♧ ناس عايشة و ناس دايشة £

《بضاعتكم و ردت إليكم》
هههههههههههههه
●》واحد مغترب .. كان طافش زمن في بلادي برة
و جاي راجع كرت كرتونة .. حكى لينا درامة بوليسية قال :
قبل 10 أيام تعرفت على جكسوية من إياهم فى السياحي
و أنا لافي لأنعاش الذاكرة بأطلال معالم (العاسمة) المسلسة.
♡ الشاهد بقت كأنها معرفة سنين و دنين ؛ طبعن استلطافات جد على أساس إنو القبة جواها فكي (مفترس). بقت يوماتي
تطمانات و حنك طاعم ، و النصيحة هي زاتا عليها حاجات كدا يرمن في (الشوك) المشيت ليهو . طبعن مرتين طلبت منى رصيد و فعلن رسلتو ليها بكل أريحية و آخر بحبوحة .
♤ المهم،عشان يرتفع منسوب العلاقة لدرجة يبقى ( ملح و ملاح) قبل كم يوم طلبت منى أعزما في عفراء و لا سيتى مول على غداء تقارب روح واحدة في جسدين . كمان الأهم و ألذ من كدا، لامن جانا الجرسون خليتا هي اللي تتمنى طبق اليوم داك على كيف كيفا؛ طبعن نظام ليديز فيرست وكدي. غايتو اى شيتن فى نفيستا دي طلبتو كما لم تطلب من ذي قبل .

♡ بت اللزينة أتاريها عندها موبالينة، جاتها مكالمة على
الآي~ فون شكلها { Top Secret } و لا تحتمل اللنتظار للحظة.ختفتو و جرت مني انزوت بركن قصيٍّ، و قعدت تنقنق: همسات حنان دقاقات ؛ ما سامعا بتحنك في منو. فطوالي أنا ضربت على الجلكسي خلتو جنبي علي الطربيظه.فكان الصدمة
لقيت اسمى مسجلاه ليك باسم / استثمار أجنبي رقم ( 12 ) .. أمك..أمك أرقد آااا عيش أنا جرابك .. الليلة عاد ما دقس راجل. فشنو يا عمك عملت تغدير موغف سريع و الرجال مواغف.
● 》رجيتا قاعد.منتظر الزينة جات تتكشم متل نار القصب؛اعتذرت لي بي حس ناعم كرؤوس الأفاعي : آسفة جدن يا حبيبي، ما أكون أتاخرت عليك ؛ أول وهمة أسمعا منها ، و
معاها كمان لمسة كنان بيدها فوق يدي و يا سلام علي ريدي الخلاك بقيت(CD). لامن أعصابي باظن و حيليبرد و ريقي
جف ؛ و دي موش أعرلض كرونة ؛ بالعكس دا معناه : (انفد بجلدك ياسعد ،لقد هلك سعيد) .
♧ أها من حيسي داك قلت ليها: عن أذنك ، جايب معاي شوية هدايا و حاجات بسيطة في عربيتي، بس أتناولم وأجى نكمل غدانا و نشرب لينا بارد و قهوة و نشيش كمان . قالت لي بغنج و هنجكة ظاهرة مفتعلة : أوكي اتفضل . يلا عملتزوغببر من دفع الحساب و بكشيش النادل و هوبَّا؛ فللي دورت و لحست راحاتي
و شتات. فضلت قافل موبايلي يومين لحدت أمبارح فتحت الواطسب لقيتا ليك مرسلة لي كاتبة : (عليك بالساحق و الماحق.. و ماني عافية ليك ياود الحرام) .

○رديت ليها : جربي مرة أخر ى ؛ مع تمنياتي ليك:
حظاً أوفر مع بقية استثماراتك رقم : كم و (طاشر)