《 كورونا .. و حَظْرُ التَّبَوُّلِ 》

من قفشات الكورونا..صحبي التافه قال لي:
ياااخي فاتك فلم عجيب جدا..😅بتذكر صحبك
ود الحاج المعرس المره الشرسة ديك و البنخاف
منها كلنا والمسميها هو (الجمرة الخبيثة)..؟😰
قلت ليهو : كيفن ما بتذكر (بغلة) ود الحاج ..يااخ ده
كان بتشهد و بحوقل وبتحصبن لمن يكون معانا في
عشرة ونسة و تتصل بيهو وكلنا بنتنشن خيفتن..😅

● قال لي: اها ود الحاج سواها شينة وتراهو عرس ليهو
شافعة نجاضة بالسر قبل 3 شهور..لكن الفلم وين..مع ظهور
الكورونا عالميا ..قامت ( الجمرة الخبيثة ) فرضت على زولنا
الأحكام العرفية بالإقامة الجبرية مع حظر كامل على (التبوُّل)
برة البيت. كانتإجراءات احتراوية غير قابلة للنقض أو الكسر..😠

● أها الشويفعة العروس بقت تتصل على ود الحاج في كل ساعة..وأنو
لازم شرعاً يتحبس تارةً عندها..و عند الجمرة تارتن أخرى..و هددت بإنها
باقتحام بيت الجمرة لو ماجا رمى نفسو في (حِجْرِها) الصحي في ظرف
48 ساعة واليحصل يحصل.. سجن سجن.. غرامة غرامة. و تنقد الرهيفة😰

● قلت ليهو: لا حول ولا قوة الا بالله..وي وي وي😢..أها والورطة دي عملتوا
فيها شنو.. القصة دي اقل شي بتجيب ليها يد فندك في النافوخ ولا قدحة زيت
حار يشلوِط في النخرين؟😭 قال: اضطريت مشيت لصحبك ود الازيرق (الهوائي)
تعرف ،لأنو الهوايات القاعد يمارسا دي بتديهو أفكار وحلول ذكية مستدامة😉😅
وفعلاً..حلاها المعلم والله.. إن شاء يا رب البياكلو ينفعو😇أول شي طلب مننا مبلغ
و قدرو 75 ألف جنية + 100 جنية بالجنبة..😳وقال ال 75 الف تكاليف ايجار عربية إسعاف و معاها 4 تنفار عتاولة لابسين لبس طبي واقي وكمامات وجونتات..و حايجوا
البيت يخموا ود الحاج على اساس انو مصاب بكورونا ولازم يودوهوا العزل الطبي فورا😲

● قلت ليهو: وحيات الله ده تمثيل اجرامي روبرت دينيرو ما سبقكم عليهو..😅 لكن ما قلت لي ال100 جنيه البي جنبة دي لشنو..؟قال لي : ال100 جنية مشيت اشتريت بيها كمية شطة خضرا زي النار وديتا لود الحاج قرشا على بطن فاضية ومعاها شمتين بالأنف بتاعت بدرة فلفل أسود..عليك أمان الله الزول ده بدا يعطس و يقح و العيون ديل حمرن والوش إلتهب مع النخرين السايلة و الجسم قعد يوشِل عرق .يا زول الكورونا ذاااتا ما بتعمل كده..😅أها وحيات الله الإسعاف جا والحلة كلها مرقت..والعتاولة الاربعة شالوا
باب البيت معاهم وهم داخلين..وخموا ليك ود الحاج..😂
لا وكمان فيهم واحد مسطول قليل أدب هرش ليك الجمرة الخبيثة ..وقال ليها هووي يا مدام..عندنا معلومة انك عطستي وقحيتي..! قالت ليهو: برري يا يمه..أبررا واستبرا ..هداك زول الكورونا خموهو تخمو الخمت ابوي😠..انا واولادي كويسين واصلا بعيدين منو..😏😂 أها هسه ود الحاج مع العروس الشافعة بعد زوال اثار الشطوط )🤪😂و قال يمكن يقعد معاها شهر او شهرين حسب العلاج..واللذيدة نسوان الحلة كلهم قاطعوا الجمرة الخبيثة بعد ما بتاع الاسعاف قال ليها قدامهم تعزلي نفسك انتي واولادك في البيت
..تلفون لراجلك ما تضربيهو عشان ما تتعادي 😲😂. بالمناسبة رقم المعلم ود الازيرق عندي لو في أي واحد من الاحباب محتاج لخدماتو..وأهو كلو بحقو و ثوابو😉😎😂
# يا زول اعقل و ما تبقى جاهل وخليك حساس..
وكان ما خايف على نفسك خاف على الناس😡
♧بتصرف بسيط: حباً و كرامة عمنا كوباني ♡