!¿