المرشح مدني عباس مطالب بالرد بشفافية كاملة حول التساؤلات المثارة حول منظمته

Quote: حمور زيادة ٢٣ ساعة · الطريف في اتهام ذمة مدني عباس المالية وعمل منظمة نداء انو الاتهام بدأ بصورة لخطاب بالانجليزي واتكتب البوست بالعربي واتهم الناس مدني انو وييييين الموية الوصلتها للناس هناك؟ للامانة شفت زول واحد لما راجع الخطاب الانجليزي اكتشف انو نداء ما مطلوب منها اي شي يختص بابار او موية فاعتذر. لكن في ناس عادي شغلت الشريحة التانية " هسه الدعم النفسي ده داير ليهو قروش قدر ده؟" .. طوالي نسو اتهاممم الاول بتاع الموية وانتقلو للمصاريف دي كتيرة على الاتعمل. المضحك حد البكاء في ناس كاتبة تعليقات بحسم " يجيب لينا هنا المنصرفات والحسابات" .. هنا يعني فيس بوك . عاوزين زول متهم بلا شيء يدافع عن نفسو بانو ينشر اوراق محاسبة منظمتو في فيس بوك. الشفافية البنعرفا انك تمشي المنظمة وتطلب تطلع على اوراقم او تمشي هاك وتقدم طلب للاطلاع على الحسابات. لكن تخت رجل على رجل في فيس بوك وتقول جيبو لينا هنا حسابات المنظمة دي نشوفا .. لا معليش انت قايل روحك مدير ادارة المراجعة القانونية في فيس بوك؟ ليه بقول مدني ونداء متهمين بلا اتهام؟ لانو لو في ربع حقيقة في الشغل ده كان الامن اتسبب عليهم ووقفم. او كان الناس القايدين الحملة دي فتحو بلاغ. والمكابرين البيهاجمو ساي ما اظن فيهم زول عارف تكلفة مشروع زي ده حقيقي بيكلف كم عشان يتمن. الناس لقت فضيحة وخاشة تعرض فيها، وبيزوغو من الموضوع الاصلي بتاع اتهامات الموية الظهر انها كضب ومن موضوع انو التكلفة الحقيقية لمشروع زي ده كم؟ ما حبيت اتواصل مع مدني في الظروف الزفت دي (ايوه انا روائي وبقول زفت) لكن اتواصلت مع ناس في نداء وحرضتهم على التقاضي واكدوا انهم حيعملوا ده. المضحك التاني انو الناس تجاهلت اتهام امجد فريد ومدني عباس بترشيح حسام النصري عشان شغال في نداء وصاحبم. وحسام لا صاحبم _على الاقل ما صاحب امجد- ولا شغال مع نداء. الاكاذيب دي كلها تجاوزوها ومسكو في المبلغ ده كبير على البروجكت كمية الاكاذيب الاطلقتا ايمان بريدو تجاه مدني وامجد واتجاهلوها الناس عجيبة جدا. عموما انا واحد ناس ما حاخلي مدني ولا نداء لو ما مشوا المحكمة. عشان الاتهامات الفارغة دي تنتهي. وبشجع برضو درة قمبو وامجد فريد الاتهمو بانهم شغالين مع الامن بفتح بلاغات. القصص دي ما حتقيف لو ما زول اتغرم غرامة تبيعو بيتو اخر شي الناس الكانو بيقولو كنا بنصدق اتهامات الفساد في الكيزان هسه بقيتو جداد قحت تدافعو عنهم؟ الكيزان حكموك ٣٠ سنة شفنا فسادم بعيونا وبعد ده كلو كان فينا ناس بيدافعو عنهم لما تطالم اتهامات كاذبة وكنا بنقول فيهم من العيوب ما يكفي. الدفاع عن مدني انو ما فاسد او امجد انو ما امنجي او درة انها ما امنجية ما جداد الكتروني .. ده موقف ضد اتهام الناس بالباطل ومطالبتهم بالدفاع عن نفسهم. زي م زول صحى الصباح قرر يتهم مرشح الخارجية عمر قمر الدين - الانا شايف السي في بتاعو ممتاز واتمنى يبقى وزير خارجية- في زول قرر يتهمو انو مزور شهاداتو. وفي صحفية لفاحة طوالي كتبت بوست بالخبر. ليه مطلوب من عمر قمر الدين يثبت شهاداتو بدون اي حجة تشكك فيهو؟ بعد الاخير صاحبنا عمار نجم الدين المن المتولين قصة مدني بشكل عجيب ضرب مثل اغرب من الغرابة قال احنا متهمين علي الحاج بالانقاذ الغربي بدون دليل. احب اذكر عمار انو فساد الانقاذ الغربي ده اتعملت عليهو تحقيقات صحفية بالمستندات. وطلع علي الحاج قال خلوها مستورة. فالبشير طلع بعدو قال خليناهو لله. ده يشبه شنو في اني اكتب بوست اتهمك بانك ضربت قروش مفروض تمشي للنازحين؟ زي ما قال فيصل ما اي اتهام بيردو عليهو. لكن انا بكمل في اتهامات تودي سيدا المحكمة.