|
|
 Re: صور وفيديوهات مذبحة فض الاعتصام للرصد وال (Re: Yasir Elsharif)
|
ذهبت كي أضع المقال في صالون الجمهوريين، فوجدت عبد الله عثمان قد وضع مقالا آخر للصحفي الطيب عبد الماجد وقد رأيت أيضا أن أنقله إلى هذا البوست:
ــــــــــــــــ
الاعلامى الكبير الطيب عبد الماجد يبدع فى مقال ممتع حتى الثمالة
(خارطة الطريق والدروب لإرضاء الشعوب والقلوب )
أمطار وأشواق......!!!
إذا كنت استرجع ملامح هذا التحول العظيم الذي حدث في بلادي فالصورة الذهنية الأقرب إليا هي هؤلاء الشباب الذين سطروا علي مدي ستة أشهر ونيف أشرف معارك العزة والكرامة والسطوع ....
وكنت قد كتبت مقالا في بواكير هذه الثورة تحت عنوان (مالكم كيف تحكمون ) تحدثت فيه عن هؤلاء الشباب وكيف يفكرون ...!! والي أين هم ماضون!!؟ ولم يخب ظني... !! لكنهم فاقوا حسن الظن أدبا....!! وجسارة ...!! وسمو ....!!
ورص العساكر رص الليلة تسقط بس ...!!
قاتلوا بأياديهم البيضاء سلميا فقابلتهم ترسانة من السلاح وقفوا في ثبات وصعدوا في علو ( صبوها ) كما يكون ( الصب ) ....!! ولازالوا بذات الحماس والألق ...رغم الجراح ....!! إنهم رحيق الثورة..!!
وهذا هو السودان ...!! ذلكم البلد المتفرد والذي فاجأ العالم ولكنه لم يفاجئ نفسه ....!!
فما حدث لم يكن ليتحقق لولا ما لهذا الشعب من رصيد وافر من المعرفة .....!! وإرث زاخر من الحضارة والتاريخ ومخزون ظافر من المجد والبطولة ...!!
وهي أدوات مكنته من هذا الظهور المبين والذي بهر العالمين ...!!
ثورة شارك فيها حتي الشجر ...!!! وتغلغلت في وجدان كل البشر ....!!
هؤلاء في الداخل وذووهم خارج الحدود ...ملأوا شوارع العالم هتافا ونشيد ...!! ونقلوا صوت أهلهم الصامدين الي أسماع الدنيا...!! فصفق العالم ورفع القبعات ووقف تحية حب وإجلال ....
ديل الناس المرقو زي السيل ديل ....!! شيب وشباب نساء صامدات ورجال راكزين .....!! وللأطفال في الثورة نصيب .....
..عارفين إنو في رصاص ..وفِي موت ...وفِي جبروت ...
ورغم ذلك خرجوا ....وقد لايعودوا ...!!
عارفين نفسهم ما ماشين رحلة نيلية ...!!؟ ديل ناس عندهم هدف وقضيه ...إنها إرادة الشعوب ....!!!
ودي مابتنقدر ...!!!!!
ديل الناس البسيطين وعميقين ديل ..!! تلقي الواحد عندو دكتوراه في ( العمارة بين الحداثة والموروث )
وقاعد ( متكل ) ياكل ليهو في فول وطعمية في شارع الوادي
ديل البمرقوها في مدني يحضرو مباراة الأهلي مدني وفريق اخر في دوري السودان ويجو راجعين داقين المشوار دا كلو رغم غدر ( الشارع ) ...و ( فدية ) الطريق ....حبا في مدينتهم .....وحنينا وشوق ...مع إنهم اختاروا الرحيل قسرا الي الخرطوم لأسباب قاهرة بعد أن رفعت ( الأحلام) وجفت ( المدن ) .....!!
لكن لسا بشجعو سيد الأتيام ...وبموتو في مدني ..!!
ديل ماهم ذاتم الناس الماشين يحصلو الخريف في كردفان الغرا أم خيرا جوه وبرا ...!!
