♧ ناس عايشة و ناس دايشة £

●قال لينا قودو جمالكم وامشوا قدامي والبتلفت بحشر ليو طلقة في راسو .
مشينا قدامو لي قريب ألمغرب وصلنا حلة قطاطي صغيرة والكلاب اقولن
( هو هو ومرقوا رجال الحلة وأحد كورك منهم "حمد اخوي جا" وجرى دخل
البيوت ونسمع ليك نسوان الحلة قجن بالزغاريت و الناس اتلمت فينا سلامتك
يا حمد ، حمدلله على السلامة يا حمد تلاتة سنين يا حمد . بعد كمل سلامو
قاليهم ضيوفي ديل ودوهم الديوان ودخلو جمالم الزريبة واعلفوهن ليهم .
دخلونا قطية كبيرة فوقها كم عنقريب كل واحد فينا لزم ليهو واحد .
جابو لينا عصيدة حارة بي لبن وعملو لينا قهوة وبعد شوية جابو
لينا مرارة وشية حارة ، اطعم منهن ما ﻻقاني.

●الصباح جا صبح علينا قلت ليهو اسمح لينا نمشي ، قالي
تمشوا وين حرَّم طلاقن بالتلاتة ضيفنا كان ما عدى تلاتة يوم
ما بمش مننا .قعدنا تلاتة يوم اكلنا كلو مرارة وشية وصلحوها
لينا بي مريسة لزوم الهضم ، طلاق اطعم منها ما ضقت عمري كلو .

● في اليوم الرابع قال ( بعد تفطروا )ان شاء الله بنسمح ليكم .
وظنيتو عاملين ليهو احتفال ناس الحلة كلهم اتلمو كبار و صغار
نساوين و رجال وجابو الدلوكة وعندهم بنية الساعة المسكت ليك
الدلوكة ودقتها ليك وغنت جنس غناين ، طير السماء يرقص معاها ،
والساعة ديك زولنا حمد جا شايل ليهو سوط عنج مليان قطران ينقط
منو نقيط والشباب ديل جدعو عراريقم وركزو في نص الدارة و ركزو
ليه متل التكنو عريس والساعة الحمد يقشط اﻻول ﻻمن يغرز ليهو
السوط في ضهرو وينـتلو من نص ضهرو نتل والدم يكب جووو زي
النازل ليهو من مجري وحمد باره الشباب واحد واحد فرد سوط ما
بزيدو والنسوان يسون قج بالزغاريت والشباب واقفين لط و ﻻ حتى
رمشوا و ﻻ اتزحزحوا ناسن فراس بالحيل ، وانا ورفاقي نزح لي وراء
خايفنو ينادينا للبطان لكن الحمد لله ما نادانا الزول الداهي ده
الرقيق التقول شيطان جنس قوتو ما ﻻقتني في بشر و ﻻ
حتلاقيني وقبيلتو كلها فراسن عينم حمراء و شرارة.

●بعد اتطامنا قمنا انا ورفاقتي عملنا لينا كم صقرية و كمبانا
عرضنا زين و اتكتحنا هله هله وبشرنا في النسوان و نساوبنم
ضامرات تقول صيد البراري و العيون قدر الفناجين والشعر لي
نص الضهر يا لطيف تقول حور ، وحمد يعاين لينا ويضحك من
البشتنه الحصلت لينا.
● أها، بعد العرضة انتهت جابو لينا جمالنا وقدمنا
لي طرف الحلة وكان شايل ليهو قطعة دهب اداني ليها
قالي اتقسموها و قالي الزول البتلقوهو ماش براهو في
الخلاء اختوهو ﻻنو واثق من نفسو تب ما تستحقروا
ليكم راجل ﻻنو الرجالة قلب ما جسم.
وادعنا و وادعناهو ونهرنا جمالنا وصلنا القضارف بعنا
الدهيبه عشتنا تب .وانا من دربي داك ودعت رفاقتي وقلت
ليهم ماش اهلي ارعى بي سعية ابوي وتبت من السرقة و
عرفت الرجالة والقوة خشم بيوت وغير الحلال ما في
شيتن بملأ العين وغير حمد ما خفت و عرفت إنو
حواء دي والدة. وظنيته يكون دا حمد ود دكين.