♧ ناس عايشة و ناس دايشة £

من قصص العابرين ،،،، الهمباته ( حواء والدة )

كلنا بنسمع بالهمباته وهم لصوص قطاعين طرق يسلبون كل غالٍ
و نفيسٍ لدى ضحاياهم... وال ،،،،،،،،، كان عندهم همباتي اسمو طه
حكى قال..كنا مرة جنوب القضارف كامنين للتجار البجو من الحبشة
كنا منيخين ألبلنا و معاي اتنين من رفاقتي .قاعدين تلاتة يوم ما جانا
رزق في اليوم الرابع الصباح دغش نسمع قمنا علي حيلنا واتجهزنا للكتال .
● فجاة جا ماري فينا زوﻻ ازرق رقيق زي الدابي قال "السلام عليكم" و زول
رد ليهو سلامو مافي ، فات فينا ما اشتغل بينا .قمت انا كوركت ليهو ( هوي
يا اﻻضينة خرجك ده ماليهو شنو ؟ ) رد لي قالي( دهب بني شنقول )و ﻻ
اتلفت علينا .صحت فيهو ( يا اﻻضينة انزل من جملك وارمي الخرج و
امش واحفظ دمك ) وقف جملو وقال انتو رجاﻻً دايرين تشيلو دهبي ؟
إما بفضلي او بي رجالتكم.
● ضحكت وقلت ليهو ( مالك ومال الرجالة يا اﻻضينة .
دايرنو حمرة عين والليلة يا اﻻضينة الطير بفطر بيك ).
التلاتة سلينا سيوفنا ومشينا عليهو قال لينا دايرين تكاتلو
كتال الرجال ولا كتال الحروم ؟أنا فهمت قصدو قلت لي اصحابي
دخلو سيوفكم في جفايرها وخلو لي الإضينة الليلة بقطعوا حتت
حتت النوريهو كتال الرجال .
● رفاقتي اغمدو سيوفم ورجعوا قعدوا تحت الشجرة ، طلع سيفو
من جفيرو وشال دِرعو ومشى ليهو على شجرة انا قلت خاف داير يتجمر،
قطع ليهو فرع وبربحو نضيف من الشوك وخته سيفو فوق سرج الجمل وجا
ماشي علي بالدِرع والعصاية البربحها .قال انا قلت الزول ده مجنون داير
يكاتلني بي عصاية وانا بي سيفي الليلة بشلخوا شليخ العوين .

● جيت خاشي عليهو والجنا اتصر زي الدابي ويصرف ضربات سيفي
بي دِرعو وعصايتو في ضهرو ﻻميها مني عشان ما اقطعها ليو بي سيفي
الجنا اتفر وانصر ﻻمن قطع نفسي تب ما لقيت طريقة فيو صراف بي درعو
ما ﻻقاني زوﻻ متلو .
●أها وكت شاف نفسي انقطع الساعة اليطير فوق زي الصقر ويخرت فيني
خراته في صفاحي الشمال ضهري ﻻمن الدم وقف منو ويدي اتشلت والدرع
وقع من يدي وتاني طار وقشطني في صفاحي اليمين ﻻمن يدي انشلت
والسيف قرب يقع من يدي قلت يا طه أرجل الزول ده اﻻ تضبحو قلت
ليهو ورح نتصارع ونويت اغمتو في ضراعي الشمال واضبحو بي سكيني.

● ختيت سيفي فوق درعي وهو خت عصايتو فوق درعو وخشيت عليهو
والساعة اليغمتني ويتلفة فوقي وخمشني وصقع بي الواطة ﻻمن راسي لفَّ
ومصارين بطني جن في حلقي ، رفاقتي سلو سيوفم وجو ماشين عليهو بي
سرعة فتح خرج جملو وطلع ليو طبنجة وضرب طلقة قصاد ريسينم و قال
ليهم حرم ما ترمو سيوفكم كل واحد احشر ليو طلقة فرق عينيو ، جماعتي
رموا سيوفم .شال سيفي ودرعي وسيوفم ودروعهم وركب فوق جملو
وختاهن فوق كرعينو وانا الساعة ديك قمت من الواطة اترتع .