فيهم واحدين ظابتين ( إجازتم ) من برا السودان مع موسم الشوق الحلو في ( الأبيض) ( العروس ) ...!!
يشربو ( القنقليز ) من ( أمو ) ويتجولو في سوق
( أبو جهل ) ( أعقل أسواق السودان ) لأنه لم يستجب لمحاولاتكم البائسة في تغيير اسمه كما قصدتم تغيير كل شيء ....!! والعبرة في المضمون وليس القشور والأسماء ...!!
ديل الناس البجو من كل أنحاء الدنيا عشان يعيدو العيد الكبير في السودان ...مع الأهل والحبان
والطائرة تتهادي في دلال فوق سماء الخرطوم الحنينة استعدادا لعناق ترابها ( الحلو ) ...ولسان حالهم يقول ...لو فتر منك جناح في السرعة زيد..
وكان ليهم مراد ينطو بالشباك شوقا ولوعة ...
ويصادف العيد الخريف فتكون العجوة معطونة في عسل ( أمطارا وأشواق ) ....
فبرك المياه التي تبدو تحت ناظريهم من الأجواء ...!! أحب الي قلوبهم من بحيرات ( والين ) السويسرية..!!! ونوافير ( تريفي ) في (روما ) ....
وهي علي الأرض تشكل معضلة للحكومة التي عجزت عن احتوائها ثلاثين عاما فاغرقتهم ...وطواااالي المطرة داقاهم ....
ولم يدر بخلدهم إنو ( المطرة أم رعد ) شايلة في عطبرة والدمازين .....في طريقها الي الخرطوم ....
ديل ياخ ماهم ذاتم الناس الجو من دارفور وخلو (خيرم ) و ( ديارم ) مجبرين ..( دارفور البتكسي الكعبة )
ماشفتو الشلالات دي ( كابا ) كيف في جبل مره وإنسانها الوريف ...زووول في العالم عارف إنو في تفاح وبرتكان في الحته دي مافي ...!!
( داسنو زي الخبر الشين ) ...!!
لو بس فتحتوها للسياحة لعوضتنا النفط ...وما جاوره .....!! وكل البلد دارفور ...
ليه اهتميتوا بالسودان ( الثقل والأوزان ) ونسيتو
السودان ( الوصل والإنسان ) ....لمن الناس ( هجت ) خلت البلد وفِي القلب حسرة ...فتفرقت بهم السبل وانتشروا في البقاع ....كما الشعاع ....!!
وعندما دقت ساعة الثورة الواحدة بتوقيت السودان توحد الزمن في كل هذه المناحي وتلاشت ( غرينتش ) ...وظبط السودانيون ساعاتهم علي ميقات الخرطوم ...مع مراعاة فروق ( الضغط )
وكل علي طريقته لاسقاط النظام ...!!!
وفِي ذلك فليتنافس الكرام .....
ناس قاعدين في (كاردف ) الإنجليزية ....!! واخرون علي ضفاف ( البرتا ) في كندا ...ومثلهم ( شباب ) أخذهم ( اللوتري ) عنوة من غير ميعاد بعد أن ضاق بهم الحال في السودان الفسيح يسكنون إحدي عمارات فرجينيا على تماس واشنطن ...!! وهناك من اختارو ( سدني ) البعيدة ...!! وكثر علي ضفاف الخليج....
اها ديل كل ( ونستم ) عن السودان وعن ( ذكرياتم ) فيه وأحلي ( أيامن ...) ودي الحاجه الوحيدة (البضحكم ) وترفع ( معنوياتم ) وتخلق فيهم حالة من التوازن والتعادل مع تلك البلاد البعيدة الباردة ...وهم لايرون حتي في منامهم سوي الضفاف والجروف حيث لم تستطع تلكم المدن الباهرة بكل جبروتها وسطوتها من اختراق أحلامهم المشفرة حصريا علي السودان ......
والدنيا مني و أحلام ....
ورغم جباياتكم وما جاورها وهم يمنون النفس علي الدوام بي رجعة لي ناس ( ليلي ) وحليل ناس ( ليلي ) وكت الليل يجن ...ولي كل الأهل ....!!
والقمري فوق نخل الفريق فاقد الأهل يبكي ويحن
ودوما هم في حالة حنين للوطن بعطائهم المشرق وتمثيلهم المبهر لإنسان السودان النبيل في تلكم الفيافي ....بشتي الوظائف والمنظمات
فكانت المحصلة أن خرجوا في شوارع لندن...!! وباحات DC ...و ( بوردو ) الفرنسية ...وغيرها من المدن وبعضهم إختار أكرا وداكار وكمبالا في حضن ( ماما ) أفريكا ...
واخرون في (جوبا ) التي تزوجت ورحلت عن الخرطوم وبقي الدم وبعض اَهلها هنا ....فأطلت برأسها تطمئن عبر إنسانها الودود وبعض صحفها الحرة ....تسأل عن الحال ...
سودانيون أقمار كانوا ولا يزالو وعدا وقمحا وتمني ملأوا الشوارع والطرقات في العالم وسدو عين الشمس وقوفا مع شعبهم في الداخل ...فرفع ( الفرنجة ) القبعات ...وبادلوهم الحب ....!! ولبسوا معهم الأزرق رمزا.. ونيل ...
صبر أهلنا وصابروا علي أمل ....وانتو ولا شغالين بالموضوع...سايقين في عديلكم ....!!!
ياخ الزول لو عندو بيت ( إيجار ) يوم العيد بديهو جير ... إنتو ( جير ) ساكت ما دايرين ( تضربو ) بيهو البلد دي ...( تضربو ) في الدولار) ....
تصب الأمطار فيغرق المطار ....!! انفصال تام في الشبكية وتعذر في الرؤية
سؤال ...!!؟؟
إنتو ما كنتو قاعدين تسمعو غنا .....!!؟؟
اصلو مادقت اضانكم الحقيبة دي ...
كنا داخل روضة مافيش حد سوانا.... دي ما سمعتموها .....
ولا ( شفت في الأحلام ظبا يتهادن برخيم نغمات خلي تنادن....!!
عبرات الشـــوق بي إزدادن ....!! تلكم الأحلام ليت يتمااادن )...... .....ياسلام ياخ
( أسمعوها والله بتخلي الزول رقيق...!! ...!!
طبعا بجيك واحد يقول ليك حاشا وكلا نحن بنسمع ( قران ) بس ...!!!
( القران )دا ما سمع بس....( فعل ) ...( فعل ) .......!!!
( ليه دايما بتخاطبونا علي أساس إننا مؤلفة قلوبهم ...
ونحن أولاد قلبا وأسيادا ....
اطلعو من الدور دا ياخ ....ما مناسب مع ( التحلل )
يوم الحسيتو بشويييييية
إقصاء بقي ليكم حار..... وقد قدمتموه لنا مع البهارات
و( الكاتشب) ...في وجبات منتهية الصلاحية علي مدي عقود
ياخ ولا حتي قاعدين تسمعوا ( الذري ) عندما يحلق ....
( كيف تقول لي انتهينا ونحن في عز الشباب ) ..!! فينتفض من لامس شعره الشيب وتعود الحياة لمن مسه ضر ..!!!! كلمات زي المطرة اذا سمعتها الأرض إهتزت وربت وأخرجت أزهارها ....وانتظرت المصير ...!!
نحن قلب الدنيا ديا.... ونحن عز الدنيا بينا
تاني ماتقول انتهينا .....!!! نحنا ياداب ابتدينا
قوة تتحدي الصعاب ........!!والله صحي ...!! وليتكم تسمعون ....!!
طيب...أصلو ما سمعتو ( أبو السيد ) عندما يتسلطن
ويشدو ...
( أنا هنا شبيت ياوطني ...وزيك مالقيت ياوطني ....!! كانت ايّام ياوطني.. وزي الأحلام ياوطني ....
ويالخرطوم با العندي جمالك جنة رضوااااان )
والعجب لما ( يجرا ) ليك رضوان دي....يعلو ويهبط
انت ذاتك ترضي
ومن سمع هذه الملحمة ماكان له أن أوجع الخرطوم في خاصرتها طعنا ....وحرق إعتصامها الباذخ ...!! وحرق معه حشا أمهات ينتظرن عوده أبنائهن من ساحة الكرامة والوطن البتول ....
