دولة الجمهوريين يا osman musa: قبسات من سيرة عظيمة

Quote: حكى في "أبو ظبي" شفاهة طرفا من هذه التجربة، وأحب أن أجمل هنا بعضا منها قال: كنت أخا مسلما، من مؤسسي هذا التنظيم في السودان... كنت موظفا وأسكن الحلة الجديدة الخرطوم، سكرتيرنا العام الرشيد الطاهر بكر، بدون ما يستشيرنا، شارك في انقلاب ناس علي حامد وعبدالبديع علي كرار لي قدام أحمد التجاني صالح الآلم "العالم" كتب في ذكرياته إنو اصلو الرشيد مولع بالسلطة ، وأهلو الكنجارة في دارفوربقولو "سلطة للساق ولا دهب لي الخنّاق" ...أصحابنا عبود أعدمهم .. كنا شباب متحمسين وعندنا "من رأى منكم منكرا فليغيره بيده" الخ.... ما كان عندي حيلة تغيير باليد... قلت النغير باللسان مشيت يوم صلاة الجمعة بدري وهي مذاعة ... جلست في الصف الأمامي في مسجد الخرطوم الكبير أول ما الغبشاوي نزل فت طلعت في المنبر ... كنا متحمسين وفصحاء بديت بـ : ( ألا إن رحى الإسلام دائرة ، فدوروا مع الكتاب حيث دار، ألا إن كتاب الله والسلطان سيختلفان ، فلا تفارقوا الكتاب ، ألا إنه سيكون عليكم أمراء يرضون لأنفسهم ما لا يرضون لكم ، إن أطعتموهم أضلوكم ، وان عصيتموهم قتلوكم .. قالوا : وما نفعل يا رسول الله ؟ ، قالّ: كما فعل أصحاب موسى ، حملوا على الخشب ، ونشروا بالمناشير، فوالذي نفس محمد بيده ، لموت في طاعة خير من حياة في معصية ) بلغ الحماس ذروته بين المصلين، ثم عرّجت على "قتّلوا الرجال، ورمّلوا النساء .... الخ" فإذا بالجامع ينفض، لم يبق الا الغبشاوي وثلاثة رجال - فيما بعد تبين أنهم من البوليس السري.. صعد لي الشيخ الغبشاوي وشالني من طولي ونزل بي من المنبر أستدعوني صباح اليوم التالي للتحقيق .. حقق معي أحد أحفاد الزبير باشا لعل اسمه الزين ... قلت له كل ما قلته قال لي الجابرك شنو هسع تقول لي الكلام كدة!! كأنه كان يريدني أن أغير رأيي أو أنكر فما فعلت كتب افادتي ... أتوا بالشيخ الغبشاوي فقال في شهادته ان المتحدث لم يقصد عبود ومجلسه العسكري وإنما يقصد أصحاب عيسى .... طفف لهم الغبشاوي الموضوع ودة الكانو دايرنو .. تاني ما استجوبوني..أحالوني للإستيداع .. عندي عجلة بقيت كل يوم من الحلة الجديدة، وأنا صايم، أمشي أقيّل في الجامع الكبير وأتلو القرآن.... يوم وأنا طالع من الجامع لاقاني واحد كان جاري في الحلة الجديدة جمهوري اسمو ذا النون جبارة الطيب من أحفاد الشيخ الطيب ود البشير .... أقنعني أمشي معاهو أناقش الأستاذ محمود محمد طه في عمارة أبنعوف، دخلت عليه.... من أول وهلة طالعني وجه صبوح قلت لنفسي لا يمكن أن يكون هذا الوجه الصبوح من أهل النار ..... النقاش مشى كتير... بقيت أتردد عليهو ... لقيت معاهو عبداللطيف دة ومجموعة من الجمهوريين شباب يكتبوا من رأسهم في محاضرة القاها الأستاذ محمود في اليوم الماضي ... كان موضوع ملفت وعجيب بالحيل ... شباب زي ديل ناذرين أنفسهم بكليتهم للأمر العجيب دة!! كان الفطام من الأخوان المسلمين أمر شاق علي شديد، نشأت بيني وبينهم علاقة عاطفية متجذرة وكتير منهم، ناس عصام عبدالغفار (فنان من رفاعة كان معاكم في أمريكا وأمو من آل بدري أول يمرق من أم درمان مشى معاي الباوقة) ناس عصام ديل وقريبي من الباوقة محمد يوسف محمد وكتيرين كتيرين صعب علي أفارقهم لكن الحق كان أحب الي، ما خلوني هم ... برضو في النهاية قاطعوني وأقاموا علي حصار اجتماعي ودة كان من أشق الأشياء على نفسي ...ناس أبوالنجا والجماعة ديل ... المسألة مشت ... المنشورات... الكتب .. ألتزام فاطنة وأولادها وسلمى بتها ... (بقت كمان تقدّم أركان لما كانت بتدرس في جامعة الخرطوم) ... جا زواج عصام البوشي من سلمى بي خطوة مشروع الأستاذ وكتبت عنو الصحف... المسألة مشت جات مريم ...