♧ ناس عايشة و ناس دايشة £

// نوادر الهمباتة(2)//
**********^^^(((())))^^^**********
《الجنا العلم خالو فتون الهمبتة》
▪》نادرة تحكي أن شقيقةً لأحدهما لعله طه الضرير الملقب
ب( الشتفرة ) أو الطيب ود ضحوية ، كانت تلح على أخيها
أن يأخذ ابناً لها ليعلمه لها فنون الحرب و مضارب الهمبتة.

▪》و لكن ولدها كان درفوناً سَمِّح و جناياً عاجباه صبينتو بلحيل
و شام ريحة صناحو. و مو رضيان من لهفة أمو عليه . فكان لديه
رأي آخر . شايف فيها منقصه ليه و عدم عرفة ببواطن أمور ولدها
و متل ما قالو سدور الرجال صناديق مقفلة بطبلة سوكرتية.

▪》في يوم خالو ردفو وراه وساقو شايلين السافل كدي قالو حاريين لهم
كتلة في حركة أبلاً كدي جيهة صفاق جبل الللبايتور داك قالو ناويين يهمبتولم
منهن خمشة. و هم سايرين بعتامير خلاهم داك ساااه لمن نزلولم في تايةً فوق
الدرب ، قالو يهجسو فيها شوية.أهاوكتين قريب البياح كدي عمك الهمباتي جاتو
صحية قام يتسير و يكطع الجُمار، كجر هدمو و صنقر هنوك. و بهنا الجني كان
صاحي مراقبو ليك عويناتو يبرقن وممممر شرار شرار، متل أبو الصقير الجارح.

▪》تقوم إتا يا عشا البايتات و مُقنع الكاشفات براحة تتسرسق متل أبو سعيفة
و تشيل مركوب خالك و تعرقو تجيه معوقب بوراه تخت لو النعال تحتو تتلقابا
الفسحة. و من حيسك تقوم طاير مكربت بالبعير عري سااه برا بديد؛ شايل الليل
دا حيح شيتن نهضي و شيتن كربتيت.لمن صبح عند أمو ختاهن ليها قداما .

▪》أمو خمشت الرماد أتشكحت بو و سكلبت: الليلة ووووب علي ،أخوي
كِتِل. ولدا قاللها: يمة خلي المناحة دي أخوك شديد ؛ لكن كدي هاك شوفي
هاك ديل حاجات و متعلقات أخوك الكنتي دايراه يعلمني الهمبتة، هدا بعيرو
و مركوبو مليان تب ب(فسحتو). أها أرجيه يجيك راجع بي كرعينو حفيان.

ود الأصيل/
*******************