لكنهم خرجوا ولم يعودوا ......!! ولن .....
وقد عرجوا للسماء ....!!
سيبو الغنا ...!
ولا مدحة لشيخ البرعي راجل الزريبة وهو ينشد ....
أحسن في من عاداك ...!! ومن يحبك ...!!!!
أها دي اسمعوها كويس ...و أكتر من مرة .....فهي وحدها كفيلة بان تؤسس لعقد إجتماعي موثوق .....!!
الغريبة الناس الكانو في القيادة ديل كانو ( بحبو ) بس ولم يعادو
فضربوا في غزوة بائسة ...قبايل العيد ...والله حرام ....
ياخ أصلو ما جربتو غزوات الجيران اليومية العفيفة ...!! وهذا الود والتلاطف وتبادل الزيارات والأكلات والقفشات وبعض ( شمار ) ...!!
علي الأقل كان بحننكم شوية علي الشباب ديل و كأنكم في حرب مع الروم ....!!
ديل ماياهم ذاتم الجيران والناس الفوق ديل ...
انتو أصلو ما لمتكم طربيزة ( كشاتين ) يوم الجمعة بعد الصلاة ....!! ( حريق ) مسخن كدا .....!! ولا ( ويست ) بريء ....مع الإخوان والشاي والغدا ...!! ( فإنها اذا كلت عميت )
إنتو ماعارفين إنو الناس دي هنا بتفتح.... وفِي الشارع برضو بتفتح ...!!
وبالخمسين وحاتكم ....
كنتو عايزين تدكوها...!! مش ...!! ؟؟؟
تلقوها عند ( القافل) ........بالقا ..........!!
والله إلا ( الفيفا ) ....
وقفلتنا كانت علي كرتين ....!!
بت شيريا ( كنداكة ) ( تاجا في راسا ) ...
ولا( ولد ) ديناري ( دمو أحمر وحار ) ....!!
والاتنين ( رميتوهم ) ......!! وكانو كروت فتوحنا ...ودوا جروحنا .....
وجدعنا ( الشايب ) بايظ ....!!!
الغريبة ( الجواكر ) كلها معاكم ...!! وورقكم زايد
وليس بالحظ وحده يحيا الانسان ...!!!
عندما تتحول ( الكتشينة ) من لعبة ( ورق )الي قصة كفاح وعرق ...!!
ياخ إنتو أصلو ما اتعشيتو بي فولة في (الجان ) ولا ( أبو صليب ) مع قزازة ( بزيانوس) ( صااااقتا) زي نظامكم دا ...وشطة مولعة ( زي الثورة دي ...)
وتبادلتم الأخبار والشمار والأبرز في المدينة هذا المساء
ومثل هذه الجلسات موجودة في كل أرجاء السودان
وحواريه ....تختلف المسميات و ( الفول ) واحد.....!! وكلها ( أفوال واقوال ) ...( أنس وجمال )
بتمشو وين إنتو ....!!!؟؟ مع منو ....!!؟؟
طوااااالي إجتماعات .. !!
في شنو ..!!؟؟
دايرين تحرروا القدس ...!!
من الاخر كدا ياخ ...!! نحن ياهم الناس الفوق ديل ..!!
بالله عليكم هسا ديل ناس بحتاجو إجتماعات قدر دا ...!!!
عليكم الله قاعدين تقولو في شنو جوه ...!!؟؟؟
( تاكلو في التمر والفول )
اها النطمنكم الجماعة الفوق ديل كلهم ياهم البطلعو طواااالي ديل لافين ستة شهور من شارع لي شارع وياهم هم ذاتم اللاقيتوهم يوم تلتين ديل ...!!
قالو ليهم تعالو مليون ...حلفو الا يجو أكتر ...!
