ماذا نصدق ثائر وناشط شهيرمستشار للقاتل حميدتي

Quote: فارس النور مستشاراً لحميدتي [١] عن نفسي فأنا مرحّب بالخطوة دي، ومتفائل بيها؛ من ناحية بتوفّر قناة للثوّار للتفاهم مع حميدتي والمكوّنات البدويةّ والعسكريّة البيمثّلها، بدون وسطاء وسماسرة؛ ومن ناحية بتعكس إنّه حميدتي نفسه بدا يختار الخط السياسي على العسكري؛ ليته اختار ذلك من البداية، وجنّبنا #مذبحة٢٩رمضان؛ لكن أن تأتي متأخّراً خيرٌ من ألّا تأتي! في وجود القوّة العسكريّة والقبليّة المستند عليها حميدتي فوجوده شبه حتمي في الخريطة السياسيّة، زي بقيّة زعماء الميليشيات المسلّحة؛ يلّا الخطوة دي حسّة بتشير، والله أعلم، لي إنّه حميدتي بدا ينتقل من العقليّة القبليّة بتاعة الانفراد بالسلطة، وقهر المنافسين، للعقليّة المدنيّة بتاعة المشاركة في السلطة مع المكوّنات التانية؛ يلزمني بعد كدا أجاوب على بعض الأسئلة: (١) هل ممكن نقبل حميدتي بعد المذبحة؟ أوّلا خلّينا نتّفق إنّه مافي أيّ طريقة موضوعيّة ممكن تنفي مسئوليّة حميدتي والمجلس العسكري عن المذبحة: حتّى لو ما عملوها يظلّوا مسئولين عنها، فضلاً عن إنّهم حاولوا استثمارها والانفراد بالسلطة بعد تفكيك الاعتصام؛ معنى الحاجة دي بالنسبة لي كان إنّه استمرار وجودهم في الساحة السياسيّة بقى مستحيل؛ لمن أطلقت دعوة #مليونية30يونيو [٢] كان الهدف منّها صراحة إسقاط المجلس العسكري؛ الكلام دا قبل المذبحة، فبقى أوجب بعدها؛ وفي ٢٩ يونيو كتبت مسوّدة لخارطة طريق تفصيليّة لما بعد المليونيّة [٣]، ومن ضمنها إبعاد ضبّاط المجلس وحميدتي من المشهد السياسي، على أن يستلم شخص مكان حميدتي، أخوه مثلاً، كممثّل للمكوّنات البيمثّلها حميدتي؛ عمّنا صدّيق يوسف كان متبنّي وجهة نظر مماثلة تقريباً، واللي هي بالنسبة لي أصلا فكرة بديهيّة ومنطقيّة جدّا؛ لكن في النهاية دا ما هو الحصل، بل قبلنا باتّفاق يضع الناس ديل على رأس حكومة الثورة، ووقّع صدّيق يوسف نفسه مكرهاً على الاتّفاق المبدئي؛ صفحتي دي بتشهد أنا قاومت الحاجة دي قدر كيف قبل ما يكتمل الاتّفاق، شان ما نندم عليها؛ لكن في النهاية الذين غلبوا على أمرنا اختاروا الخيار دا؛ فالداير أقوله إنّه وجود حميدتي في الساحة السياسيّة ما كان خياري، بل دا البقينا عليو في النهاية، واتّفقنا عليو؛ بعد كدا يلزمنا نتعامل بموضوعيّة مع الواقع الاخترناه! (٢) مش أمس القريبة دي بتقول للثوّار انسحبوا من الحكومة [٤]؟ التحاق فارس بمنظومة الدعم السريع فيه شَبَه نوعي بالنسبة لي بالتحاق دالية كبّاشي بحزب الأمّة، والتحاق البرّاق النذير بمكتب حمدوك، والتحاق حسام قريش بمؤتمر المستقلّين، وهكذا؛ لو علي كنت دايرهم يفضلوا مستقلّين معانا، لكن مالوا عن الوسط؛ بس كلّهم بيفتحوا منافذ لصوت الثورة؛ لمن ناظم سراج قبل منصب في الحكومة أنا أبديت انزعاجي [٥]؛ وأمس بعد ظهور حميدتي في حاجة من اختصاصات الحكومة المدنية، بصورة توحي بمشروع تلميع جديد ليو، طلبت من ناس صف الثورة يتخارجوا من السلطة دي [٤]، شان ما نخسرهم؛ طيّب هل دا تناقض أشجّع فارس في الوكت دا، وهو مشى لحميدتي ذااته اشتغل معاه؟ أها يلّا أنا مشجّعه تحديداً عشااان اشتغل مباشرة مع حميدتي؛ لأنّه مدرك وواعي بالمخاطرة الاختارها، زي ما شرح في البوست النشره [١]؛ بخلاف الناس الاشتغلوا في حكومة يفترض تكون حكومة الثورة، وفيه احتمال تقع في النهاية تحت هيمنة الدعم السريع؛ (٣) هل فيه أمل؟ التحدّي الحقيقي قدّام فارس، وحميدتي ذاته، إنّه الدول المتبنّية حميدتي هي نفسها ثقافتها قبليّة موناركيّة، زي الثقافة المنحدر منّها حميدتي نفسه؛ يعني الموضوع ما "محور شر" زي ما محاولة قناة الجزيرة تسوّق، وإنّما خليط من المصالح والتوجّهات؛ فأحسن حاجة ممكن تحصل إنّه فارس ينجح في إنّه يكسب حميدتي، ومن خلاله يقدروا يقنعوا الدول الخليجيّة بخصوصيّة الشعب السوداني البتخلّيه ما بينفع معاه غير التعدّديّة السياسيّة؛ الاحتمال الكعب طبعا برضو وارد، وهو إنّه يكون حميدتي مخطّط يستخدم فارس شان يضرب بيو صفوف الثوّار\المدنيّين؛ أرجو إنّه حميدتي يكون أذكى من كدا، وفارس أوعى من كدا؛ عموما يا فارس نحصّنك بخطاب مفتوح أرسلته لحميدتي والبرهان في مايو [٦]، بيشرح كيف إنّه البلد أكبر من إنّه يحتويها فرد واحد. نتمنّى التوفيق لي فارس في الدور الاختاره، وح أكون من أوائل المتعاملين معاه على الأساس الجديد: قبل يومين بعثت بخطاب مفتوح للأحزاب السياسيّة، فحواه دعوة للمساهمة في إحياء ذكرى #٦أبريل في ساحة الاعتصام [٧]، ووعدت بإرسال خطابات مماثلة لجهات متعدّدة سمّيتها، من ضمنها القوّات المسلّحة؛ حسّة نجرّب إن شاء الله نرسّل الخطاب دا بواسطة فارس، ونشوف! ——————————— المراجع: ‏[١] https://www.facebook.com/1378075015/posts/10216736565711344/https://www.facebook.com/1378075015/posts/10216736565711344/ ‏[٢] https://www.facebook.com/745320706/posts/10161851789985707/https://www.facebook.com/745320706/posts/10161851789985707/ ‏[٣] https://www.facebook.com/745320706/posts/10161990255165707/https://www.facebook.com/745320706/posts/10161990255165707/ ‏[٤] https://www.facebook.com/745320706/posts/10163153201845707/؟d=nhttps://www.facebook.com/745320706/posts/10163153201845707/؟d=n ‏[٥] https://www.facebook.com/745320706/posts/10162900691555707/؟d=nhttps://www.facebook.com/745320706/posts/10162900691555707/؟d=n ‏[٦] https://www.facebook.com/745320706/posts/10161800561300707/؟d=nhttps://www.facebook.com/745320706/posts/10161800561300707/؟d=n ‏[٧] https://www.facebook.com/745320706/posts/10163149396180707/؟d=nhttps://www.facebook.com/745320706/posts/10163149396180707/؟d=n عبدالله جعفر