ألم يأنِ لهذا الوزيــر الفاخــر بــأن يُــــــغادِر..؟!

Quote: الاخ ابوجودة تحياتي .. انا مزارع واقف مع رفع الدعم قلبا وقالبا .. الناس اللي بتقدم بدائل لابراهيم البدوي وبتقول ليهو استغل الموارد الداخلية دي يا اما ناس حالمة يااماناس ما ليها علاقة بالواقع أي مزارع مشكلتو الاساسية ليس غلاء المحروقات بالعكس غالب ايام الموسم المزارع مضطر يشتريها سوق اسود وبرميل الجاز بيحصل 5و7 الف جنيه والزول غصب بيشتري لانو الندرة وانعدام المحروقات تعني فشل الموسم وموت الزراعة من العطش رفع الدعم عن المحروقات بيجعلها متوفرة وفي متناول اليد ومهما كان رفع الدعم البرميل ما بيصل ولا حتى 10% من السعر اللي بيصلو في السوق الاسود .. على وزير المالية ان يجتمع بأهل الانتاج الحقيقيين وليس الفئة المستهلكة في الخرطوم اللي رفع الدعم عندهم عبارة عن مزايدة سياسية او حا يقلل مشاويرهم الخاصة ثم قصة انو رفع الدعم حا تقابلو زيادة في الاسعار نعم بس دا على المدى القصير جدا اما على المدى الطويل رفع الدعم حا يخلق وفرة في الانتاج ودا من واقع معايشة للزراعة .. لو بتزرعو يا ابوجودة وبتقيفو صف في هيئة النقل والبترول عشان تستلمو التصديق ثم الواحد يجي يقيف يومين في صف الجاز عشان يصرف كوتة ما بتمشيهو شهر ثم يرجع كل فترة وفترة يقيف في الصفوف دي حا تفهم ليه الزراعة بقت طاردة وليه نحن كل موسم بنقلل المساحة المزروعة انا بعرف ناس خرجو من العملية الزراعية تماما واراضيهم للموسم الثاني لم تتم زراعتها ومساحات شاسعة لانو الزراعة في ظل ازمة المحروقات تصبح مغامرة بمعنى الكلمة رفع الدعم سيخلق وفرة في المحروقات وسيوقف تجار السوق الاسود اللي اغتنو من المحروقات ..