ناس بتكوي ( هدوما ) بالليل عشان تطلع المليونية الصباح زي العيد ...!!! والدوشكات ماليه الشوارع...!! ديل ناس بتمسكو تاني ...!! بأمانة يعني ..!! ؟؟؟
اها أي زول بعد دا جاي ( يخدم )
( يحكم دي تاني مافي ) ...إسمو ( يخدم )
أها دا مهمتو يشوف الناس دي دايرا شنو بالظبط ...!! وطلباتا شنو ..!!! وينفذ ....!!
لانهم ديل أسياد الرصة والمنصة و الميدان .....!!
وإنتو الحكم ....
شفتو ليكم حكم قال داير يجيب قون ...!!!
( عشان ماسك الصفارة يعني ) ....!!
دا كان زمان ...
الحكم حكم ...والكورة اهداف وأقوان ...
والمباراة متلفزة ومراقبة من الإتحاد الدولي والأفريقي والدنيا والعالمين ...
والأهم من دا كلو الجمهور الخرافي دا ...حارسا وحافظا ...!!
ودا لو لحق لمن كورك التحكيم فاشل ياها الكتمت تاني ....!! فشنو ....أبقو واعين ...!!
ورغم الحصل دا كلو ....برضو حتلقوهو جمهور مثالي ناس لطيفين وودودين ومسالمين ....!!! بس ما يغركم المظهر ...!! ثبات عجيب ....!! وشجاعة حد الجسارة ....!! وسلمية أقوي من الخيال ....!!
وكالعاده لايرفعون غير أكفهم البيضاء ...!! وقلوبهم الممتلئة عزة وقوة وكرامة ...وسلميتهم التي زلزلت الأرض ....!!
هسا في زول عاقل بضيع ليهو ناس جميلين زي ديل...!!
ديل بكسبوهم بس أصلو ما بعادوهم معجونين محبة ومعطونين سلام ......!!
فتقدموا يا أنبل الشعوب ......!! وسلام عليكم في العالمين ......!
مدنياااااااااااااو
|
|
  
|
|
|
|
|
| العنوان |
الكاتب |
Date |
 صور وفيديوهات مذبحة فض الاعتصام للرصد والتوثيق ومزي | Yasir Elsharif | 07-11-19, 06:57 PM |
| Re: صور وفيديوهات مذبحة فض الاعتصام للرصد وال | Yasir Elsharif | 07-11-19, 07:32 PM |
| Re: صور وفيديوهات مذبحة فض الاعتصام للرصد وال | Yasir Elsharif | 07-12-19, 06:47 AM |
| Re: صور وفيديوهات مذبحة فض الاعتصام للرصد وال | Yasir Elsharif | 07-12-19, 06:51 AM |
| Re: صور وفيديوهات مذبحة فض الاعتصام للرصد وال | Mutasim Idris | 07-12-19, 07:58 AM |
| Re: صور وفيديوهات مذبحة فض الاعتصام للرصد وال | Yasir Elsharif | 07-12-19, 10:13 AM |
| Re: صور وفيديوهات مذبحة فض الاعتصام للرصد وال | Yasir Elsharif | 07-12-19, 11:29 PM |
| Re: صور وفيديوهات مذبحة فض الاعتصام للرصد وال | Mutasim Idris | 07-13-19, 00:44 AM |
 Re: صور وفيديوهات مذبحة فض الاعتصام للرصد وال | Yasir Elsharif | 07-13-19, 07:56 AM |
| Re: صور وفيديوهات مذبحة فض الاعتصام للرصد وال | Yasir Elsharif | 07-13-19, 09:08 AM |
| Re: صور وفيديوهات مذبحة فض الاعتصام للرصد وال | صلاح أبو زيد | 07-15-19, 06:36 AM |
| Re: صور وفيديوهات مذبحة فض الاعتصام للرصد وال | Yasir Elsharif | 07-15-19, 01:38 PM |
| Re: صور وفيديوهات مذبحة فض الاعتصام للرصد وال | Mutasim Idris | 07-15-19, 08:16 PM |
|
تعليقات قراء سودانيزاونلاين دوت كم على هذا الموضوع:
at FaceBook
| |
Yasir Elsharif
فيس بوك
تويتر
انستقرام
يوتيوب
بنتيريست