المقال ده عايزين اي سوداني ينسخو ويشيرو عشان كل الشعب السوداني يطلع عليهو وعشان يواجهو بيهو الكيزان البوسوسو للمواطنين وبكوركو بدون اي خجله معاش الناس معاش الناس .. .. كتب .. Said Eltayb
هل في مشاريع خليتوها للبلد بعد 30 سنة من حكمكم وسقوطكم وجات حكومة حمدوك بعد الثورة وفشلت في إدارتها؟ خليتو لينا حاجة غير الدعم السريع وهيئة العمليات ومديونيات على الدولة 52 مليار دولار وعقوبات اقتصادية وقائمة ارهاب وجداد الكتروني؟ هل حكومة حمدوك فشلت في إدارة اسطول البواخر السودانية الخليتوها؟ هل حكومة حمدوك فشلت في إدارة اسطول الطائرات السودانية الخليتوها؟ هل حكومة حمدوك فشلت في إدارة اسطول القطارات السودانية الخليتوها؟ هل حكومة حمدوك فشلت في إدارة المشاريع الصناعية والزراعية السودانية الخليتوها؟ هل حكومة حمدوك فشلت في إدارة الوكالة الفضائية والاقمار الصناعيه السودانية الخليتوها؟ هل حكومة حمدوك فشلت في إدارة منظومة الدفاع بالنظر الخليتوها؟ هل حكومة حمدوك فشلت في إدارة العلاقات الخارجيه المميزة الخليتوها؟ هل حكومة حمدوك فشلت في إدارة خدمات المياه والكهرباء والاتصالات والانترنت المتطورة والحديثه الخليتوها؟ ليه بتتعاملوا مع الناس على انهم ما فاهمين حجم الكارثة الفيها البلد بي سبب فشلكم 30 سنة؟ الاستخفاف بي عقول الناس هو الضيعكم ووداكم الشارع ووصل رئيسكم للاصلاحيه ومافي اهانه لتنظيم ونظام حكم 30 سنة اكتر من الحصل ليكم دا. 30 سنة نتيجتها الناس فاقت على شبه دوله محطمة محتاجة بناء من تحت الصفر لا عايزين تساعدوا عشان مستقبل اطفالكم ولا عايزين تبطلوا وساخه وتخلو غيركم يشتغل مشكلتكم شنو مع البلد دي؟ شرفاً الشعب السوداني لو جاب كلبه من الشارع وختاها بدل البشير في كرسي الحكم حا يكون فيها خير للبلد اكتر من اي كوز وكوزة. الشعب السوداني لمن قال تسقط بس وكنتو بتقولو البديل منو وتقعد بس الشعب السوداني جاب شخص مؤهل تأهيل حقيقي خبير اقتصادي ليه مكانته الاقليمية والدولية وتجاربه البنفخر بيها في دول شقيقة ما زول باحث عن سلطة او وظيفه وطالما وضع نفسه محل المسؤولية دي وضحى بي مكتسباته الشخصية عشان بلده وشعبه نحن معاه نحفر اعمق نرمي الساس للسودان الوطن الحر مرفوع الراس #حنبنيهو
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة