♧ ناس عايشة و ناس دايشة £

● فكر الجوز أن يحتفلا بعيد الحب و زي ما نجي تجي سجن سجن و غرامة
غرامة ( و تنقد الرهيفة ) . فتفقاوعلي اللقيا خلسةً عند قيفة ترعة الغرنوق مكتب
الماطوري؛ ريفي ود المنسي بعيدآ عن اعين الخلق و شمارات الفضول وتخيلو صوت
(القعونج) أنغام و سمفونيات (قو قا قو قا قو قا) مع صرير الجنادب و البعوض
(أوكسترا تعزف مقطوعة الود و الحب و الظروف)أما العطور فكانت منبعثة من
قش (التردة ) أو (ام صوفة) القايمة بروس في بطن الترعة و أب عشربنات.

● جات البخيتة لابسة توب (عاريَّة) من أم زين اللحمر وجاء القلع قاشر بجلابية
التوم اب جلحات السكروتة. ركبا حمار حمدان ود أب سلكة وحملا (دباديبهم)
في عينين (خُرج )حاج اللمين كيﻻيراهنا دفع الله ودالقديلو وشلته فيتهموهما
بالشيوعية وعدم الشغل وقلة الادب اللي ما فاضل بعدا تلا تدخين السجاير.

● تنصت اخوها البلولة الغشيم لموعد لقائهما وكشف خطة الاحتفال السرية
فراخ يتلبد لهما في حواشة ود حماد ( آخر بيت المقابلة لي ظبة الترعة طبعاً)
وكان يتلبد مثل حركات المفتش (كرومبو ) إلى أن رآهَما جالسين علي ظهر الترعة
في لحظةٍ حميميةٍ ما منظر مسيلا . عاملين مثل ود أبرق وعشوشة عندما ينفردا في
اعلي اغصان شجرة لالوب ( بابكر ود قسومة ) أو يجدان سبلوقة فاضية في ضهر
عوضة جدي عبد الخالق المطرف.......
وعند بداية طقوس الاحتفال خرج البلولة الغشيم و(الغليل ) الاشول وبدران أب تفة
من تحت اللوبة والعدسي متل كلاب جدي (علي ود بلة) لامن يشوفن بعشوم جاي عليهن وانهالوا علي المحبَين بالعصي و السفاريق وسيطان العنج التي تولول مثل صهيل الخيل ( خبطك شمطك لب لتخك ) واستسلم العاشقان للأمر الواقع لولا جبارة، علي ودكريدة الذي جاء ليفتح لبق حواشته المغيرب لراحا شهيدين لفالنتاين لكنه نجد العاشقين في آخر خبتة

● الاخبار القادمة من المستشفي بتقول ان القلع راقد( ورل) في صيفة نشفت عليهو الترعة كل مايجيهو ممرض شايل درب يكورك السوط ﻻ اختا العكاز يا البلولة ﻻ الغليل اللعسر انا ما ود حلتكم وقريبكم بي بت فرج الله و يجعر زي كلبنا (جرقاس )لما يشوف ضلمة

● والبخيتة قالو بهناك تهضرب لي يوم الليلة كل ماتشوف ليها حاجة حمراء تكورك البلولة ﻻ البلولة ﻻ أموت ليك حود لي غادي البلولة السوط بشلخني والعكاز بخليني (عرجة وعويرة) تدقني ااااابالولة أخويالقلع مو غلتان خلو ساي انا الخليتو أدرع حشاي وانا تاني وحات النبي لا بمرق لعيد حب ولا عيد رمضان ولا عيد الضحية ماني مارقة ليهو .....

مع تحيات
ود أب زهانة العلوابي
رئيس لجنة حصر خسائر عيد فلانتين و إزالة التمكين.
تخريمة:
● الله بهدانا و يهداك يابو عاصم. حب شنو ياخ بي ضم الحاء المعطشة ديل في
غاموسم مافي نهاي. خليك من الجكس ؛ ديل المعرسين فيهم الحاجة تام زينو وكت
تجي للرقاد بتسعل أبو الأولاد: "هوي آ باشري: أها بدورلك شي و الله أقرش لي فحل بصل: إذن ابتسم فأنت على مشارف أهلنا ناس حشرو عباس، جيهة أم صفقن عوراض.